រថយន្ត
អន្តរជាតិ
ក្រុមហ៊ុនយានយន្តចិន នាំមុខគេលើទីផ្សាររថយន្តអគ្គិសនីនៅថៃ
× ក្រុមហ៊ុនផលិតយានយន្តរបស់ចិន កំពុងក្លាយជាចំណែកយ៉ាងសំខាន់ក្នុងការបង្កើតការផលិតរថយន្តអគ្គិសនី (EV) នៅប្រទេសថៃ។ នេះបើតាមការផ្សាយរបស់ Nikkei Asia ដោយលើកឡើងពីវត្តមានក្រុមហ៊ុន Great Wall Motor ដែលកំពុងនាំមុខគេ។
ចាប់តាំងពីការឈានចូលទីផ្សារនៅឆ្នាំ២០២១ Great Wall Motor លក់រថយន្តរបស់ខ្លួនបានជាង២០០០គ្រឿង ហើយរំពឹងថា អ្នកបើកបរថៃ ជាង៣០០០នាក់ទៀត កំពុងរង់ចាំប្រើប្រាស់ផលិតផលរថយន្ត EV ពីក្រុមហ៊ុនយក្សរបស់ចិនមួយនេះ។ Ora Good Cat ដែលជាផលិតកំណត់មួយរបស់ក្រុមហ៊ុន តាមរយៈការផលិតតែប្រមាណ៥០០គ្រឿង បានលក់ដាច់អស់ក្នុងប្រទេសថៃ ក្នុងរយៈពេលតែ៥៨នាទីប៉ុណ្ណោះ។
ក្រៅពីនេះ ក្រុមហ៊ុន SAIC Motor ដែលមានមូលដ្ឋាននៅក្រុងសៀងហៃ ក៏ទទួលបាននូវការពេញនិយមខ្លាំងនៅថៃ ផងដែរ ដោយឆ្នាំកន្លងមក លក់ដាច់បានដល់ទៅជាង៤៥០០គ្រឿង ហើយក្រុមអ្នកវិភាគទីផ្សារវាយតម្លៃថា ទីផ្សារនឹងកាន់តែលុកលុយជាងនេះ។
បើតាមសហព័ន្ធឧស្សាហកម្មថៃ (FTI) រថយន្តជាង១ម៉ឺនគ្រឿង នឹងលក់ដាច់នៅឆ្នាំ២០២២នេះ ដែលជាចំនួនគុណនឹងបួន បើប្រៀបធៀបទៅនឹងឆ្នាំ២០២១ ដោយសាររដ្ឋាភិបាល មានគោលការណ៍លើកទឹកចិត្តចំពោះអ្នកប្រើប្រាស់ ជាពិសេសការជំរុញផលិតផលយានយន្តបៃតងក្នុងស្រុក។
រដ្ឋាភិបាលថៃ ចង់ឲ្យក្រុមហ៊ុនយានយន្តថៃ បង្កើនការផលិតយានយន្តអគ្គិសនីចាប់ពី៣០ភាគរយឡើងនៅមុនឆ្នាំ២០៣០។ បន្ថែមពីលើនេះ ក្រុមហ៊ុនផ្តល់ប្រាក់លើកទឹកចិត្តប្រមាណ ៤២៤០ដុល្លារសម្រាប់រថយន្ត EV មួយគ្រឿង រួមទាំងគោលការណ៍បញ្ចុះពន្ធផ្សេងៗ។
លោក Surapong Paisitpatanapong បានថ្លែងប្រាប់ Nikkei Asia ថា៖ «ក្រុមហ៊ុនជប៉ុន និងម៉ាកយីហោរល្បីៗផ្សេងទៀតពីអឺរ៉ុប ក៏ព្យាយាមវាយលុកទីផ្សារថៃផងដែរ ប៉ុន្តែមិនសូវជាមានការប្រកួតប្រជែងឡើយ បើប្រៀបធៀបទាំងនឹងយីហោរល្បីៗរបស់ចិន»។
កាលពីឆ្នាំ២០២១ ទីផ្សារថយន្ត EV របស់ចិន កើនឡើង៥៨ភាគរយ ហើយនៅឆ្នាំនេះ នឹងបន្តកើនឡើងប្រមាណ៨០ភាគរយ ខណៈក្រុមហ៊ុនជប៉ុន មានប្រមាណតែ៥ភាគរយ ហើយម៉ាកយីហោរពីបណ្តាប្រទេសផ្សេងទៀត មានតែរង្វង់១ភាគរយប៉ុណ្ណោះ។
ថៃដាក់ផែនការជំរុញការប្រើប្រាស់រថយន្តអគ្គិសនីចាប់ពីពាក់កណ្តាលឆ្នាំ២០២១មក បន្ទាប់ពី PTT Group ដែលក្រុមហ៊ុនប្រេង និងឧស្ម័នដ៏ធំប្រទេស សហការជាមួយក្រុមហ៊ុន Foxconn របស់តៃវ៉ាន់ ដើម្បីពង្រីកផលិតផល EV ចាប់ពីឆ្នាំ២០២៤៕
© រក្សាសិទ្ធិដោយ thmeythmey.com