សេចក្តីប្រកាសព័ត៌មានរបស់ក្រសួងការបរទេសអាម៉េរិក អះអាងថា លោក ដាញែល គ្រីថេនប៊្រីង នឹងជួបលោក ប្រាក់ សុខុន ឧបនាយករដ្ឋមន្រ្តី-រដ្ឋមន្រ្តីក្រសួងការបរទេសកម្ពុជា និងមន្រ្តីជាន់ខ្ពស់ផ្សេងទៀតក្នុងជួរដ្ឋាភិបាលកម្ពុជា ដើម្បីពិភាក្សាគ្នាអំពីទំនាក់ទំនងទ្វេភាគី អំពីការគាំទ្ររបស់អាម៉េរិកលើកម្ពុជាដែលកំពុងបំពេញតួនាទីជាប្រធានអាស៊ាន រួមទាំងដំណោះស្រាយក្នុងតំបន់និងលើពិភពលោក។ សេចក្តីប្រកាសព័ត៌មានដដែលនេះ បានឲ្យដឹងទៀតថា លោកឧបការី ក៏នឹងជួបថ្នាក់ដឹកនាំអង្គការសង្គមស៊ីវិល និងយុវជនកម្ពុជាផងដែរ។ 
 

ចេញពីកម្ពុជា លោក ដាញែល គ្រីថេនប៊្រីង នឹងបន្តដំណើរទៅបំពេញទស្សនកិច្ចនៅជប៉ុន រហូតដល់ថ្ងៃទី១៥កក្កដា។ សូមរម្លឹកថា លោកឧបការីរដ្ឋមន្រ្តីការបរទេសអាម៉េរិក ធ្លាប់ដាក់គម្រោងមកកម្ពុជាម្តងរួចមកហើយ កាលពីអំឡុងខែឧសភា ឆ្នាំ២០២១ ប៉ុន្តែត្រូវលុបចោលវិញ ដោយសារកាលនោះ លោក ឆ្លងជំងឺកូវីដ-១៩៕