ការលុបបំបាត់ឲ្យអស់នូវមរណភាពមាតា គឺជាគោលដៅសូន្យទី២ ក្នុងចំណោមគោលដៅសូន្យ៣។ បើតាមរដ្ឋមន្រ្តីមហាផ្ទៃ គោលដៅសូន្យ២ទៀត គឺ ទី១ លុបបំបាត់ឲ្យអស់នូវផែនការគ្រួសារដែលមិនបានឆ្លើយតប ទី៣ លុបបំបាត់ឲ្យអស់នូវអំពើហិង្សា និងការរើសអើងទាក់ទងនឹងយេនឌ័រ។ គោលដៅសូន្យ៣ សំដៅលើការធ្វើឲ្យបញ្ហាទាំង៣នេះ លែងមានឬធ្លាក់មកនៅកម្រិតសូន្យ ដែលកម្ពុជា តាំងចិត្តសម្រេចឲ្យបាន។ 

 

ធ្វើជាអធិបតីក្នុងទិវាប្រជាជនពិភពលោកលើកទី៣៣ រដ្ឋមន្រ្តីមហាផ្ទៃ មានប្រសាសន៍ដូច្នេះថា៖«អភិបាលនៃគណៈអភិបាលរាជធានី-ខេត្ត ដែលជាប្រធានគណៈកម្មាធិការប្រជាជន ដើម្បីអភិវឌ្ឍរាជធានី-ខេត្ត ត្រូវសហការជិតស្និទ្ធជាមួយក្រសួងផែនការ ក្រសួង-ស្ថាប័នពាក់ព័ន្ធ ជាពិសេសត្រូវដឹកនាំ និងតម្រង់ទិសដល់មន្ទីរពាក់ព័ន្ធនៅថ្នាក់ក្រោមជាតិ ដើម្បីរួមគ្នាសម្រេចឲ្យបាននូវគោលដៅសូន្យ៣»។ 
 

អត្ថបទ១របស់អង្គការសុខភាពពិភពលោក (WHO) ដែលត្រូវបានផ្សព្វផ្សាយកាលពីឆ្នាំ២០១៩ បានពន្យល់ថា ភាគច្រើនបំផុតនៃមាតា គឺអាចការពារបានពីមរណភាព តាមរយៈដំណោះស្រាយផ្នែកសុខាភិបាល។ អត្ថបទដដែលនេះ បញ្ជាក់ថា ស្រ្តីគ្រប់រូប ត្រូវទទួលបានសេវាថែទាំដែលមានគុណភាពខ្ពស់ទាំង៣ដំណាក់កាល គឺដំណាក់កាលពពោះ ដំណាក់កាលប្រសូត និងដំណាក់កាលក្រោយប្រសូត៕