លោក អ៊ឹង គៀត ឧត្តមក្រុមប្រឹក្សាផ្ទាល់ព្រះមហាក្សត្រ បានទទួលមរណភាពក្នុងអាយុ៩៨ឆ្នាំ កាលពីថ្ងៃទី១៣ ខែកក្កដា ឆ្នាំ២០២២ ក្នុងរាជធានីភ្នំពេញ។ ព្រះករុណាព្រះមហាក្សត្រ សម្តេចនាយករដ្ឋមន្ត្រី ហ៊ុន សែន រួមទាំងមន្ត្រីជាន់ខ្ពស់ជាច្រើនរូបទៀត បានផ្ញើរំលែកទុក្ខចំពោះក្រុមគ្រួសារអតីតឥស្សរជនជាន់ខ្ពស់រូបនេះ ហើយលោកក៏ជាឪពុកបង្កើតរបស់ លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី នាពេលបច្ចុប្បន្នផងដែរ។
លោក អ៊ឹង គៀត បានប្រឡូកការងារក្នុងជួររដ្ឋាភិបាលតាំងពីមុនសម័យសង្គមរាស្ត្រ ដោយមានតួនាទីជាអគ្គនាយកនៃផ្លូវថ្នល់ នៅក្រសួងសាធារណការ និងដឹកជញ្ជូន ពីឆ្នាំ១៩៥៤ ដល់១៩៦០ ហើយក្រោយមក លោកកាន់តំណែងជាប្រធាន និងនាយកប្រតិបត្តិ នៃការិយាល័យឧបករណ៏ធនធ្ងន់ របស់សហគ្រាសរដ្ឋ។
ពីឆ្នាំ១៩៦២ដល់ឆ្នាំ១៩៦៣ លោកឡើងជារដ្ឋលេខាធិការនៃក្រសួងសង្គមកិច្ច និងការងារ ហើយបន្តកាន់តំណែងជារដ្ឋមន្ត្រីក្រសួងសាធារណការ ដឹកជញ្ជូន និងទូរគមនាគមន៍ពីឆ្នាំ១៩៦៣ ដល់ឆ្នាំ១៩៦៦។ ពីឆ្នាំ១៩៦៦ ដល់ឆ្នាំ១៩៧០ លោកជាទីប្រឹក្សាបច្ចេកទេសនៃអគ្គបញ្ជាការ កងយោធពលខេមរភូមិន្ទ។
មុនចូលដល់សម័យខ្មែរក្រហម លោក អ៊ឹង គៀត ធ្វើជាប្រធាន និងនាយកប្រតិបត្តិនៃរោងចក្ររដ្ឋផលិតសំបកកង់រថយន្ត នៃក្រសួងឧស្សាហកម្មពីឆ្នាំ១៩៧០ ដល់ឆ្នាំ១៩៧១។ ពីឆ្នាំ១៩៧១ ដល់ឆ្នាំ១៩៧៣ ជាអគ្គាធិការនៃក្រសួងសាធារណការ និងដឹកជញ្ជូន។
ក្រោយមក លោកកាន់តំណែងជា ប្រធានហិរញ្ញវត្ថុនៃកំពង់ផែ Bethiowa EID jedid នៅប្រទេសអាល់ហ្សេរីពីឆ្នាំ១៩៧៤ ដល់ឆ្នាំ១៩៧៥ ហើយពីឆ្នាំ១៩៧៥ ដល់ឆ្នាំ១៩៩១ លោកជាវិស្វករផ្លូវថ្នល់នៃ Ministry of Equipment នៃប្រទេសបារាំង។
លោកអតីតមន្ត្រីជាន់ខ្ពស់មួយរូបរបស់គណបក្សហ៊្វុនស៊ិនប៉ិច ដោយក្រោយការបោះឆ្នោតឆ្នាំ១៩៩៣ លោកកាន់តំណែងជារដ្ឋមន្ត្រីក្រសួងសាធារណការ និងដឹកជញ្ជូន ហើយពីឆ្នាំ១៩៩៤ ដល់ឆ្នាំ១៩៩៨ មានតំណែងជាឧបនាយករដ្ឋមន្ត្រី និងជាក្រសួងសាធារណការ។
លោក អ៊ឹង គៀត បានរៀបអាពាហ៍ពិពាហ៍ជាមួយលោកស្រី រស់ ព្រីប៊ូន និងមានកូន៨នាក់ក្នុងនោះស្រី៥នាក់ ដោយលោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារីនាពេលបច្ចុប្បន្ន ជាកូនទីបី។
ក្នុងព្រះរាជសាររំលែកទុក្ខ ព្រះករុណាព្រះមហាក្សត្រ មានព្រះរាជបន្ទូលថា មរណភាពលោក អ៊ឹង គៀត គឺជាការបាត់បង់កុលបុត្រដ៏ឆ្នើម និងជាឥស្សរជនជាន់ខ្ពស់ នៃប្រទេសជាតិ និងប្រជារាស្ត្រកម្ពុជាដ៏ស្មោះត្រង់ដែលបានចូលរួមបំរើជាច្រើនជំនាន់យ៉ាងសកម្មបំផុត ក្នុងបុព្វហេតុ ជាតិ សាសនា ព្រះមហាក្សត្រ។
ដោយឡែក សម្តេចនាយករដ្ឋមន្ត្រី ហ៊ុន សែន ក្រៅពីផ្ញើសាររំលែកទុក្ខ សម្តេចក៏បានដឹកនាំប្រតិភូទៅគោរពវិញ្ញាណក្ខន្ធសពលោក អ៊ឹង គៀត ដោយផ្ទាល់ក្នុងសង្កាត់ជ័យជំនះ ខណ្ឌដូនពេញ ផងដែរ កាលពីរសៀលថ្ងៃទី១៤ ខែកក្កដា។ សម្តេចចាត់ទុកលោក អ៊ឹង គៀត ជាធនធានមនុស្សដ៏ឆ្នើមមួយរូប ពោរពេញដោយចំណេះដឹង វិជ្ជាជីវៈ និងជាឥស្សរជនមានស្នាដៃ គុណបំណាច់ដែលបានតស៊ូ លះបង់កម្លាំងកាយចិត្ត ធានធាន និងបញ្ញាស្មារតី បម្រើដល់ឧត្តមប្រយោជន៍ជាតិ មាតុភូមិ៕