រុស្ស៊ីនាពេលកន្លងមក បានប្រកាសបិទប្រព័ន្ធបង្ហូរហ្គាស The Nord Stream 1 រយៈពេល ១០ថ្ងៃ រហូតដល់ថ្ងៃទី២១ ខែកក្កដា ក្រោមហេតុផលថែទាំប្រចាំឆ្នាំ។ យ៉ាងណាមិញ អាល្លឺមង់ បានដាក់ការសង្ស័យថា រុស្ស៊ីនឹងមិនបើកហ្គាសមកប្រទេសខ្លួនឡើងវិញឡើយ។ ទាក់ទិននឹងបញ្ហានេះ ប្រធានាធិបតីបារាំង លោកអេម៉ានុយអែល ម៉ាក្រុង បានចោទរុស្ស៊ីថា បានយកហ្គាសធ្វើជាអាវុធនៃសង្រ្គាម ដើម្បីដាក់សម្ពាធលើអឺរ៉ុប ដែលបានរឹតកក្រុងមូស្គូ តាមរយៈទណ្ឌកម្មជាច្រើន។ 

 

«នោះជាសារយ៉ាងច្បាស់។ រុស្ស៊ីនឹងប្រើហ្គាសជាអាវុធនៃសង្រ្គាម»។ លោក ម៉ាក្រុង បានបញ្ជាក់បែបនេះ ក្នុងកិច្ចសម្ភាសជាមួយទូរទស្សន៍TF1 ក្នុងទិវាបុណ្យជាតិនៅថ្ងៃទី១៤ ខែកក្កដា ដោយបន្ថែមថា បារាំងបាននាំចូលហ្គាសពីបណ្តាប្រទេសជាច្រើន រួមទាំងខិតខំបង្កើនបរិមាណស្តុកហ្គាសទុកសម្រាប់រដូវត្រជាក់ខាងមុខ។ កន្លងមក រដ្ឋាភិបាលក្រុងបារីស បានបង្កើនការនាំចូលហ្គាសពីន័រវេស, កាតា, អាល់ហ្សេរី និងអាម៉េរិក។ មិនតែប៉ុណ្ណោះ លោកម៉ាក្រុង កំពុងបង្កើនការស្តុកហ្គាសឱ្យបានជិត១០០ភាគរយ នៅត្រឹមរដូវស្លឹកឈើជ្រុះ ដែលចាប់ផ្តើមនៅខែកញ្ញា ដល់ខែធ្នូខាងមុខ។ 

 

ទន្ទឹមនេះ លោកម៉ាក្រុង បានបន្តថា បារាំងមានបំណងគ្រប់គ្រងហ្គាសរបស់ខ្លួន ដោយមិនពឹងផ្អែកលើរុស្ស៊ី។ ដោយប្តេជ្ញាមិនពឹងផ្អែកហ្គាសពីរុស្ស៊ី មេដឹកនាំបារាំង បានព្រមានថា រដូវក្តៅ និងពេលចាប់ផ្តើមរដូវស្លឹកឈើជ្រុះខាងមុខ នឹងជាពេលវេលាដ៏លំបាកសម្រាប់បារាំង។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។ 

 

ស្របពេលប្រទេសនៅតំបន់អឺរ៉ុបមួយនេះ កំពុងប្រឈមបញ្ហាប្រភពថាមពល លោក ម៉ាក្រុង បានអះអាងថា​ ការកាត់បន្ថយការប្រើប្រាស់ហ្គាសនៅក្នុងឆ្នាំនេះ មានបរិមាណតិចតួចប៉ុណ្ណោះ បើធៀបនឹងឆ្នាំមុន។ ពាក់ព័ន្ធនឹងបញ្ហានេះ លោកម៉ាក្រុង បានអំពាវនាវឱ្យ ប្រជាជន អាជ្ញាធរ និងវិស័យឧស្សាហកម្ម ជួយសន្សំប្រភពថាមពល និងកាត់បន្ថយការប្រើប្រាស់ខ្ជះខ្ជាយ។ 

 

ក្នុងកិច្ចសម្ភាសដដែល ប្រធានាធិបតីបារាំង បាននិយាយជាថ្មី ជុំវិញកិច្ចខិតខំជួយអ៊ុយក្រែន ដើម្បីទប់នឹងការឈ្លានពានរបស់រុស្ស៊ីផង។ បើតាមលោកម៉ាក្រុង រដ្ឋាភិបាលក្រុងប៉ារីស ចង់បញ្ឈប់សង្រ្គាមនៅអ៊ុយក្រែន ដោយមិនចូលរួមដោយផ្ទាល់៕