ស្រីលង្កា ដែលផុងខ្លួនក្នុងវិបត្តិនយោបាយផង និងសេដ្ឋកិច្ច បានបើកការចរចាជាមួយអង្គការជាច្រើនដើម្បីដោះស្រាយបញ្ហាលុយកាក់។ បើតាមសេចក្តីថ្លែងការណ៍មួយដែលចេញដោយការិយាល័យប្រធានាធិបតីស្តីទីរបស់ស្រីលង្កានៅថ្ងៃទី១៨ ខែកក្កដា លោក Ranil Wickremesinghe បានលើកឡើងថា ការចរចាជាមួយមូលនិធិរូបិយវត្ថុអន្តរជាតិ (IMF) ជិតដល់ទីបញ្ចប់ហើយ ខណៈការពិភាក្សាក្នុងការស្វែងរកជំនួយពីប្រទេសនានា ក៏កំពុងរីកចម្រើនផងដែរ។ 
 

សេចក្តីថ្លែងការណ៍នេះបានធ្វើឡើងនៅមួយថ្ងៃបន្ទាប់ពីលោក Wickremesinghe បានចេញបញ្ជាឱ្យដាក់ប្រទេសក្នុងភាពអាសន្ន ដើម្បីដោះស្រាយវិបត្តិក្នុងប្រទេស និងពង្រឹងកិច្ចខិតខំប្រឹងប្រែងដើម្បីលុបបំបាត់ភាពចលាចលមុនពេលការបោះឆ្នោតជ្រើសរើសប្រធានាធិបតីថ្មីនៅសភា។ 
 

ស្រីលង្កាបានប្រើគោលនយោបាយដាក់ប្រទេសក្នុងគ្រាអាសន្នជាច្រើនដងមកហើយចាប់តាំងពីខែមេសាមក ពេលដែលការតវ៉ាជាសាធារណៈ​ប្រឆាំងនឹងការដោះស្រាយរបស់រដ្ឋាភិបាលចំពោះវិបត្តិសេដ្ឋកិច្ចនិងកង្វះខាតសម្ភារចាំបាច់បានកើតឡើងជាបន្តបន្ទាប់។
 

«​វា​ជា​ការ​ចាំបាច់​ដែល​ត្រូវ​ធ្វើ ដើម្បី​ផលប្រយោជន៍​សន្តិសុខ​សាធារណៈ ការការពារ​សណ្តាប់ធ្នាប់​សាធារណៈ និង​ការថែរក្សា​ការផ្គត់ផ្គង់ និង​សេវាកម្ម​ចាំបាច់​សម្រាប់​ជីវិត​សហគមន៍​»។ នេះបើតាមសេចក្តីជូនដំណឹង​ដែលបានបញ្ជាក់ក្នុងសេចក្តីថ្លែងការណ៍ដដែល។ 
 

ច្បាប់ដាក់ប្រទេសកក្នុង​គ្រាអាសន្នដែលបានប្រើប្រាស់កន្លងមក បានអនុញ្ញាតឱ្យយោធាចាប់ខ្លួន និងឃុំខ្លួនពលរដ្ឋ ឆែកឆេរទ្រព្យសម្បត្តិឯកជន និងកាត់បន្ថយការតវ៉ាជាសាធារណៈជាដើម។
 

សភាស្រីលង្កាគ្រោងនឹងរៀបចំការជ្រើសរើសប្រធានាធីបតីថ្មីនៅថ្ងៃទី២០ ខែកក្កដា ខណៈនៅថ្ងៃទី១៩ ខែកក្កដាសភាស្រីលង្កានឹងជួបប្រជុំជាថ្មីដើម្បីទទួលយកសំណើបេក្ខភាពសម្រាប់តំណែងរបស់ប្រធានាធិបតីថ្មី៕