ប្រមុខការទូតកូរ៉េខាងត្បូង លោក ផាក ជីន នៅថ្ងៃទី១៨ ខែកក្កដា បានធ្វើទស្សនកិច្ចលើកដំបូងទៅជប៉ុន ចាប់តាំងពីកាន់តំណែងនៅក្នុងខែឧសភាមក។ ជម្លោះទាមទារសំណងពីសំណាក់ប្រជាជនកូរ៉េខាងត្បូង ជុំវិញការចាប់បង្ខំកម្លាំងពលកម្ម នាសម័យសង្រ្គាមចាប់ពីឆ្នាំ១៩៤០ ដល់ ១៩៤៥ បានក្លាយជាប្រធានបទដ៏សំខាន់ ក្នុងជំនួបរដ្ឋមន្រ្តីការបរទេសប្រទេសទាំងពីរ ដើម្បីត្រួសត្រាយផ្លូវរកការកែលម្អទំនាក់ទំនងទ្វេភាគីឡើងវិញ។ 

 

ក្នុងជំនួបទ្វេភាគីនៅក្រុងតូក្យូជាមួយរដ្ឋមន្រ្តីការបរទេសជប៉ុន យ៉ូស៊ីម៉ាសា ហាយ៉ាស៊ី លោក ផាក បានអះអាងថា​ កូរ៉េខាងត្បូង នឹងខិតខំស្វែងរកដំណោះស្រាយឱ្យបានឆាប់ មុនពេលទ្រព្យសម្បត្តិក្រុមហ៊ុនជប៉ុន ដែលមាននៅក្នុងទឹកដីកូរ៉េខាងត្បូង ត្រូវបានរឹបអូស។ នៅក្នុងឆ្នាំ២០១៨ តុលាការកូរ៉េខាងត្បូង បានសម្រេចឱ្យក្រុមហ៊ុនជប៉ុនដូចជា ក្រុមហ៊ុនMitsubishi និងក្រុមហ៊ុនដែក Nippon បង់សំណងទៅជនរងគ្រោះក្នុងសម័យសង្រ្គាម ដែលត្រូវបានចាប់បង្ខំកម្លាំងពលកម្ម។ 

 

យ៉ាងណាមិញ ភាគីជប៉ុនបានបដិសេធទូទាត់សំណងនោះ ក្រោមហេតុផលជម្លោះទាំងនោះ ត្រូវបានដោះស្រាយរួចរាល់ នៅក្រោមកិច្ចព្រមព្រៀងឆ្នាំ១៩៦៥។ 

 

រដ្ឋមន្រ្តីការបរទេសជប៉ុនវិញ ប្រាប់សមភាគីកូរ៉េខាងត្បូងវិញ ពីភាពចាំបាច់ក្នុងការដោះស្រាយភាពខ្វែងគំនិតគ្នាជុំវិញការទាមទារសំណងនោះ។ 

 

«វាពិតជាចាំបាច់ណាស់ក្នុងការអភិវឌ្ឍទំនាក់ទំនងកូរ៉េខាងត្បូង-ជប៉ុន ដោយផ្អែកលើមូលដ្ឋានមិត្តភាព និងកិច្ចសហប្រតិបត្តិការទ្វេភាគី ដែលបានចាប់ផ្តើមតាំងពីភ្ជាប់ទំនាក់ទំនងនៅក្នុងឆ្នាំ ១៩៦៥»។ រដ្ឋមន្ត្រីការបរទេសជប៉ុន បានសង្កត់ធ្ងន់បែបនេះ ដោយបន្ថែមថា បញ្ហាផ្តល់សំណងនោះ ត្រូវបានទូទាត់រួចហើយ នាពេលកន្លងមក។ 

 

តាមសេចក្តីប្រកាសរបស់ក្រសួងការបរទេសកូរ៉េខាងត្បូង លោកផាក និងលោក ហាយ៉ាស៊ី បានឯកភាពថា រដ្ឋាភិបាលប្រទេសទាំងពីរនឹងពន្លឿនកិច្ចពិភាក្សាជុំវិញបញ្ហាខាងលើ។ ទន្ទឹមនេះ មន្រ្តីជាន់ខ្ពស់ប្រទេសទាំងពីរ ក៏បានពិភាក្សាពីការបន្តឡើងវិញនៃកិច្ចព្រមព្រៀងចែករំលែកព័ត៌មានសន្តិសុខយោធា (GSOMIA) ផងដែរ ប៉ុន្តែព័ត៌មានលម្អិតជុំវិញកិច្ចសន្ទនានោះ មិនត្រូវបានបញ្ចេញឡើយ។ 

 

កិច្ចព្រមព្រៀងចែករំលែកព័ត៌មានសន្តិសុខយោធា (GSOMIA) ត្រូវបានផ្អាកប្រើប្រាស់ចាប់តាំងពីឆ្នាំ ២០១៩។ កាលនោះ រដ្ឋាភិបាលលោកមូន ចេអ៊ីន បានពន្យារពេលបន្តសុពលភាពកិច្ចព្រមព្រៀង ដែលហួសកំណត់មួយនេះ ដោយសារជប៉ុនរឹតត្បិតការនាំចេញធាតុកម្រមកកូរ៉េខាងត្បូង។

 

ការស្វះស្វែងរកការជួសជុលទំនាក់ទំនងទ្វេភាគីឡើងវិញនេះ ធ្វើឡើងស្របពេលកូរ៉េខាងជើង បានសាកល្បងមីស៊ីលជាច្រើនលើក និងអាចសាកល្បងនុយក្លេអ៊ែរជាថ្មី រួមទាំងការធ្វើទំនើបកម្មយោធារបស់ចិន។ មិនតែប៉ុណ្ណោះ ភាពរអាក់រអួលនៃទំនាក់ទំនងក្រុងសេអ៊ូល និងក្រុងតូក្យូ បានធ្វើឱ្យប៉ះពាល់ដល់កិច្ចសហប្រតិបត្តិការត្រីភាគីរវាងជប៉ុន កូរ៉េខាងត្បូង និងអាម៉េរិក៕