កីឡាអន្តរជាតិ
អន្តរជាតិ
Zlatan បន្តអាជីពបាល់ទាត់ដល់អាយុ ៤១ឆ្នាំ ក្រោយចុះកិច្ចសន្យាជាមួយ AC Milan មួយឆ្នាំទៀត
× ខ្សែប្រយុទ្ធសញ្ជាតិស៊ុយអែត Zlatan Ibrahimovic នឹងបន្តលេងនៅក្លិបម្ចាស់ជើងឯក Serie A រដូវកាល ២០២១-២២ មួយរដូវកាលបន្ថែមទៀត រហូតដល់វ័យ ៤១ឆ្នាំ ក្រោយពេលយល់ព្រមលើសំណើបន្តកិច្ចសន្យា១ឆ្នាំទៀត។ បើតាមក្លិប AC Milan ថ្ងៃទី១៨ ខែកក្កដា។
កីឡាករដែលមានវ័យ ៤០ឆ្នាំរូបនេះ បានវិលត្រលប់ទៅកាន់ទឹកដី San Siro Stadium កាលពីខែធ្នូ ឆ្នាំ ២០១៩ ក្រោយពេលចាកចេញពីក្លិប LA Galaxy នៅលីគកំពូលអាម៉េរិក Major League Soccer។ Zlatan បានរួមចំណែកជួយក្រុមមួយនេះ លើកពានរង្វាន់លីគកំពូលអ៊ីតាលី លើកដំបូងរបស់ខ្លួន ក្នុងរយៈពេល ១១ឆ្នាំ ។ AC Milan ឈ្នះពានរង្វាន់ Serie A រដូវកាល ២០២១-២២។
ដោយសាររងរបួស Zlatan Ibrahimovic កាលពីរដូវកាលមុន បានបង្ហាញខ្លួនឱ្យក្រុមបានត្រឹមតែ ១២ប្រកួតប៉ុណ្ណោះ ដោយរកបាន៨គ្រាប់ឱ្យក្រុម ។ ប៉ុន្តែកីឡាករនៅតំបន់ប្រយុទ្ធជួរមុខ រួមមាន Rafael Leao និង Olivier Giroud រកបាន ១៤គ្រាប់ស្មើគ្នា ជំនួស Zlatan ក្នុងការត្រួសត្រាយផ្លូវ ដល់ការលើកពាន។
«AC Milan ពិតជាមានកិត្តិយសក្នុងការប្រកាសការចុះកិច្ចសន្យាថ្មីរបស់ Zlatan Ibrahimovic រហូតដល់ថ្ងៃ៣០ ខែមិថុនា ឆ្នាំ ២០២៣។ ខ្សែប្រយុទ្ធសញ្ជាតិស៊ុយអែតរូបនេះ នឹងបន្តប្រើប្រាស់អាវលេខ១១ ប្រចាំក្រុមដដែល។»។ ក្លិប AC Milan ប្រកាសបែបនេះ ក្នុងសេចក្តីថ្លែងការណ៍ដ៏ខ្លីមួយ។
យ៉ាងណាមិញព័ត៌មានផ្សេងនៃកិច្ចសន្យា មិនត្រូវបានបង្ហាញឡើយ ។ ប៉ុន្តែបើតាមប្រភពជិតស្និតនៃក្លិបអ៊ីតាលីមួយនេះ បានបង្ហើបថា Zlatan យល់ព្រមការកាត់បន្ថយតម្លៃពលកម្មដែលរូបគេទទួលបាន ដើម្បីអាចបន្តលេងរហូតដល់ឆ្នាំ ២០២៣ បាន។ Zlatan ត្រូវបានក្លិបរំពឹងថា នឹងត្រលប់ជួយក្រុមវិញនៅក្នុងខែមករា ដើមឆ្នាំ ២០២៣៕
Tag:
Zlatan Ibrahimovic
AC Milan
© រក្សាសិទ្ធិដោយ thmeythmey.com