ក្នុងឆ្នាំ២០២២ កូរ៉េខាងជើង បានសាកល្បងមីស៊ីលជាច្រើនលើក រួមទាំងមីស៊ីលប៉ាលីស្ទិកអន្តរទ្វីបជាលើកដំបូង បើគិតចាប់តាំងពីឆ្នាំ២០១៧ មុននឹងចូលរួមតុចរចាជាមួយអាម៉េរិក។ ស្របគ្នានេះ អាម៉េរិក និងកូរ៉េខាងត្បូង បានបង្ហាញក្តីបារម្ភថា កូរ៉េខាងជើង អាចសាកល្បងនុយក្លេអ៊ែរជាថ្មីផង បន្ទាប់ពីខកខានតាំងពីឆ្នាំ២០១៧ មកដែរ។ 

 

ស្របពេលមានការព្រួយបារម្ភ លោក យូន សុកយ៉ល ប្រធានាធិបតីកូរ៉េខាងត្បូង បានអះអាងថា កូរ៉េខាងជើង គឺត្រៀមខ្លួនជាស្រេច ក្នុងការសាកល្បងនុយក្លេអ៊ែរបានគ្រប់ពេល។ 

 

«យើងជឿថាមិនត្រឹមតែនៅដំណាច់ខែនេះទេ ប៉ុន្តែចាប់តាំងពីខ្ញុំស្បថចូលកាន់តំណែងមក (កូរ៉េខាងជើង) ត្រៀមខ្លួនជាស្រេច និងអាចសាកល្បងនុយក្លេអ៊ែរក្នុងពេលណាដែលកូរ៉េខាងជើងសម្រេច»។ មេដឹកនាំកូរ៉េខាងត្បូង បានផ្តល់ចម្លើយបែបនេះទៅកាន់អ្នកសារព័ត៌មាន ដែលបានសួរសំណួរជុំវិញនុយក្លេអ៊ែរកូរ៉េខាងជើង ក្នុងអំឡុងពេលលោកមកដល់កន្លែងធ្វើការនៅថ្ងៃទី២២ ខែកក្កដា។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។ 

 

កន្លងមក មន្រ្តីកូរ៉េខាងត្បូង ក៏ធ្លាប់បានលើកឡើងដូចលោកប្រធានាធិបតីដែរ ដោយយល់ថាក្រុងព្យុងយ៉ាង បានត្រៀមខ្លួនជាស្រេចក្នុងការសាកល្បងនុយក្លេអ៊ែរ។ ចាប់តាំងពីឆ្នាំ២០០៦ ដល់ ២០១៧ កូរ៉េខាងជើង បានសាកល្បងនុយក្លេអ៊ែរចំនួន ៦លើក ហើយនុយក្លេអ៊ែរទាំងនោះ ត្រូវបានសាកល្បងនៅក្រោមដីទាំងអស់ នៅតំបន់សាកល្បងនុយក្លេអ៊ែរ Punggye-ri។ 

 

មិនតែប៉ុណ្ណោះ នៅដើមសប្តាហ៍នេះ លោក Kim Kyou-hyun នាយកទីភ្នាក់ងារចារកិច្ចជាតិកូរ៉េខាងត្បូង បានធ្វើទស្សនកិច្ចនៅអាម៉េរិក ដោយមិនប្រកាសជាមុន។ ការណ៍នេះ ត្រូវបានអ្នកជំនាញជឿថា នាយកទីភ្នាក់ងារចារកិច្ចកូរ៉េខាងត្បូង អាចជួបជាមួយមន្រ្តីចារកិច្ចអាម៉េរិក ដើម្បីពិភាក្សាពីការសម្របសម្រួលលើការឆ្លើយតបនឹងការសាកល្បងនុយក្លេអ៊ែរកូរ៉េខាងជើង៕