កីឡាអន្តរជាតិ
អន្តរជាតិ
F1៖ Hamilton ដណើមបានលេខ២លើកដំបូង ស្របពេលគូប្រជែង Verstappen ឈ្នះជាលើកទី៧ កីឡាករ Lewis Hamilton (ស្តាំ) និងគូប្រជែង Max Verstappen
× Lewis Hamilton ដណ្តើមបានចំណាត់ថ្នាក់ទី២ក្នុងការប្រណាំងរថយន្ត Formula One រដូវកាល ២០២២ជាលើកដំបូងនៅទីលានទី១២ នៅ French Grand Prix ប្រទេសបារាំង។ ម្ចាស់ការពារតំណែងជើងឯក Max Verstappen បន្តរកបានជ័យជម្នះជាលើកទី៧របស់ខ្លួន។
Hamilton ម្ចាស់ជើងឯក F1 ពិភពលោក៧សម័យដែលបើកបរឱ្យក្រុម Mercedes ធ្លាក់ទឹកដៃប្រណាំងយ៉ាងខ្លាំងនៅរដូវកាលនេះ។ រូបគេមិនទាន់ស្គាល់ជ័យជម្នះនៅឡើយទេចំណោមការប្រណាំង១២លើកកន្លងមក។ យ៉ាងណាដ៏ដោយ នៅប៉ុន្មានប្រកួតចុងក្រោយអ្នកប្រណាំងអង់គ្លេសរូបនេះដណ្តើមបានលេខ៣ និងលេខ២ជាបន្តបន្ទាប់។
នាការប្រណាំងនៅប្រទេសបារាំងក្នុងកម្មវិធី French Grand Prix ថ្ងៃទី២៤ ខែកក្កដា Hamilton ដែលចូលរួមប្រណាំង F1 លើកទី៣០០ប្រកួតរបស់ខ្លួន ទទួលបានចំណាត់ថ្នាក់ទី២ និងជាចំណាត់ថ្នាក់ល្អបំផុតដែលរូបគេទទួលបាននៅរដូវកាល២០២២នេះ។ គូប្រជែង និងជាម្ចាស់ការពារជើងឯក Verstappen ដែលបើកឱ្យក្រុម Red Bull នៅតែបន្តែរកបានជ័យជម្នះរបស់ខ្លួនដោយប្រើថេរវេលា ១ម៉ោង ៣០នាទី និង២វិនាទី ខណៈលេខ៣បានទៅមិត្តរួមក្រុម Mercedes កីឡាករ George Russell។
Hamilton ដែលមិនសូវសប្បាយចិត្តពាក់ព័ន្ធបញ្ហាម៉ាស៊ីនរថយន្តប្រណាំង Mercedes តាំងពីដើមរដូវកាល បានអះអាងថា ខ្លួនមានអារម្មណ៍ល្អឡើងវិញបន្តិចបើទោះខ្លួនសង្កេតឃើញថារថយន្តស៊ីប្រេងតិចជាងរយន្តប្រណាំងក្រុមដទៃ។ ស៊ីប្រេងតិច គឺ Hamilton ចង់មានន័យថាឡានខ្លួនមិនសូវមានកម្លាំងខ្លាំង។
ឆ្លងកាត់ការប្រណាំង១២លើក Verstappen អ្នកប្រណាំងហូឡង់រកបាន២៣៣ពិន្ទុ ដោយបង្កើនការនាំមុខក្នុងកំពូលតារាងរហូតដល់៦៣ពិន្ទុឯណោះ។ Charles Leclerc ដែលបើកឱ្យក្រុម Ferrari មាន១៧០ពិន្ទុស្ថិតនៅចំណាត់ថ្នាក់ទី២ តាមពីក្រោយដោយ Sergio Perez មិត្តរួមក្រុម Red Bull ដោយរកបាន១៦៣ពិន្ទុ។ Hamilton នៅរក្សាលេខរៀងទី៦ដដែល ជាមួយពិន្ទុសរុប ១២៧ពិន្ទុ៕
© រក្សាសិទ្ធិដោយ thmeythmey.com