ភាពអាណាធិបតេយ្យរបស់អ្នកគាំទ្របានកើតឡើងគួរកត់សម្គាល់នៅលីគអង់គ្លេសរដូវកាលមុន តាមរយៈការអបអរការឈ្នះពានរបស់ក្រុមពួកគេ អបអរការគេចផុតពីការកាត់ចោល និងអបអរការឡើងទៅកាន់លីគកំពូលជាដើម។ អ្នកគាំទ្រទាំងនោះបានចូលលុកលុយពេញទីលានតែម្តង។
 

អំពើហិង្សាជាច្រើនករណីក៏បានកើតឡើងនៅលើទីលាន រួមទាំងបញ្ហាពាក់ព័ន្ធនឹងអ្នកចាត់ការ Crystal Palace លោក Patrick Vieira និង Billy Sharp ខ្សែប្រយុទ្ធ Sheffield United ដែលត្រូវបានអ្នកគាំទ្រវាយបន្ទាប់ពីប្រកួតចាញ់ Nottingham Forest នៅវគ្គជម្រុះ Play-off។
 

គ្រាប់បែកផ្សែង និងកាំជ្រួចជាដើម ដែលត្រូវបានប្រើប្រាស់ជាយូរមកហើយ នៅក្នុងការប្រកួតនៅតំបន់អឺរ៉ុប និងកន្លែងផ្សេងទៀតលើពិភពលោក ដែលធ្លាប់ជាករណីកម្រនៅអង់គ្លេស ។ ប៉ុន្តែបានកើនឡើងញឹកញាប់ក្នុងរយៈពេលចុងក្រោយនេះ។
 

ដើម្បីបង្កាករណីនេះកើតឡើងទៀត លីគ និងសហព័ន្ធកីឡាបាល់ទាត់អង់គ្លេស (FA) នឹងចាត់វិធានការតឹងរឹងចាប់ពីដើមរដូវកាលថ្មីនេះទៅ។
 

«ជនល្មើសដែលបានកំណត់អត្តសញ្ញាណទាំងអស់នឹងត្រូវក្លិបរាយការណ៍ទៅប៉ូលីស ហើយពួកគេអាចរងការកាត់ទោសតាមកំណត់ត្រាព្រហ្មទណ្ឌអចិន្ត្រៃយ៍ ដែលអាចប៉ះពាល់ដល់ការងារ និង​ដាក់​ពន្ធនាគារជាដើម»។ នេះជាការបញ្ជាក់របស់ Premier League និង FA។
 

ដោយឡែក អ្នកគាំទ្ររូបណាដែលរត់ចូលទីលាន និងប្រើកាំជ្រួចផ្សែង អាចត្រូវរងការហាមប្រាមពីក្លិបផ្ទាល់តែម្តង ដោយបម្រាមនោះ អាចឈានដល់ហាមអ្នកគាំទ្រចូលទស្សនាមួយជីវិត ហើយពិសេសអ្នកល្មើសជាកុមារ អាចឈានដល់ការហាមប្រាមដល់អាណាព្យាបាលពួកគេថែមទៀតផង៕