ការប្រមូលចំណូលពន្ធដារ​របស់អគ្គនាយកដ្ឋានពន្ធដារនារយៈពេល៦ខែមកនេះ​ គឺសម្រេចបាន ៧ ៩៨០,៥៧ពាន់លានរៀល (ប្រមាណ ១ ៩៧០,៥១លានដុល្លារអាម៉េរិក) ដែលស្មើនឹងជិត៧០ភាគរយនៃផែនការ។ ពន្ធដារសម្រេចបាននេះ កើនជិត៣០ភាគរយ ធៀបនឹងរយៈពេលដូចគ្នាក្នុងឆ្នាំ២០២១។ 
 

 

បើតាមលទ្ធផលនៃការអនុវត្តថវិកាឆមាសទី១ និងការវាយតម្លៃការអនុវត្តច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២២របស់ក្រសួងសេដ្ឋកិច្ច និងហិរញ្ញវត្ថុ ការសម្រេចបាននូវលទ្ធផលនេះ គឺដោយសារ ការកើនឡើងនូវពន្ធលើប្រាក់ចំណូល, ពន្ធលើប្រាក់បៀវត្ស, អាការលើតម្លៃបន្ថែម និងអាករពិសេសលើទំនិញ។ 

 

ក្រសួងសេដ្ឋកិច្ច បញ្ជាក់ថា ជារួម ការប្រមូលចំណូលពន្ធនៅឆមាសទីមួយ ឆ្នាំ២០២២ នៅតែបន្តសម្រេចបានលទ្ធផលល្អ​ប្រសើរ​ដែលឆ្លុះបញ្ចាំងឱ្យឃើញពីប្រសិទ្ធភាពនៃកិច្ចខិតខំប្រឹងប្រែង ក្នុងការអនុវត្តផែនការយុទ្ធសាស្ត្រ និងផែនការប្រតិបត្តិរបស់អគ្គនាយកដ្ឋានពន្ធដារ ព្រមទាំងការដាក់ចេញនូវគោលនយោបាយបន្ធូរបន្ថយពន្ធ ដើម្បីទ្រទ្រងដល់ដំណើរការអាជីវកម្មចំនួនដែលរងផលប៉ះពាល់ ដោយសារកូវីដ-១៩ ។ «ដូចនេះ តាមការប៉ាន់ស្មានរហូតដល់ដំណាច់ឆ្នាំ២០២២ ចំណូលពន្ធដារ នឹងអាចសម្រេចបានប្រមាណ ១០៩,៥ភាគរយ នៃច្បាប់ហិរញ្ញវត្ថុឆ្នាំ២០២២»។ នេះបើតាមក្រសួងសេដ្ឋកិច្ច។​

 

សូមជម្រាបថា កាលឆ្នាំ២០២១ អគ្គនាយកដ្ឋានពន្ធដារ ប្រមូលចំណូលពន្ធចូលជាតិបាន ២ ៧៨១,៩២លានដុល្លារ។ ថវិកាដែលប្រមូលពន្ធដារប្រមូលបាននេះ គឺលើសផែនការរហូត២៤,០២ភាគរយ។  ការសម្រេចបាននូវសមិទ្ធផលនេះ ត្រូវបាន សម្តេច ហ៊ុន សែន លើកឡើងថា ជាកំណត់ត្រាប្រវត្តិសាស្ត្រនៃការប្រមូលចំណូលពន្ធផ្ទៃក្នុងរបស់អគ្គនាយកដ្ឋានពន្ធដារ​៕