ច្រកចេញចូលតែមួយ នៅតាមបណ្ដាឃុំ-សង្កាត់ ចំនួន២៩ ក្នុងខេត្តព្រះសីហនុ គ្រោងនឹងបើកដំណើរការជាផ្លូវការនៅថ្ងៃទី១ ខែសីហា ឆ្នាំ២០២២ ខាងមុខ។ ការបើកដំណើរការនេះ បន្ទាប់ពីក្រសួងមហាផ្ទៃបើកកិច្ចប្រជុំ ផ្សព្វផ្សាយនូវខ្លឹមសារដែលកំណត់នៅក្នុងសេចក្ដីណែនាំលេខ ០១៨សណន ចុះថ្ងៃទី១៣ ខែឧសភា ឆ្នាំ២០២២ សម្រាប់ថ្នាក់ដឹកនាំ និងមន្ត្រីពាក់ព័ន្ធរបស់រដ្ឋបាលខេត្ត-ក្រុង- ស្រុក ឃុំ-សង្កាត់ នៃខេត្តព្រះសីហនុ។
 

សេចក្ដីណែនាំនោះ ស្ដីអំពីរបៀបនៃការរៀបចំយន្តការច្រកចេញចូលតែមួយនៅរដ្ឋបាលឃុំ-សង្កាត់នីមួយៗសំដៅដាក់ឱ្យដំណើរការយន្តការឱ្យបានឆាប់រហ័សក្រោយពេលដែលក្រុមប្រឹក្សាឃុំ-សង្កាត់ជាប់ឆ្នោតអាណត្តិថ្មីចូលកាន់តំណែង។
 

គម្រោងបើកដំណើរការច្រកចេញចូល របស់អាជ្ញាធរខេត្តព្រះសីហនុ ក្នុងគោលបំណង លើកកម្ពស់គុណភាព និងប្រសិទ្ធភាព នៃការផ្តល់សេវាសាធារណៈជូនប្រជាពលរដ្ឋ សំដៅបង្ខិតសេវាសាធារណៈជាមូលដ្ឋាន និងចាំបាច់នានាឱ្យទៅកៀកជិតពលរដ្ឋ។ ម្យ៉ាងទៀត ដើម្បីបង្កលក្ខណៈងាយស្រួលដល់ប្រជាពលរដ្ឋ កាត់បន្ថយការិយាល័យធិបតេយ្យ និងភាពស្មុគស្មាញនៃការស្នើសុំសេវារបស់ប្រជាពលរដ្ឋនៅមូលដ្ឋាន។
 

នាកិច្ចប្រជុំផ្សព្វផ្សាយសេចក្តីណែនាំស្តីពី បែបបទនិងនីតិវិធី នៃការផ្តល់សេវារដ្ឋបាលតាមយន្តការច្រកចេញចូលតែមួយនៅរដ្ឋបាលឃុំ-សង្កាត់ នៅថ្ងៃទី២៥ ខែកក្កដា លោក គួច ចំរើន អភិបាលខេត្តព្រះសីហនុ លើកឡើងថា អាជ្ញាធរត្រូវរួមគ្នាពង្រីងសេវារដ្ឋបាលនៅច្រកចេញចូលតែមួយឱ្យមានប្រសិទ្ធភាព តម្លាភាព, បិទតារាងតម្លៃកំណត់ ដើម្បីផ្តល់ភាពងាយស្រួលជូនប្រជាពលរដ្ឋ និងជួយកាត់បន្ថយកង្វល់ប្រជាពលរដ្ឋនៅក្នុងមូលដ្ឋាន និងត្រូវប្រឡងប្រណាំងនៅតាមឃុំ-សង្កាត់ទាំង២៩។
 

គួរជម្រាបផងដែរថា រាជរដ្ឋាភិបាលបានដាក់ឱ្យអនុវត្តសាកល្បងអង្គភាពច្រកចេញចូលតែមួយ ចាប់ពីឆ្នាំ២០០៥ ដោយមានការសិក្សា និងវាយតម្លៃបន្តបន្ទាប់ លើការផ្តល់សេវាតាមរយៈការិយាល័យច្រកចេញចូលតែមួយ។ តាមរយៈយន្តការនេះ រាជរដ្ឋាភិបាល ដែលមានក្រសួងមហាផ្ទៃជាសេនាធិការ បានពិនិត្យឃើញថា ទទួលបានការគាំទ្រ និងពេញចិត្ត ពីប្រជាពលរដ្ឋ សង្គមស៊ីវិល និងផ្នែកឯកជន រាជរដ្ឋាភិបាលបានសម្រេចដាក់ចេញអនុក្រឹត្យលេខ១៨ អនក្រ.បក ចុះថ្ងៃទី៨ ខែកុម្ភៈ ឆ្នាំ២០១៧ ស្តីពីការបង្កើតយន្តការច្រកចេញ-ចូលតែមួយសម្រាប់ការផ្តល់សេវារដ្ឋបាលនៅរដ្ឋបាលថ្នាក់ក្រោមជាតិ៕