តាមទិន្នន័យរបស់មជ្ឈមណ្ឌលគ្រប់គ្រងជំងឺឆ្លង(CDC) មកទល់ពេលនេះ អាម៉េរិកមានករណីឆ្លងប្រមាណ ៥ពាន់ករណី ដោយក្នុងនោះរដ្ឋញូវយ៉ក មានចំនួន ១៣៨៣ករណី។ ទាក់ទិននឹងបញ្ហានេះ អភិបាលរដ្ឋញូវយ៉ក លោកស្រី Kathy Hochul បានប្រកាសដាក់រដ្ឋរបស់ខ្លួន ក្នុងស្ថានភាពអាសន្នមានមហន្តរាយ (State Disaster Emergency) ដើម្បីទប់ស្កាត់ជំងឺមួយនេះ កុំឱ្យរីកសាយធំឡើយ។ 

 

«បន្ទាប់ពីពិនិត្យទិន្នន័យចុងក្រោយលើការផ្ទុះឡើងនៃជំងឺអុតស្វាក្នុងរដ្ឋញូវយ៉ក ខ្ញុំប្រកាសដាក់រដ្ឋក្នុងស្ថានភាពអាសន្នមានមហន្តរាយ ដើម្បីបង្កើនកិច្ចខិតខំក្នុងការប្រឈមមុខនឹងការផ្ទុះឡើងនៃជំងឺឆ្លង»។ លោកស្រី Hochul បានសង្កត់ធ្ងន់បែបនេះនៅក្នុងបញ្ជាប្រតិបត្តិមួយ ចេញនៅថ្ងៃទី២៩ ខែកក្កដា។ 

 

បើតាមអភិបាលរដ្ឋញូវយ៉ករូបនេះ ករណីឆ្លងអុតស្វា ១ភាគ៤នៅក្នុងប្រទេស គឺមាននៅក្នុងរដ្ឋញូយ៉ក ហើយអាម៉េរិក ត្រូវតែឆ្លើយតបនឹងជំងឺមួយនេះ តាមដែលអាចធ្វើបាន។ នេះបើតាមការចុះផ្សាយរបស់សារព័ត៌មាន CNBC។ 

 

ស្របពេលមានករណីឆ្លងជំងឺអុតស្វាហក់ឡើងនៅក្នុងប្រទេស អាម៉េរិក នៅថ្ងៃទី២៨ ខែកក្កដា បានប្រកាសបញ្ចេញវ៉ាក់សាំងប្រឆាំងជំងឺឆ្លងមួយនេះចំនួនជិត ៣០ម៉ឺនដូស ដើម្បីទប់ស្កាត់ករណីឆ្លងនៅក្នុងប្រទេស៕