ក្រុមនារីអង់គ្លេសក្លាយជាម្ចាស់ជើងឯក Women Euro 2022 លើកដំបូងក្នុងប្រវត្តិសាស្ត្រក្រោយបំបាក់ក្រុមនារីអាល្លឺម៉ង់ជាម្ចាស់ជើងឯក៨សម័យ ដោយលទ្ធផល ២-១។ កាលពីថ្ងៃទី១៦ ខែកក្កដា ជាថ្ងៃប្រកួតបើកឆាករបស់ក្រុមម្ចាស់ផ្ទះនារីអង់គ្លេស ស្វាគមន៍នារីអូទ្រីស នាកីឡដ្ឋាន Old Trafford មានអ្នកចូលទស្សនាប្រមាណ ៦៨,៨៧១នាក់ ដែលជាកំណត់ត្រាចាស់។
 

ចំណែកកំណត់ត្រាការប្រកួតរបស់ក្រុមបុរសនៃពានរង្វាន់ Euro នេះ មានអ្នកចូលទស្សនាច្រើនជាងគេបំផុតគឺនៅឆ្នាំ ១៩៦៤ ដោយមានមនុស្សប្រមាណ ៧៩​,១១៥នាក់ ចូលទស្សនាការប្រកួតវគ្គផ្តាច់ព្រ័ត្ររវាងក្រុម ​អេស្ប៉ាញ ទល់ក្រុមសហភាពសូវៀត ដែលបច្ចប្បន្នប្ដូរជា រុស្ស៊ី នៅកីឡដ្ឋាន Santiago Bernabeu ទីក្រុងម៉ាឌ្រីដ។
 

កាលឆ្នាំ ២០២១ ជំនួបវគ្គផ្តាច់ព្រ័ត្រ Euro 2020 រវាងអង់គ្លេស ជាមួយអ៊ីតាលី នាកីឡដ្ឋាន Wembley មានមនុស្សចូលទស្សនាប្រមាណ ៦៧​,០០០នាក់ ដោយសហព័ន្ធបាល់ទាត់អង់គ្លេសកាត់បន្ថយចំនួនមកមនុស្សព្រោះបញ្ហា ជំងឺកូវីដ-១៩។
 

មកដល់ពេលនេះសរុបការចូលរួមរបស់អ្នកគាំទ្រប្រចាំការប្រកួតព្រឹត្តិការណ៍ Euro ទាំងបុរស និងស្ត្រីមានចំនួន ៥៧៤,៨៧៥នាក់នៅអង់គ្លេស ច្រើនជាង២ដងខុសពីឆ្នាំ ២០១៧ ដែលមានអ្នកទស្សនាត្រឹមប្រមាណ ២៤០,០៥៥ ដែលហូឡង់ជាម្ចាស់ផ្ទះ៕