លោក Dara នឹងជួសជុលឡានបុរាណម៉ាកឡាដា ប្រភេទនីវ៉ាដ៏ទាក់ទាញ ឱ្យអាចបើកបរជាប្រចាំបាន

ជាតិ

រថយន្ត

01, Aug 2022 , 7:59 pm

រូបភាព

ភ្នំពេញ៖ លោក DK Dara ទើបទិញបានរថយន្ត ឡាដា ប្រភេទ នីវ៉ា ម៉ូឌែល ១៦០០ ដែលអាយុប្រហែល៤០ ក្រោយពីតាមអង្វរម្ចាស់មុនរបស់វា អស់ពេលជាច្រើនឆ្នាំ។ លោក លឹម សម្បូរ ជាម្ចាស់ឡានម៉ាកសូវៀត ឡាដា នេះពីមុន។ ដ្បិតតែគាត់ទុកវាចោលលែងប្រើប្រាស់ទៀត ប៉ុន្តែគាត់នៅតែស្រលាញ់យានបុរាណនោះពេកណាស់។ ប៉ុន្តែដោយលោក Dara ទទូចសុំទិញពេក ទើបលោក សម្បូរ ដាច់ចិត្តលក់ ព្រោះគាត់ឃើញថា លោក Dara ក៏ស្រលាញ់ ឡាដា នីវ៉ា នោះណាស់ដែរ។ ក្រោយការព្រមព្រៀងទិញ-លក់ហើយ លោក Dara ជួលរថយន្ដធុនធ្ងន់មួយដើម្បីដឹកឡានពីឆ្នាំ១៩៧៩នោះ ទៅយានដ្ឋានរបស់ខ្លួន នៅរាជធានីភ្នំពេញ។ ដល់ម៉ោងដូរម្ចាស់ លោក សម្បូរ ព្យាយាមមិនហូរទឹកភ្នែក។ នោះគាត់នឹករឭកអនុស្សាវរីយ ដែលរយៈពេលយូរឆ្នាំគាត់ជិះ ឡាដា នីវ៉ា។ មុខឡាននេះ យើងថតរូបមួយម៉ុស្តិ៍ទាំងអស់គ្នា ជាមួយកូនៗរបស់លោក សម្បូរ និងអ្នកបើកបររថយន្ដធុនធ្ងន់ទៀត។

សូមអញ្ជើញទស្សនាវីដេអូខាងក្រោមនេះ៖

ពីដើម រថយន្ដ ឡាដា នីវ៉ា នេះ មានទ្រង់ទ្រាយពណ៌ស ហើយកង់ និងកញ្ចក់ឆ្លុះមិនបានបាញ់ថ្នាំទេ។ លោក សម្បូរ បានទិញវាឆ្នាំ២០០៧ ពីជនបរទេសម្នាក់ ដែលលែងប្រើវា។ លោក សម្បូរ បានជួសជុលវាខ្លះ។ ឡាដា នីវ៉ា នេះ បំពាក់ម៉ាស៊ីនម៉ាកជប៉ុន នីសាន វិញ។ វាខ្ពស់ជាងដើមបន្តិច ក៏ប៉ុន្តែដែកកាងខាងមុខវាទាបជាងដើមវិញ!

រថយន្ដ ឡាដា នីវ៉ា ជំនាន់ទីមួយ មានលេខកូដក្រុមហ៊ុន ВАЗ-2121 ។ ВАЗ គឺឈ្មោះក្រុមហ៊ុន ជាអក្សរកាត់រុស្ស៊ី។ ប្រភេទឡាន នីវ៉ា ជំនាន់ទីមួយ ត្រូវបានផលិតក្នុងរោងចក្រផ្សេងៗ ស្ថិតនៅសហភាពសូវៀត ប្រទេសហ៊្សកដានី ប្រទេសអេក្វាទ័រ ប្រទេសរូម៉ានី ប្រទេសអ៊ុយក្រែន ប្រទេសអេហ្ស៊ីប ប្រទេសអ៊ុយរូហ្គាយ ប្រទេសក្រិក និងប្រទេសកាហ្សាក់ស្ថាន ពីឆ្នាំ១៩៧៧ រហូតដល់ឆ្នាំ១៩៩៦។ ត្រូវបានឈប់ផលិត ឡាដា នីវ៉ា ១៦០០ ត្រឹមឆ្នាំ១៩៩៣។ រហូតមកដល់សព្វថ្ងៃនេះ ឡាដា នៅតែផលិតរថយន្ដប្រភេទ នីវ៉ា តទៀត។ ពីដំបូង រហូតដល់ជំនាន់បច្ចុប្បន្ន (ទី៥) ឡាដា បានផលិតប្រភេទ នីវ៉ា អស់ ពីរលានគ្រឿង។

ក្រុមហ៊ុនរថយន្ដរុស្ស៊ីឈ្មោះ АвтоВАЗ បានបង្កើតឡើងម៉ាក ឡាដា នៅឆ្នាំ១៩៦៦ ហើយក្រុមហ៊ុននេះ បានក្លាយជាកម្មសិទ្ធិរបស់ក្រុមហ៊ុនសម្ព័ន្ធបារាំង RENAULT តាំងពីឆ្នាំ២០១៤មក៕

អត្ថបទទាក់ទង

ឡានម៉ាកឡាដាឆ្នាំ១៩៨០មួយគ្រឿង ត្រូវម្ចាស់ទុកចោលហាលថ្ងៃ ហាលភ្លៀងជាច្រើនឆ្នាំ

លោក ភក្ដី ចំណាយរាប់ពាន់ដុល្លារទិញ ប្រវត្តិ និងអនុស្សាវរីយ៍ នៅលើឡានចាស់មួយគ្រឿង