«រថយន្តចេកដ៏វែងបំផុត» ត្រូវបានប្រើប្រាស់ដើម្បីសកម្មភាពកម្សាន្ត និងសប្បុរសធម៌

រថយន្ត

អន្តរជាតិ

01, Aug 2022 , 8:19 pm

រូបភាព

កាលពីឆ្នាំ២០០៩ លោក Steve Braithwaite ដែលមានកំណើតនៅចក្រភពអង់គ្លេស បានផលិត «រថយន្តចេកដ៏ធំ» (Big Banana Car) តែមួយគត់នៅលើពិភពលោក។ ពីរឆ្នាំក្រោយមក រថយន្តនេះ ក៏ត្រូវបានសៀវភៅកំណត់ត្រា Guinness World Records ទទួលស្គាល់ជាផ្លូវការជារថយន្តចេកដ៏វែងជាងគេលើពិភពលោក។

មានប្រវែង ៦,៩៧ម៉ែត្រ និងកម្ពស់ ៣,០៩ម៉ែត្រ រថយន្តចេក (banana car) ត្រូវបានផលិតឡើងតាមគំរូរថយន្ត pick-up Ford F-150 ឆ្នាំ១៩៩៣ ដោយលោក Steve ចំណាយពេលសរុបអស់៣ឆ្នាំ ហើយបុរសដែលលំនៅដ្ឋានអចិន្ត្រៃយ៍នៅរដ្ឋ Michigan សហរដ្ឋអាម៉េរិក រូបនេះ បានអះអាងថា វាជារថយន្តចេក តែមួយគត់លើពិភពលោក។

រថយន្តចេករបស់លោក Steve មានល្បឿនដល់១៣៦,៧៩គីឡូម៉ែត្រក្នុងមួយម៉ោង ហើយអាចផ្ទុកមនុស្ស៣នាក់អង្គុយនៅពីក្រោយអ្នកបើកបរ និងមានប្រវត្តិបើកបរឆ្លងកាត់ផ្លូវធំៗច្រើននៅ Michigan, Miami (Florida), Houston (Texas), Providence (Rhode Island) ក៏ដូចជាតំបន់ផ្សេងទៀត។

យោងតាមការផ្សាយរបស់ Guinness World Records កាលពីឆ្នាំ២០១១ រថយន្តចេកវែងជាងគេបំផុត (Longest Custom Banana Car) នេះ មានតម្លៃប្រមាណ២៥០០០ដុល្លារអាម៉េរិក ប៉ុន្តែលោក Steve មិនមែនផលិតឡើងសម្រាប់អាជីវកម្មនោះឡើយ។

បច្ចុប្បន្ន ក្រៅពីដំណើរកម្សន្តដើម្បីភាពសប្បាយរីករាយ លោក Steve Braithwaite ប្រើប្រាស់រថយន្តចេករបស់ខ្លួនក្រោមហេតុល្អជាច្រើន ជាពិសេសសកម្មភាពរៃអង្គាសថវិកាសប្បុរសធម៌ រួមទាំងយុទ្ធនាការលើកកម្ពស់ការអានសម្រាប់កុមារ៕