ក្រសួងបរិស្ថាន និងវិស័យឯកជន បានដាំកូនកោងកាងចំនួន ២០០០ដើម នៅសហគមន៍នេសាទត្រញាំងសង្កែ នាថ្ងៃទី៣១ ខែកក្កដា។ រដ្ឋលេខាធិការក្រសួងបរិស្ថានថា ការដាំកូនកោងកាងនេះ គឺដើម្បីបណ្តុះស្មារតីស្រឡាញ់ធនធានធម្មជាតិ ចូលរួមបង្កើតភាពបៃតង បង្កើនភាពសម្បូរបែបនៃជីវៈចម្រុះគ្រប់ប្រភេទ និងធនធានជលផល ជួយការពារបរិស្ថានតំបន់ឆ្នេរ និងជួយទប់ទល់នឹងការប្រែប្រួលអាកាសធាតុ។ 

 

ស្របពេលនេះ បច្ចុប្បន្នដើមកោងកាង ក៏កំពុងប្រឈម នឹងការបាត់បង់ដោយសារតែកត្តាមនុស្ស និងកត្តាធម្មជាតិ ក្នុងនោះ កត្តាមនុស្សនៅតែជាកត្តាសំខាន់ដែលនាំឱ្យមានការបាត់បង់ដើមកោងកាង។ជុំវិញបញ្ហាប្រឈមនេះ លោក នេត្រ ភក្ត្រា បញ្ជាក់ថា ស្ថាប័នមានសមត្ថកិច្ចបានអនុវត្តនីតិវិធីយ៉ាងតឹងរឹងលើជនលើ្មស និងដាក់ចេញនូវវិធានការសេដ្ឋកិច្ច បង្កើតសេដ្ឋកិច្ចមូលដ្ឋាន ដើម្បីកាត់បន្ថយសម្ពាធលើធនធានធម្មជាតិ។

 

លោកបន្ថែមដូច្នេះ៖ «ប្រជាពលរដ្ឋដែលរស់នៅតាមតំបន់ឆ្នេរសមុទ្រ បានពឹងលើព្រៃកោងកាង ដើម្បីប្រកបរបរចិញ្ចឹមជីវិត ដូចជានេសាទជាលក្ខណៈគ្រួសារ ឬនេសាទអាជីវកម្មខ្នាតតូច ឬការទាញផលពីទេសចរណ៍ ធម្មជាតិ»។

 

ជាមួយគ្នានេះ លោក ម៉ាតហ៊ីម ប្រធានសហគមន៍នេសាទត្រពាំងសង្កែ ខេត្តកំពត ឱ្យដឹងថា ការចូលរួមដាំដើមកោងកាងក្នុងសហគមន៍ខ្លួន បានបង្កើតការងារ និងប្រាក់ចំណូលដល់ពលរដ្ឋក្នងសហគមន៍តាមរយៈវិស័យទេសចរណ៍។

 

បើតាមប្រធានសហគមន៍នេសាទរូបនេះតាំងពីឆ្នាំ២០១០ មកសហគមន៍បានដាំដើមកោងកាងបានចំនួនជាង ៦០ម៉ឺនដើម។ខណៈកម្ពុជាមានព្រៃកោងកាងជាង ៥,៦ម៉ឺនហិកតា ស្ថិតក្នុងខេត្តកំពត កែប ព្រះសីហនុនិងកោះកុង៕