ការដឹកជញ្ជូនលើសទម្ងន់កំណត់ ជាបញ្ហាប្រឈមមួយដែលបណ្ដាលឱ្យផ្លូវជនបទឆាប់ខូច បន្ទាប់ពីបញ្ហាបម្រែបម្រួលអាកាសធាតុ។បច្ចុប្បន្នអាជ្ញាធរបានដាក់ចេញនូវយុទ្ធសាស្ត្រមួយចំនួនដូចជាជញ្ជីងថ្លឹងចល័តតាមខេត្តគោលដៅ និង ការធ្វើវិសោធនកម្មច្បាប់ដើម្បីឱ្យក្រសួងអភិវឌ្ឍន៍ជនបទមានសិទ្ធិ ក្នុងការផាកពិន័យដល់អ្នកល្មើសខណៈបច្ចុប្បន្នក្រសួងបានត្រឹម អប់រំដល់ពួកគេប៉ុណ្ណោះ។
បញ្ហាបម្រែមប្រួលអាកាសធាតុ កំពុងជះឥទ្ធិពលអាក្រក់មកលើគុណភាពផ្លូវជនបទស្របពេលដែលការដឹកជញ្ជូនលើសទម្ងន់កំណត់ បណ្ដាលឱ្យផ្លូវជនបទទាំងនោះខូចខាត។ លោក ជ្រុនថេរ៉ាវ៉ាត រដ្ឋលេខាធិការ និងជាអ្នកនាំពាក្យក្រសួងអភិវឌ្ឍន៍ជនបទបានឡើងយ៉ាងដូច្នេះ កាលពីព្រឹកថ្ងៃទី១ ខែសីហា។
ក្នុងសន្និសីទសារព័ត៌មាននៅទីស្តីការគណៈរដ្ឋមន្ត្រី ស្តីពី «សមិទ្ធផលរយៈពេល៥ឆ្នាំរបស់ក្រសួងអភិវឌ្ឍន៍ជនបទ» លោក ជ្រុន ថេរ៉ាវ៉ាត បានផ្តល់ភារៈដល់លោក គង់ ភឿន ប្រធាននាយកដ្ឋានផ្លូវលំជនបទ ធ្វើការពន្យល់លម្អិតទាក់ទងបញ្ហាប្រឈមនានាលើការអនុវត្តច្បាប់លើអ្នកប្រព្រឹត្តខុស។
«(អ្នកបើក)ឡាននៅពេលដែលគាត់ដឹកលើសទម្ងន់ គាត់តែងរកវិធីគេចវាង ដើម្បីឱ្យផុតនៅសមត្ថកិច្ច ដែលដាក់ជញ្ជីងនៅតាមផ្លូវជាតិ និងផ្លូវខេត្ត។ អ៊ីចឹងធ្វើឱ្យប៉ះពាល់យ៉ាងធ្ងន់ធ្ងរដល់ផ្លូវជនបទ»។ នេះជាលើកឡើងរបស់លោក គង់ ភឿន។
ប្រធាននាយកដ្ឋានផ្លូវលំជនបទរូបនេះ ពន្យល់បានពន្យល់ថា កន្លងមកក្រសួងអភិវឌ្ឍន៍ជនបទ បានដាក់ជញ្ជីងថ្លឹងទម្ងន់ចល័ត តាមបណ្ដាខេត្តគោលដៅដូចជា កំពង់ស្ពឺ ត្បូងឃ្មុំ និងកំពង់ឆ្នាំង ដើម្បីចាប់អ្នកល្មើសទាំងនោះ ប៉ុន្តែមន្ត្រីជំនាញក្រសួងបានត្រឹមអប់រំតែពួកគាត់ប៉ុណ្ណោះ ដោយមិនមានសិទ្ធិផាកពិន័យនោះឡើយ។
ត្រង់ចំណុចនេះ ទំនងជាលោក គង់ ភឿន ចង់បង្ហាញថា ការដាក់ជញ្ជីងចល័តតាមខេត្តគោលដៅនេះមិនសូវបានប្រសិទ្ធភាពប៉ុន្មានឡើយ ដោយសារពេលចាប់ជនល្មើសបានក្រសួងបានត្រឹមអប់រំផ្សព្វផ្សាយ ដោយមិនបានធ្វើឱ្យជនទាំងនោះ រាងចាលនោះឡើយ។
ចំពោះដំណោះស្រាយខាងលើនេះ លោកបានបញ្ជាក់ទៀតថា ក្រសួងពាក់ព័ន្ធកំពុងដំណើរនីតិវិធីច្បាប់ ស្នើទៅក្រសួងសាធារណការ និងដឹកជញ្ជូន និងក្រសួងមហាផ្ទៃ ធ្វើវិសោធនកម្មអនុក្រឹត្យ ដើម្បីពិន័យដល់អ្នកល្មើសទាំងនោះ។
លោក គង់ ភឿន ប្រធាននាយកដ្ឋានផ្លូវលំជនបទ នាសន្និសីទសារព័ត៌មាន នៅថ្ងៃទី០១ ខែសីហា ឆ្នាំ២០២២។ រូបភាពពី អង្គភាពអ្នកនាំពាក្យរាជរដ្ឋាភិបាល។
លោកសង្កត់ធ្ងន់ជុំវិញការធ្វើវិសោធនកម្មច្បាប់នេះដូច្នេះ៖ «ប្រសិនបើក្រសួងអភិវឌ្ឍន៍ជនបទទៅចាប់(ជនល្មើស) គឺបានត្រឹមអប់រំទេ! យើងអត់មានផ្នែកខាងទិដ្ឋភាពច្បាប់ក្នុងការពិន័យគាត់ទេ។អ៊ីចឹងបើយើងធ្វើវិសោធនកម្មច្បាប់រួច នោះយើងមានសិទ្ធដូចគ្នា។អ៊ីចឹងយើងសហការគ្នារវាង ក្រសួងសាធារណការ ក្រសួងអភិវឌ្ឍន៍ជនបទ និងក្រសួងមហាផ្ទៃពេលនោះគឺយើងអាចទប់ស្កាត់បានហើយ»។
ក្នុងរយៈពេល៥ឆ្នាំ(២០១៨)មកនេះ ក្រសួងអភិវឌ្ឍន៍ជនបទ បានកសាងហេដ្ឋារចនាសម្ព័ន្ធតភ្ជាប់បណ្ដាញផ្លូវលំជនបទថ្មី ជាង ២ ៨២៧គីឡូម៉ែត្រ (ផ្លូវក្រួសក្រហម ផ្លូវបេតុងផ្លូវក្រាលកៅស៊ូ២ជាន់ DBST ជាដើម), ជួសជុលផ្លូវនិងថែទាំចំនួន ១៧ ០៧០,៨០គីឡូម៉ែត្រនិងសកម្មភាពជួសជុលហេដ្ឋារចនាសម្ព័ន្ធនានាដទៃទៀត ដែលស្ថិតក្រោមសមត្ថកិច្ចក្រសួង៕