តាមរយៈសុន្ទរកថាមួយ នៅថ្ងៃទី១​ ខែសីហា ប្រធានាធិបតីអាម៉េរិក លោកចូ បៃឌិន បានបញ្ជាក់ ពីការវាយប្រហាររបស់កងកម្លាំងអាម៉េរិកនៅទីក្រុងកាប៊ុល អាហ្វហ្កានីស្ថាន និងបានសម្លាប់ មេដឹកនាំក្រុមភេរវកម្មអាល់កៃដា លោក al-Zawahiri។ ប្រតិបត្តិការនេះ ធ្វើឡើងតាមរយៈយន្តហោះដ្រូន។ 

 

«ខ្ញុំបានសម្រេចចុងក្រោយឱ្យ (កងកម្លាំងអាម៉េរិក) ទៅសម្លាប់គេ (លោក al-Zawahiri)»។ លោកបៃឌិនបានលើកឡើងបែបនេះ មុនបន្តថា ការវាយប្រហារនេះ មិនបានបង្កឱ្យមានការខាតបង់ ឬការរងគ្រោះថ្នាក់លើជនស៊ីវិលនោះឡើយ។ លោកបៃឌិនបន្ថែមថា មេដឹកនាំក្រុមភេរវកម្មលែងមានទៀតហើយ ហើយយុត្តិធម៌ក៏រកបានដែរសម្រាប់ជនរងគ្រោះ។

 

ជុំវិញការវាយប្រហារនេះ មន្ត្រីជាន់ខ្ពស់អាម៉េរិកម្នាក់ បានបញ្ជាក់ថា លោក Zawahiri ត្រូវបានសម្លាប់នៅយ៉ខាងមុខផ្ទះនៅទីក្រុងកាប៊ុល តាមរយៈការវាយប្រហារដោយដ្រូន។ មន្ត្រី រូបនោះក៏បានបន្តថា វត្តមានរបស់មេដឹកនាំក្រុមអាល់កៃដា Zawahiri នៅរដ្ឋធានីកាប៊ុលនេះ បង្ហាញច្បាស់ពីការណ៍ដែលក្រុមតាលីបង់ បំពានកិច្ចព្រមព្រៀងដែលបានចុះជាមួយអាម៉េរិកនៅទីក្រុងដូហា ក្នុងឆ្នាំ២០២០​ក្នុងការមិនផ្ដល់ជម្រកឱ្យក្រុមភេរវកម្ម។

 

ការវាយប្រហារនេះជាលើកទីមួយហើយរបស់អាម៉េរិកលើគោលដៅក្រុមអាល់កៃដា ដែល តាំងទីនៅអាហ្វហ្កានស្ថាន តាំងពីពេលដែលអាម៉េរិកបានដកទ័ពចេញពីប្រទេសមួយនេះ កាលពីថ្ងៃទី៣១ ខែសីហាឆ្នាំ២០២១។

 

គួរបញ្ជាក់ថា លោក Zawahiri គឺជាជនជាតិអេហ្ស៊ីបដែលបានធំធាត់ឡើងនៅទីក្រុងគែរ។ លោក បានបន្តតំណែងជាមេដឹកនាំក្រុមអាល់កៃដា បន្ទាប់ពីអតីតមេដឹកនាំំលោក Osama bin Laden ដែលត្រូវបានសម្លាប់ដោយកងកម្លាំងពិសេសអាម៉េរិកនៅប៉ាគីស្ថានក្នុងឆ្នាំ ២០១១។ 

 

Zawahiri ដែលមានវ័យ ៧១ ឆ្នាំបានជួយជ្រោមជ្រែង លោក bin Laden ក្នុងការប្រមូលផ្ដុំក្រុមសកម្ម ប្រយុទ្ធទូទាំងពិភពលោក  ហើយក៏បានធ្វើជាអ្នកដឹកនាំយុទ្ធសាស្ត្រធំៗ ដូចជាការធ្វើមេខ្លោង ក្នុងការចេញប្រតិបត្តិការការវាយប្រហារអគារពាណិជ្ជកម្មពិភពលោកនៅថ្ងៃទី១១ ខែកញ្ញាឆ្នាំ ២០០១ ក្នុងទីក្រុងញ៉ូយកដែលបានបណ្ដាលឱ្យមនុស្សជាង៣ពាន់នាក់បានស្លាប់។ ទន្ទឹមនេះ លោកក៏ជាគ្រូពេទ្យផ្ទាល់ខ្លួនរបស់លោក bin Laden ផងដែរ៕