កីឡាអន្តរជាតិ
អន្តរជាតិ
អាហ្សង់ទីន, ស៊ីលី, អ៊ុយរូហ្គាយ និង ប៉ារ៉ាហ្គាយ រួមគ្នាដេញថ្លៃ World Cup 2030
× អាហ្សង់ទីន ស៊ីលី អ៊ុយរូហ្គាយ និង ប៉ារ៉ាហ្គាយ រួមដៃគ្នាដេញថ្លៃធ្វើជាម្ចាស់ផ្ទះព្រឹត្តិការណ៍កីឡាបាល់ទាត់ពិភពលោក FIFA World Cup 2030។ នេះបើតាម CONMEBOL ថ្ងៃទី២ ខែសីហា។
ប្រសិនបើកិច្ចរួមសហការរបស់ប្រទេសទាំង ៤នៃទ្វីបអាម៉េរិកខាងត្បូង ជោគជ័យក្នុងការដេញថ្លៃធ្វើជាម្ចាស់ផ្ទះ World Cup នោះ ព្រឹត្តិការណ៍កីឡាលំដាប់ពិភពលោកមួយនេះ នឹងបានវិលត្រលប់ទៅប្រទេសអ៊ុយរូហ្គាយ ក្រោយខកខានជាងមួយសតវត្ស។ អ៊ុយរូហ្គាយធ្លាប់ធ្វើជាម្ចាស់ផ្ទះព្រឹត្តិការណ៍ World Cup ដំបូងគេបង្អស់ក្នុងឆ្នាំ ១៩៣០ ចំណែកឯអាហ្សង់ទីនក៏ធ្លាប់ធ្វើម្ចាស់ផ្ទះ World Cup ឆ្នាំ ១៩៧៨ និង ស៊ីលីធ្លាប់ធ្វើម្ចាស់ផ្ទះក្នុងឆ្នាំ ១៩៦២។
«នេះគឺសុបិននៃទ្វីបមួយ! ការប្រកួត World Cup នេះនឹងមានច្រើនលើកតទៀត ប៉ុន្តែការវិលត្រលប់របស់ពានរង្វាន់មួយនេះក្នុងរយៈពេល ១០០ឆ្នាំ គឺមានតែម្តងប៉ុណ្ណោះ ដូច្នេះវាគួរតែវិលត្រលប់មកផ្ទះវិញ។»។ លោក Alejandro Dominguez ប្រធានសហព័ន្ធបាល់ទាត់ទ្វីបអាម៉េរិកខាងត្បូង CONMEBOL និយាយបែបនេះ ក្នុងកម្មវិធីមួយនាកីឡដ្ឋាន Montevideo Centenario។
មិនត្រឹមតែប៉ុណ្ណោះលោក Dominguez ក៏បានបញ្ជាក់បន្ថែមថាគោលបំណង និងហេតុផលដែល FIFA គួរតែទទួលយកការដេញថ្លៃពីប្រទេសទាំង៤ គឺការដេញថ្លៃ World Cup 2030 នេះធ្វើទៅតាមដូចអ្វីដែល World Cup 2026 ដែលមានប្រទេសអាម៉េរិក កាណាដា និងម៉ិកស៊ិកជាសហម្ចាស់ផ្ទះ។
ចំណែកឯប្រធានសហព័ន្ធបាល់ទាត់អ៊ុយរូហ្គាយលោក Ignacio Alonso ក៏បានបង្ហាញចំណាប់អារម្មណ៍របស់លោកប្រាប់អ្នកកាសែតថា៖«World Cup 2030 គឺជាព្រឹត្តិការណ៍តែមួយគត់ដែលនឹងត្រូវធ្វើឡើងនៅប្រទេសដែលធ្លាប់បានរៀបចំការប្រកួតនេះតាំងពីរយៈពេល ១០០ឆ្នាំមុនមក។»។
មកដល់ពេលនេះ ប្រទេសកំពូលៗប្រចាំទ្វីបអាម៉េរិកខាងត្បូងបានបង្ហាញខ្លួន ដាក់ចំណាប់អារម្មណ៍ក្នុងការប្រជែងដេញថ្លៃធ្វើជាម្ចាស់ផ្ទះ World Cup ក្រោយពេលប្រទេសអេស្ប៉ាញ និងព័រទុយហ្គាល់ ដែលបានបង្ហាញចំណាប់អារម្មណ៍ដេញថ្លៃ ធ្វើជាម្ចាស់ផ្ទះព្រឹត្តិការណ៍កីឡាដ៏ធំមួយនេះ កាលពីខែមុន៕
Tag:
CONMEBOL
World Cup 2030
© រក្សាសិទ្ធិដោយ thmeythmey.com