រដ្ឋកាតា សាធារណរដ្ឋក្រិក ព្រះរាជាណាចក្រដាណឺម៉ាក ព្រះរាជាណាចក្រហូឡង់ អេមីរ៉ាតអារ៉ាប់រួម និងរដ្ឋស៊ុលតង់អូម៉ង់​ ជាសមាជិកថ្មីទាំង៦ នៃសន្ធិសញ្ញាមិត្តភាព និងសហប្រតិបត្តិការ (TAC) ។ រដ្ឋមន្រ្តីនៃប្រទេស៦ បានចុះហត្ថលេខាលើលិខិតូបករណ៍ចូលជាសមាជិកនៅថ្ងៃទី៣ ខែសីហា អំឡុងកិច្ចប្រជុំរដ្ឋមន្រ្តីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធនៅរាជធានីភ្នំពេញ។

 

លោក គង់ ភោគ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ និងជាអ្នកនាំពាក្យកិច្ចប្រជុំរដ្ឋមន្រ្តីការបរទេសអាស៊ាន និងកិច្ចប្រជុំពាក់ព័ន្ធ ប្រាប់អ្នកសារព័ត៌មានក្នុងសន្និសីទសារព័ត៌មាននៅល្ងាចនៅថ្ងៃទី៣ ខែសីហា ថា អាស៊ាន ស្វាគមន៍មិត្ត និងដៃគូក្នុងការក្លាយជាសមាជិករបស់ TAC ។ បើតាមលោក គង់ ភោគ ការក្លាយជាសមាជិក TAC នឹងបើកផ្លូវដល់ការក្លាយជាដៃគូជាមួយអាស៊ានផងដែរ។

 

«ក្លាយជាសមាជិក TAC ជាលក្ខខណ្ឌអប្បរមាដើម្បីក្លាយជាដៃគូអាស៊ាន។» អ្នកនាំពាក្យដដែលលើកឡើងបែបនេះ មុនបន្តថា ហត្ថលេខីថ្មី នឹងអនុវត្តតាមគោលការណ៍ និងគុណតម្លៃរបស់សន្ធិសញ្ញា។

 

TAC ត្រូវបានបង្កើតនៅឆ្នាំ១៩៧៦។ សន្ធិសញ្ញានេះ ចែងពីគោលការណ៍សកលនៃការរួមរស់ដោយសន្តិភាព និងកិច្ចសហប្រតិបត្តិការជាមិត្តក្នុងចំណោមរដ្ឋនានានៅអាស៊ីអាគ្នេយ៍ ហើយមានចំណងផ្លូវច្បប់សម្រាប់ទំនាក់ទំនងអន្តររដ្ឋនៅក្នុងតំបន់ និងលើសពីតំបន់ថែម។ សន្ធិសញ្ញានេះ ត្រូវបានកែប្រែប៣លើកដើម្បីបើកផ្លូវឱ្យប្រទេសក្រៅតំបន់ ឬអង្គការតំបន់ដែលមានសមាជិកជារដ្ឋអធិបតេយ្យអាចចូលជាភាគីបាន។

 

សមាជិកអាស៊ានទាំងអស់ សុទ្ធតែជាភាគីនៃសនិ្ធសញ្ញានេះ ដោយកម្ពុជាចូលរួមក្នុងឆ្នាំ១៩៩៥។ អាម៉េរិក ជប៉ុន កូរ៉េខាងត្បូង រុស្ស៊ី និងចិនជាដើម​ ក៏ជាភាគីនៃសនិ្ធសញ្ញានេះដែរ។ សហភាពអឺរ៉ុប ជាអង្គការតំបន់តែមួយគត់ដែលជាសមាជិកនៃសន្ធិសញ្ញា ដោយចូលរួមក្នុងឆ្នាំ២០១២៕