ការឈានជើងចូលកោះតៃវ៉ាន់របស់មន្រ្តីអាម៉េរិកដែលមានតំណែងខ្ពស់ក្នុងរយៈពេល ២៥ ឆ្នាំនេះ បានធ្វើឱ្យទំនាក់ទំនងរវាងក្រុងប៉េកាំង និងក្រុងវ៉ាស៊ីនតោនកាន់តែល្អក់កករមួយកម្រិតទៀត។ បើទោះជារងការព្រមានជាញយៗពីសំណាក់ចិន ប្រធានសភាតំណាងអាម៉េរិក លោកស្រី ណាន់ស៊ី ផេឡូស៊ី អះអាងថា ទស្សនកិច្ចរបស់ខ្លួននៅតៃវ៉ាន់ជាការគាំទ្រប្រជាធិបតេយ្យ។ 

 

ដោយភាពតានតឹងកំពុងកើនឡើង ការិយាល័យប្រធានាធិបតីខាងត្បូង នៅថ្ងៃទី៣ ខែសីហា បានអំពាវនាវឱ្យមានការសន្ទនារវាងប្រទេសមហាអំណាចទាំងពីរ ដើម្បីរក្សាស្ថិរភាព​ និងសន្តិភាពក្នុងតំបន់។ ប្រធានសភាតំណាងអាម៉េរិករំពឹងថានឹងទៅដល់ក្រុងសេអ៊ូលនៅយប់ថ្ងៃទី៣ ខែសីហា។

 

«ជំហររបស់រដ្ឋាភិបាលយើង គឺរក្សាទំនាក់ទំនងជិតស្និទ្ធជាមួយភាគីពាក់ព័ន្ធ… ដោយឈរលើមូលដ្ឋានថាការរក្សាស្ថិរភាព និងសន្តិភាពក្នុងតំបន់តាមរយៈកិច្ចសន្ទនា និងកិច្ចសហប្រតិបត្តិការគឺសំខាន់»។ ការិយាល័យប្រធានាធិបតីកូរ៉េខាងត្បូងប្រាប់អ្នកកាសែតបែបនេះ។

 

ថាតើលោកស្រី ផេឡូស៊ី នឹងជួបជាមួយបុគ្គលណាខ្លះក្នុងទស្សនកិច្ចនៅកូរ៉េខាងត្បូងនេះនៅមិនទាន់ដឹងច្បាស់នៅឡើយ ដោយមានតែការបញ្ជាក់ពីជំនួបជាមួយប្រធានរដ្ឋសភាលោក Kim Jin-pyo មួយរូបប៉ុណ្ណោះ។ ប្រធានាធិបតីកូរ៉េខាងត្បូង យូន សុកយ៉ល ក៏នឹងមិនបានជួបជាមួយលោកស្រីផេឡូស៊ីដែរ ដោយសារតែកំពុងនៅវិស្សមកាល។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។ 

 

ជុំវិញដំណើរទស្សនកិច្ចរបស់ប្រធានតំណាងសភាអាម៉េរិកនៅតៃវ៉ាន់នេះធ្វើឱ្យចិនតឹងសរសៃកជាខ្លាំង 

ដោយរដ្ឋមន្រ្តីការបរទេសចិន លោក​​ វ៉ាង យីហៅអាម៉េរិកថាជាប្រទេសដែលបង្កឱ្យទំនាក់ទំនងទ្វេភាគីល្អក់កករ ហើយបំផ្លាញស្ថិរភាព និងសន្តិភាពនៅច្រកសមុទ្រតៃវ៉ាន់។ 

 

សូមបញ្ជាក់ថា ក្រុងវ៉ាស៊ីនតោនមិនមានទំនាក់ទំនងការទូតផ្លូវការជាមួយក្រុងតៃប៉ិទេ និងតែងអះអាងថា ខ្លួនទទួលស្គាល់គោលការណ៍ចិនតែមួយ៕