អតិផរណានៅកម្ពុជាកើនជាមធ្យមដល់កម្រិត៦,៥ភាគរយ ដែលខ្ពស់ជាងឆមាសទី២ក្នុងឆ្នាំ២០២១ដែលមានត្រឹម ៣,៤ភាគរយ។ ការកើនឡើងនៃអតិផរណាក្នុងឆមាសទី១នៃឆ្នាំ២០២២នេះ គឺដោយសារ កំណើនថ្លៃក្រុមទំនិញនិងសេវាពាក់ព័ន្ធនឹងប្រេងឥន្ធនៈ និងម្ហូបអាហារ។ ប៉ុន្តែកំណើននៃអតិផរណានេះត្រូវបានព្យាករធ្លាក់ចុះមកវិញនៅត្រឹម៣,២ភាគរយ ក្នុងឆមាសទី២។ នេះបើយោងតាមរបាយការណ៍ប្រចាំឆមាសទី១និងទិសដៅការងារឆមាសទី២ ឆ្នាំ២០២២ របស់ធនាគារជាតិនៃកម្ពុជា(NBC)។
ស្ថានភាពអតិផរណានៅកម្ពុជាក្នុងឆមាសទី២ អាចប្រឈមនឹងភាពមិនច្បាស់លាស់ច្រើន ជាចម្បងអាស្រ័យលើស្ថានភាពសង្គ្រាមរុស្សី-អ៊ុយក្រែន និងខ្សែច្រវាក់ផ្គត់ផ្គង់សកល។ ប៉ុន្តែ បើសម្ពាធនៃការឡើងថ្លៃប្រេងឥន្ធនៈអាចគ្រប់គ្រងបានឬត្រូវបានកាត់បន្ថយនោះអតិផរណានៅកម្ពុជា នឹងត្រូវធ្លាក់ចុះ ផងដែរ។ ធនាគារជាតិនៃកម្ពុជា(NBC) បានព្យាករដោយសុទិដ្ឋនិយម ថា អតិផរណានៅកម្ពុជានឹងត្រូវបានធ្លាក់ចុះពី៦,៥ភាគរយក្នុងឆមាសទី១ មកនៅកម្រិតត្រឹម៣,២ភាគរយវិញ នៅក្នុងឆមាសទី២។
NBC បានបញ្ជាក់ថាអតិផរណានៅកម្ពុជាសម្រាប់ឆ្នាំ២០២២ អាចមានកម្រិតជាមធ្យមប្រមាណ ៤,៨ភាគរយ។ បើតាមNBC ការព្យាករនេះត្រូវបានធ្វើឡើងក្រោមការសន្មតនៃនិន្នាការថមថយល្បឿននូវកំណើនថ្លៃក្រុមទំនិញ និងសេវាពាក់ព័ន្ធនឹងប្រេងឥន្ធនៈមកត្រឹម៩,៣ភាគរយ ដោយសារថ្លៃប្រេងឆៅពិភពលោក បានព្យាករធា្លក់ចុះចាប់ពីខែកក្កដា ដល់ចុងឆ្នាំ២០២២ ក្នុងបរិការណ៍ដែលប្រទេសសមាជិកផលិតនាំចេញប្រេង (OPEC)នឹងបង្កើនការផ្គត់ផ្គង់វិញ។
ទន្ទឹមគ្នានេះ កំណើនថ្លៃម្ហូបអាហារនឹងថយល្បឿនមកវិញ២,៥ភាគរយ ស្របពេលខ្សែច្រវាក់ផ្គត់ផ្គង់មានភាពប្រសើរឡើង នៅពេលប្រទេសចិនកាត់បន្ថយការរឹតបន្តឹងលើវិធានការបិទខ្ទប់ និងភាពប្រសើរឡើងនៃទិន្នផលកសិកម្មក្នុងរដូវវស្សា គួបផ្សំនឹងឥទ្ធិពលធ្លាក់ចុះ នៃថ្លៃប្រេងឥន្ធនៈមកវិញ។ NBC បានបញ្ជាក់បន្ថែមនៅក្នុងរបាយការណ៍ប្រចាំឆមាសទី១និងទិសដៅការងារឆមាសទី២ ឆ្នាំ២០២២របស់ខ្លួនថា៖ «អតិផរណាស្នូល អាចនឹងថមថយមកវិញ ២,៦ភាគរយ ដោយសារតម្រូវការក្នុងស្រុកអាចមានល្បឿនយឺតជាងមុន ក្នុងបរិការណ៍ដែលចំណូលមានស្ថិរភាព និងមូលដ្ឋានខ្ពស់ស្រាប់កាលពីគ្រាដូចឆ្នាំមុន»។
ជុំវិញនៃការគ្រប់គ្រងអតិផរណានេះ ក្រៅតែជាភារកិច្ចរបស់ធនាគារនៃកម្ពុជាហើយនោះ ក្រសួងសេដ្ឋកិច្ច និងហិរញ្ញវត្ថុ ក៏ជាស្ថាប័នមួយចូលរួមឃ្លាំងមើលអតិផរណានេះដែរ ដោយអាចចូលរួមចំណែកណាមួយ ដើម្បីដោះស្រាយអតិផរណា តាមរយៈគោលនយោបាយសារពើពន្ធ។ នេះបើតាមលោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ ។
លោក បន្ថែមថា ក្រសួង បានបម្រុងកញ្ចប់ថវិកាមួយចំនួន ដើម្បីបន្តជួយដល់ប្រជាពលរដ្ឋក្រីក្រ មានលទ្ធភាពអាចឆ្លើយតបនឹងស្ថានភាពនៃអតិផរណានេះបានទាន់ពេល។«កិច្ចការនេះយើងបន្តយកចិត្តទុកដាក់សម្រាប់ជួយដល់ពលរដ្ឋ ដែលយើងបន្តតាមដានដោយយើងមានគោលការណ៍មិនទុកចោលនូវពលរដ្ឋណាម្នាក់ ឱ្យរងទុកវេទនាទេ។ អ៊ីចឹង! កិច្ចការទាំងអស់នេះ យើងបានអនុវត្តកន្លងមកក្នុងការដោះស្រាយកូវីដ-១៩ ដែលពលរដ្ឋរងផលប៉ះពាល់ពីកូវីដ»។ នេះជាការលើកឡើងរបស់លោក មាស សុខសេនសាន។
លោក បានបញ្ជាក់ក្នុងសន្និសីទសារព័ត៌មាន ស្ដីពី សមិទ្ធផលសម្រេចបានរយៈពេល៥ឆ្នាំកន្លងមក របស់ក្រសួងសេដ្ឋកិច្ច និងហិរញ្ញវត្ថុ នៅទីស្តីការគណៈរដ្ឋមន្រ្តី នាថ្ងៃទី៣សីហា ឆ្នាំ២០២២ ដូច្នេះ៖ «បើសិនជាក្នុងការវាយតម្លៃ យើងយកBenchmarkនៃកូវីដនេះ[ប្រសិទ្ធភាពនៃការអន្តាគមន៍កូវីដ-១៩ជាចំណុចយោងសម្រាប់ការវាស់វែង] យើងឃើញថា ជារៀងរាល់ខែយើងចាយខ្ទង់៣០ទៅ៣១លានដុល្លារ សម្រាប់ដោះស្រាយប្រជាពលរដ្ឋក្រីក្រ។ អ៊ីចឹង! បើសិនក្នុងករណីដែលវាប៉ះទង្គិចដូចកូវីដ ការ[ចំណាយរបស់យើង]គឺប្រហាក់ប្រហែលប៉ុណ្ណឹង! តែបើសិនធ្ងន់ធ្ងរជាងហ្នឹងទៀតកញ្ចប់ថវិកាវាអាចនឹងឡើងតាមហ្នឹងបន្តទៀត»។
យោងតាមរបាយការណ៍ស្តីពី លទ្ធផលនៃការអនុវត្តថវិកាឆមាសទី១ ឆ្នាំ២០២២ របស់ក្រសួងសេដ្ឋកិច្ច និងហិរញ្ញវត្ថុ រដ្ឋាភិបាលបានផ្ទេរថវិកា១០០លានដុល្លារអាម៉េរិក ដើម្បីអនុវត្តសកម្មភាពការងារហេដ្ឋារចនាសម្ព័ន្ធរូបវ័ន្តដោយដៃតាមមូលដ្ឋាន ជាពិសេសហេដ្ឋារចនាសម្ព័ន្ធស្រោចស្រព ដើម្បីជំរុញកំណើនផលិតស្បៀង និងសន្តិសុខស្បៀង ក្នុងបរិការណ៍នៃការឡើងថ្លៃស្បៀង និងម្ហូបអាហារ៕