ឧត្តមសេនីយ៍ទោ លោក Chang Zone-sung មេបញ្ជាការប្រចាំកោះ Kinmen តៃវ៉ាន់ បានប្រាប់ទីភ្នាក់ងារព័ត៌មាន Reuters នៅថ្ងៃទី៤ ខែសីហាថា ដ្រូនចិនចំនួន ២គ្រឿងបាន ហោះទន្ទឹមគ្នាចូលក្បែរកោះ Kinmen ចំនួនពីរលើក នៅយប់ថ្ងៃទី៣ ខែសីហា។  

 

«ពួកយើងបានបាញ់ភ្លើងភ្លាមៗ ដើម្បីប្រកាសពីការព្រមាន និងតម្រូវការឱ្យពួកគេចាកចេញ។ បន្ទាប់មកពួកគេក៏ចាកចេញទៅវិញ។ លោក Chang អះអាងបែបនេះ រួចបន្តថា ដ្រូនទាំងនោះ បានចូលទៅក្នុងតំបន់ហាមឃាត់ទើបកងកម្លាំងតៃវ៉ាន់សម្រេចគំរាមឱ្យដ្រូនទាំងនោះត្រឡប់ចេញទៅវិញ។

 

លោក Chang បានបន្ថែមថា កងកម្លាំងតៃវ៉ាន់​មាននីតិវិធីប្រតិបត្តិការស្តង់ដារ។ ដូច្នេះកងកម្លាំង នឹងប្រតិកម្មភ្លាមៗប្រសិនបើដ្រូនចិនទាំងនោះចង់ចូលទៅ។ លោកក៏ជឿថាដ្រូនចិនមាន បំណងប្រមូលព័ត៌មាន និងស៊ើបការណ៍ស្តីពីការដាក់ពង្រាយសន្តិសុខរបស់តៃវ៉ាន់នៅក្នុងកោះដាច់ស្រយាលរបស់ខ្លួនមួយនេះ។ កោះ Kinmen ត្រូវបានពង្រឹងឱ្យមានម្លាំងការពារខ្លួនយ៉ាង ​ខ្លាំងដោយសារកោះមួយនេះស្ថិត​នៅ​ក្បែរ​ឆ្នេរ​ភាគ​អាគ្នេយ៍​នៃ​​ចិន ឬក្បែរ​ទីក្រុង Xiamen។

 

យ៉ាងណាមិញ ឧត្តមសេនីយ៍ទោតៃវ៉ាន់រូបនេះ បានបញ្ជាក់ថា ស្ថានការណ៍នៅ Kinmen នៅធម្មតា និងមិនមានអ្វីតានតឹងនោះឡើយ។

 

បន្ថែមពីនេះ នៅថ្ងៃទី៣ ខែសីហាដដែល ក្រសួងការពារជាតិតៃវ៉ាន់បានបញ្ជាក់ថា យន្ត ហោះរបស់ខ្លួនបានហោះព្រមាន ឱ្យយន្តហោះចម្បាំងចិនចំនួន២៧គ្រឿងចេញពីតំបន់ ការពារដែនអាកាសរបស់ខ្លួន។ ក្រសួងក៏បានបន្តថា យន្តហោះ២២គ្រឿងក្នុងចំណោមនោះ បានឆ្លងកាត់ខ្សែបន្ទាត់កណ្តាល ដែលបែងចែករវាងដែនកោះតៃវ៉ាន់ និងចិន ខណៈភាពតានតឹងរវាងភាគីទាំងពីរ បន្តកើនឡើង។ 

 

យន្តហោះចម្បាំងរបស់របបក្រុងប៉េកាំងទាំងនោះរួមមាន យន្តហោះចម្បាំងចិន Su-30 និងយន្ត ហោះចម្បាំង ១១ គ្រឿងផ្សេងទៀត។
 

គួរបញ្ជាក់ថាតៃវ៉ាន់​បាន​បង្កើនការប្រុង​ប្រយ័ត្ន​បន្ថែម ខណៈ​ចិន​ធ្វើ​សមយុទ្ធ​យោធា​ជា​បន្ត បន្ទាប់​ដើម្បី​ឆ្លើយតប​នឹង​ដំណើរ​ទស្សនកិច្ច​​ក្នុង​សប្តាហ៍​នេះ​ដោយ​ប្រធាន​សភា​តំណាង​អាម៉េរិក​ លោកស្រីណាន់ស៊ី ផេឡូស៊ី៕