ទូរទស្សន៍រដ្ឋចិន CCTV នៅថ្ងៃទី៤ ខែសីហា បានផ្សាយថា សមយុទ្ធយោធាបាញ់គ្រាប់ពិតបាន ចាប់ផ្ដើមនៅម៉ោង ១២ ថ្ងៃត្រង់ (ម៉ោងចិន និងតៃវ៉ាន់) ហើយសមយុទ្ធនេះនឹងបន្តរហូតដល់ ម៉ោង ១២ ថ្ងៃត្រង់នៅថ្ងៃទី៧ ខែសីហា។ កងកម្លាំងចិនក៏នឹងរួមបញ្ជូលការបាញ់គ្រាប់ពិតនៅ លើទឹក និងក្នុងអាកាសជុំវិញកោះតៃវ៉ាន់ផងដែរ។

 

មិនទុកយូរ រដ្ឋាភិបាលក្រុងតៃប៉ិ បានប្រតិកម្មភ្លាមៗហើយបានថ្កោលទោសក្រុងប៉េកាំងថា សមយុទ្ធយោធានោះបានបំពានច្បាប់អង្គការសហប្រជាជាតិ ឈ្លានពានដែនដីតៃវ៉ាន់  ព្រមទាំងបង្កជាបញ្ហាប្រឈមដោយផ្ទាល់ចំពោះចរាចរណ៍អាកាស និងការធ្វើនាវាចរក្នុងតំបន់នោះ។

 

បន្ថែមពីនេះ គណបក្ស​វឌ្ឍនភាព​ប្រជាធិបតេយ្យ (DPP) ដែល​កំពុង​កាន់​អំណាចបានរិះគន់ថា សមយុទ្ធយោធាដែលចិនបានលើផ្លូវទឹកនិងផ្លូវអាកាសអន្តរជាតិដ៏មមាញឹកបំផុត ជាអាកប្បកិរិយាមិនទទួលខុសត្រូវ និងខុសច្បាប់។ 

 

ស្របគ្នានេះ អ្នកនាំពាក្យគណៈរដ្ឋមន្ត្រីតៃវ៉ាន់ ដែលបានថ្កោលទោសយ៉ាង ធ្ងន់ធ្ងរចំពោះសមយុទ្ធនេះ បាននិយាយផងដែរថា គេហទំព័ររបស់ក្រសួងការពារជាតិ ក្រសួងការបរទេស និងការិយាល័យប្រធានាធិបតីតៃវ៉ាន់ ត្រូវបានវាយប្រហារដោយពួកលួចទិន្នន័យផងដែរ។

 

យ៉ាងណាមិញ នៅថ្ងៃដដែលនោះជុំវិញការចាប់ផ្ដើមសមយុទ្ធយោធានេះ ក្រុងប៉េកាំង  បញ្ជាក់ថាចំណាត់ការមួយនេះ ជាផ្នែកមួយនៃការដោះស្រាយវិបត្តិផ្ទៃក្នុងតែប៉ុណ្ណោះ។

 

«ការដាក់ទណ្ឌកម្មរបស់យើងចំពោះការគាំទ្រឯករាជ្យភារតៃវ៉ាន់ដោយប្រើប្រាស់កម្លាំងខាងក្រៅ (កម្លាំងយោធា) គឺសមហេតុផល និងស្របច្បាប់»។ ​ការិយាល័យ​កិច្ចការ​តៃវ៉ាន់​ដែល​មាន​មូលដ្ឋាន​នៅ​ទីក្រុង​ប៉េកាំង​បានលើកឡើងបែបនេះ។

 

បច្ចុប្បន្ន យោធារបស់របបក្រុងតៃប៉ិបានបញ្ជាក់នៅថ្ងៃដដែលថា កងកម្លាំងរបស់ខ្លួនកំពុង តាមដានយ៉ាងដិតដល់អំពីសមយុទ្ធរបស់ចិនខាងលើ ហើយកងកម្លាំងតៃវ៉ាន់ក៏បានរៀបចំខ្លួន រួចរាល់សម្រាប់ជម្លោះដែលអាចកើតមានផងដែរ ក៏ប៉ុន្តែនឹងមិនជំរុញឱ្យមានការប៉ះទង្កិចគ្នានោះឡើយ ៕