សម្ដេច ហ៊ុន សែន បាននិយាយថា ការរៀបចំធ្វើជាម្ចាស់ផ្ទះនៃកិច្ចប្រជុំអាស៊ាននេះ វាមិនមែនជារឿងងាយស្រួលឡើយ សម្រាប់កម្ពុជា។ ត្រង់ចំណុចនេះ សម្ដេច និយាយទាំងអស់សំណើចថា គ្រាន់តែបញ្ហាជម្លោះ ដែលបានបង្កឱ្យមានភាពអាកអន់ចិត្តគ្នានោះ ធ្វើឱ្យប្រមុខការទូតអឺរ៉ុបមួយចំនួន មិនចង់ទាំងអង្គុយគ្នាផង នៅក្នុងកិច្ចប្រជុំអាស៊ាន និងដៃគូពាក់ព័ន្ធ។ ដូច្នេះវាត្រូវការយកចិត្តទុកដាក់សម្របសម្រួលខ្លាំង។ 

 

«សូម្បីតែរៀបចំកៅអីអង្គុយក៏ពិបាកដែរ ដោយសារតែមានជម្លោះនៅអឺរ៉ុប មានជម្លោះនៅកន្លែងមួយចំនួន ។ ដូច្នេះរៀបកៅអីអង្គុយជិតគ្នា ក៏គេមិនចង់អង្គុយជិតគ្នា (សម្ដេចនិយាយទាំងអស់សំណើច) ក៏មាន ។ មិនមែនជារឿងងាយស្រួលទេ ហើយការចេញសេចក្តីថ្លែងការណ៍ណា ក៏មិនមែនជារឿងងាយស្រួលដែរ។ ប៉ុន្តែសមត្ថភាពនៃការឆ្លើយតប និងសម្របសម្រួលរបស់កម្ពុជា អាចធ្វើទៅបាន»។ នេះជាការលើកឡើងរបស់ប្រធានអាស៊ាន។
 

តែយ៉ាងណាសម្ដេច ហ៊ុន សែន មើលឃើញថា ការរៀបចំកិច្ចប្រជុំអាស៊ាន និងដៃគូពាក់ព័ន្ធនេះ បានប្រព្រឹត្តទៅដោយរលូនល្អ ដោយសារបណ្ដាមេដឹកនាំថ្នាក់រដ្ឋមន្រ្តីការបរទេស មកចូលរួមប្រជុំផ្ទាល់ លើកលែងតែរដ្ឋមន្រ្តីការបរទេសហ្វីលីពីន ដែលកើតជំងឺកូវីដ-១៩ និងមីយ៉ាន់ម៉ា មិនត្រូវបានអញ្ជើញ។