«នេះជាដំណើរទស្សនកិច្ចលើកដំបូងរបស់ខ្ញុំមកកម្ពុជាក្នុងនាមជារដ្ឋមន្រ្តីការបរទេស ខ្ញុំអាចនិយាយបានថា ខ្ញុំជាប់ចិត្ត និងពិតជារីករាយភាពរួសរាយ និងកក់ក្ដៅរបស់ប្រជាជនកម្ពុជាដែលខ្ញុំមានឱកាសបានជួប។» នេះជាការលើកឡើងរបស់លោក អាន់តូនី ប្លីងខិន រដ្ឋមន្រ្តីការបរទេសទៅកាន់អ្នកសារព័ត៌មាននៅថ្ងៃទី៥ ខែសីហាជុំវិញដំណើរទស្សនកិច្ចនៅកម្ពុជា។

 

លោក ប្លីងខិន មកដល់កម្ពុជាដើម្បីចូលរួមកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធដែលកម្ពុជាធ្វើជាម្ចាស់ផ្ទះ។ លោករដ្ឋមន្រ្តី បានជួបជាមួយសម្ដេចនាយករដ្ឋមន្រ្តី ហ៊ុន សែន និងសមភាគីលោក ប្រាក់ សុខុន ក៏ដូចជាយុវជនកម្ពុជាដែលធ្លាប់ផ្លាស់ប្ដូរទស្សនកិច្ចនៅទឹកដីអាម៉េរិកផងដែរ។

 

បើតាមលោក ប្លីងខិន ក្នុងជំនួបជាមួយមេដឹកនាំកម្ពុជា លោកបានជជែកពីវិធីសាស្រ្តល្អបំផុតសម្រាប់ប្រជាជនកម្ពុជាមានអនាគតត្រចះត្រចង់តាមរយៈការធានាសិទ្ធិតាមបែបប្រជាធិបតេយ្យ ការការពារឯករាជ្យកម្ពុជា និងសេដ្ឋកិច្ចប្រកបដោយបរិយាបន្ន។ 

 

«អាម៉េរិករំពឹងធ្វើឱ្យស៊ីជម្រៅទំនាក់ទំនងជាមួយកម្ពុជាលើវិស័យទាំងនេះ និងផ្នែកផ្សេងទៀត។ យើងរីករាយនឹងទំនាក់ទំនងយូរអង្វែងជាមួយកម្ពុជា។»​ ប្រមុខការទូតអាម៉េរិកបញ្ជាក់បែបនេះ មុនបញ្ជាក់ជាថ្មីថា ទីក្រុងវ៉ាស៊ីនតោនចង់បានទំនាក់ទំនងវិជ្ជមានជាមួយក្រុងភ្នំពេញ។ ប៉ុន្តែលោកសង្កត់ធ្ងន់ថា អ្វីដែលរារាំងទំនាក់ទំនងទ្វេភាគី គឺការធ្លាក់ចុះការគោរពសិទ្ធិមនុស្ស និងការថយក្រោយប្រជាធិបតេយ្យ។

 

លោក ប្លីងខិន ស្នើឱ្យរដ្ឋាភិបាលកម្ពុជាគោរពតាមគោលការណ៍អន្តរជាតិ និងអ្វីដែលចែងក្នុងរដ្ឋធម្មនុញ្ញរបស់ខ្លួន។ មន្រ្តីអាម៉េរិកដដែលក៏បញ្ជាក់ច្បាស់ៗថា អាម៉េរិកមិនផ្ដោតលើបុគ្គលជាក់លាក់ ឬបក្សនយោបាយណាមួយឡើយ តែអាម៉េរិកចង់ឃើញកម្ពុជាមានប្រជាធិបតេយ្យពិតប្រាកដ និងប្រកាន់ផ្លូវពហុបក្សទៀតផង៕​