មជ្ឈមណ្ឌលសម្របសម្រួលរួម (JCC) នៅទីក្រុងអ៊ីស្តង់ប៊ុល ដែលបានបង្កើតឡើងក្រោមកិច្ចព្រមព្រៀងមួយសម្របសម្រួលដោយតួកគី និងអង្គការសហប្រជាជាតិកាលពីខែកក្កដា បានបញ្ជាក់ក្នុងសេចក្តីថ្លែងការណ៍មួយ នៅថ្ងៃទី៤ ខែសីហា ថាខ្លួនបានអនុញ្ញាតអោយកប៉ាលចំនួន ៣គ្រឿងចេញដំណើរហើយ។ កប៉ាល់ពីរដូចជាPolarnet និង Rojen នឹងចាកចេញពីកំពង់ផៃ Chornomorsk ហើយកប៉ាល់ Navi-Star នឹងចាកចេញពីកំពង់ផែ Odesa។ 

 

កប៉ាល Polarnet នឹងចាកចេញទៅកំពង់ផៃ Karasu នៅតួកគីជាមួយបរិមាណពោតចំនួន ១២០០០ តោន ហើយ Rojen នឹងដឹកពោត ១៣០៤១ តោនទៅកាន់កំពង់ផៃ Teesport នៅអង់គ្លេស។ រីឯ កប៉ាល់ Navistar នឹងដឹកពោតចំនួន ៣៣០០០ តោនទៅកាន់កំពង់ផែ Ringaskiddy អៀរឡង់។

 

សេចក្តីថ្លែងការណ៍នេះ ក៏បានបង្ហាញផងថា កប៉ាល់ទាំងនោះត្រូវបានគេរំពឹងថានឹងចេញដំណើរនៅព្រឹកថ្ងៃទី៥ ខែសីហា ប្រសិនបើអាកាសធាតុអំណោយផល។ ការឈប់ដំបូងរបស់កប៉ាល់ទាំងនោះ គឺត្រូវនៅក្នុងដែនទឹកតួកគី សម្រាប់ការត្រួតពិនិត្យដោយមជ្ឈមណ្ឌលសម្របសម្រួលរួម។ នេះបើយោងតាមកិច្ចព្រមព្រៀងដែលសម្របសម្រួលដោយតួកគី និងអង្គការសហប្រជាជាតិ។

 

ការនាំចេញគ្រាប់ធញ្ញជាតិនេះ នឹងជួយកាត់បន្ថយបញ្ហាខ្វះស្បៀងអាហារបានមួយចំនួន រួមទាំងតម្លៃនៅលើទីផ្សារសកលផង។ យ៉ាងណាមិញ គ្រាប់ធញ្ញជាតិជាច្រើនពាន់តោនទៀត នៅតែបន្តជាប់គាំងនៅកំពង់ផែរបស់អ៊ុយក្រែន៕