រដ្ឋមន្ត្រីការបរទេសសិង្ហបុរី លោក Vivian Balakrishnan នៅថ្ងៃទី៦ ខែសីហា បានបង្ហោះសារអបអរសាទរមួយនៅលើគណនីហ្វេសបុករបស់លោកផ្ទាល់ ចំពោះភាពជោគជ័យរបស់កម្ពុជាក្នុងការធ្វើជាម្ចាស់ផ្ទះនៃកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ ខណៈពេលពិភពលោកកំពុងស្ថិតក្នុងពេលវេលាគ្រោះថ្នាក់។ 

 

«យើងកំពុងស្ថិតនៅក្នុងគ្រាដ៏គ្រោះថ្នាក់មួយក្នុងព្រឹត្តិការណ៍ពិភពលោក។ ភាពជោគជ័យនៃកិច្ចប្រជុំកំពូលរដ្ឋមន្ត្រីការបរទេសអាស៊ីបូព៌ាលើកទី១២ និងវេទិកាតំបន់អាស៊ានលើកទី ២៩ គឺជាសក្ខីភាពបង្ហាញថាកិច្ចប្រជុំរបស់អាស៊ានដើរតួសំខាន់រក្សាការបើកទូលាយឱ្យមានការអភិវឌ្ឍក្នុងតំបន់ ការរួមបញ្ចូល និងជំរុញកិច្ចសន្ទនា និងការទូត»។ លោក Vivian លើកឡើងបែបនេះ មុនបង្ហាញពីក្ដីសង្ឃឹមរបស់លោកដែលចង់ឃើញពិភពលោកមួយមានការចូលរួម មានភាពជឿជាក់ និងការខិតខំប្រឹងប្រែងកសាងទំនុកចិត្តឱ្យកាន់តែច្រើន។

 

សូមបញ្ជាក់ថា កិច្ចប្រជុំថ្នាក់រដ្ឋមន្រ្តីការបរទេសអាស៊ានលើកទី៥៥ ធ្វើឡើងស្របពេលមានសង្រ្គាមនៅអ៊ុយក្រែន ភាពតានតឹងនៅច្រកសមុទ្រតៃវ៉ាន់ និងវិបត្តិនយោបាយនៅមីយ៉ាន់ម៉ាជាដើម៕