បន្ទាប់ពីទស្សនកិច្ចរបស់លោកស្រី ណាន់ស៊ី ផេឡូស៊ី ប្រធានសភាតំណាងអាម៉េរិកនៅកោះតៃវ៉ាន់ ភាពតានតឹងរវាងចិន និងអាម៉េរិក កាន់តែរីកធំ ដោយភាគីទាំងពីរតែងចោទគ្នាទៅវិញទៅមក ជុំវិញការបំផ្លាញសន្តិភាព និងស្ថិរភាពនៅច្រកសមុទ្រតៃវ៉ាន់។ ក្នុងអំឡុងទស្សនកិច្ចនៅបង់ក្លាដែស រដ្ឋមន្រ្តីការបរទេស និងជាទីប្រឹក្សារដ្ឋចិន លោកវ៉ាង យី បានបញ្ជាក់ថា ទស្សនកិច្ចរបស់ប្រធានសភាតំណាងអាម៉េរិកនៅកោះតៃវ៉ាន់ បានបង្កកំហុសបី។

 

«អាម៉េរិក បានជ្រៀតជ្រែកកិច្ចការផ្ទៃក្នុងចិន, គាំទ្រកម្លាំងឯករាជ្យតៃវ៉ាន់ និងបំផ្លាញសន្តិភាពឆ្លងច្រកសមុទ្រតៃវ៉ាន់យ៉ាងខ្លាំង»។ លោកវ៉ាង បានសង្កត់ធ្ងន់បែបនេះ ដោយបន្តចោទរដ្ឋាភិបាលក្រុងវ៉ាស៊ីនតោនថា មានការប្តេជ្ញាក្នុងការរៀបចំដំណើរទស្សនកិច្ចរបស់ប្រធានសភាតំណាងនៅតៃវ៉ាន់ បើទោះមានការជូនដំណឹង និងការក្រើនរំឮកជាមុនក្តី។ នេះបើតាមការចុះផ្សាយរបស់ទូរទស្សន៍ចិន CGTN។ 

 

ត្រង់ចំណុចនេះ លោកវ៉ាង បានពន្យល់ថាតៃវ៉ាន់ មិនមែនជាផ្នែកមួយនៃអាម៉េរិកទេ ប៉ុន្តែជាផ្នែកមួយរបស់ចិន ហើយភាគីអាម៉េរិក ក៏បានប្តេជ្ញាគោរពតាមគោលការណ៍ចិនតែមួយដែរ។ 

 

បើតាមលោកវ៉ាង លោកស្រី ផេឡូស៊ី កំពុងគាំទ្រទាំងបើកចំហលើកម្លាំងគាំទ្រឯករាជ្យតៃវ៉ាន់។ ត្រង់ចំណុចនេះ លោកវ៉ាង ដែលជាទីប្រឹក្សារដ្ឋចិនផងនោះ បានចង្អុលដាក់ បក្សគណបក្ស​វឌ្ឍនភាព​ប្រជាធិបតេយ្យ (DPP) របស់លោកស្រី Tsai Ing-wen ដែលបានដាក់ចេញការស្វែងរកឯករាជ្យភាពនៅក្នុងកម្មវិធីនយោបាយរបស់ខ្លួន ហើយព្យាយាមបង្កើតឱ្យមានចិនចំនួនពីរ ក្នុងនោះមាន ចិនដីគោក និងចិនតៃវ៉ាន់។ 

 

បន្ថែមពីនេះ ប្រមុខការទូតចិន បានបន្ថែមថា អាម៉េរិកព្យាយាមបង្កើតល្បិចចាស់តាមរយៈទស្សនកិច្ចរបស់លោកស្រីផេឡូស៊ីនៅតៃវ៉ាន់ ក្នុងគោលបំណងបង្កើនវត្តមានយោធារបស់ខ្លួននៅក្នុងតំបន់។ មិនតែប៉ុណ្ណោះ លោកវ៉ាង បានអះអាងជាថ្មីថា អាម៉េរិកបានប្រើប្រាស់តៃវ៉ាន់ ដើម្បីកៀបសង្កត់ខ្លួន។ 

 

ក្រោយដំណើរទស្សនកិច្ចរបស់ប្រធានសភានៅក្រុងតៃប៉ិ ចិនបានធ្វើសមយុទ្ធយោធានៅជុំវិញកោះតៃវ៉ា​ន់ ដោយមានបាញ់គ្រាប់ពិត មីស៊ីល រួមទាំងសម្ញែងយន្តហោះចម្បាំងរបស់ខ្លួនផង។ លើសពីនេះ ចិនបានផ្អាកទំនាក់ទំនងលើវិស័យចំនួន៨ជាមួយអាម៉េរិក និងដាក់ទណ្ឌកម្មលើលោកស្រី ផេឡូស៊ី និងគ្រួសារថែមទៀត។ 

 

ទាក់ទិនបញ្ហាខាងលើ ប្រមុខការទូតចិន បាននិយាយការពារថា ចំណាត់ការដែលដាក់ចេញដោយក្រុងប៉េកាំង គឺស្របច្បាប់, សមហេតុផល, ចាំបាច់ និងបើកចំហ។ បើតាមលោកវ៉ាង គោលការណ៍មិនជ្រៀតជ្រែកកិច្ចការផ្ទៃក្នុង ជាវិធានដ៏ចាំបាច់នៅក្នុងទំនាក់ទំនងរវាងរដ្ឋ និងរដ្ឋ។​ រដ្ឋមន្រ្តីការបរទេសចិនរូបនេះ ក៏បានអរគុណដល់រដ្ឋផ្សេងទៀត ដែលទទួលស្គាល់គោលនយោបាយចិនតែមួយផង៕