ជាតិ
រថយន្ត
ក្រុងពីរនៅចិនអនុញ្ញាតឲ្យ Baidu បើកសេវាកម្មតាក់ស៊ីគ្មានអ្នកបើក robotaxi Apollo Go ជារថយន្តតាក់ស៊ី robotaxi ដែលនៅមានមនុស្សបញ្ជានៅឡើយ។ រូបថត Baidu
× ក្រុមហ៊ុន Baidu ទទួលបានការអនុញ្ញាតនូវការដាក់ឲ្យដំណើរការសេវារថយន្តតាក់ស៊ី (Robotaxi) ដែលគ្មានមនុស្សបើកនៅក្នុងចំនួន២ គឺក្រុង Chongqing និងក្រុង Wuhan។ នេះបើតាមការផ្សាយរបស់ HT Auto។
Baidu ដែលជាក្រុមហ៊ុនរុករកតាមអ៊ីនធ័រណិត (search engine) របស់ចិន បានលើកឡើងថា ការអភិវឌ្ឍន៍នេះ ជួយពួកគេរួមចំណែកជាមួយគោលនយោបាយរដ្ឋ ក្នុងការលើកកម្ពស់ឧស្សាហកម្មយានយន្តស្វ័យប្រវត្តិ។
បើតាមលោក Wei Dong ប្រធានទទួលបន្ទុកប្រតិបត្តិការសុវត្ថិភាពផ្នែកបើកបរឆ្លាតវៃរបស់ Baidu ការអនុញ្ញាតនេះ ជាសញ្ញាណដ៏វិជ្ជមានមួយ។ លោកប្រាប់រ៉យទ័រថា៖ «ប្រសិនបើយើងគិតថានេះជាការរុករកឋានអវកាស សកម្មភាពរបស់យើងក៏ស្មើនឹងការឈានទៅចុះចតនៅឋានព្រះចន្ទយ៉ាងដូច្នោះដែរ»។
តាមគម្រោងបឋម Baidu នឹងបំពាក់ស្ថានីយ៍បញ្ជូនចរន្ត នៅ៥ទីតាំងសម្រាប់ក្រុងនីមួយៗ ដែលអាចប្រតិបត្តិការពីម៉ោង៩ព្រឹកដល់ម៉ោង៥ល្ងាច សម្រាប់ក្រុងវូហាន រីឯពីម៉ោង៩កន្លះព្រឹក ដល់ម៉ោង៤កន្លះល្ងាច សម្រាប់ក្រុង Chongqing។
ទោះបីជាយ៉ាងណាក៏ដោយ ទំហំនៃការធ្វើចរាចរណ៍បានតែក្នុងរង្វង់ពី១៣ ទៅ៣០គីឡូម៉ែត្រប៉ុណ្ណោះ ពោលគឺស្ថិតក្នុងតំបន់ដែល Baidu អាចគ្រប់គ្រងបច្ចេកទេសបាន។
បន្ទាប់ពីទទួលបានភ្លើងខៀវសម្រាប់ក្រុង Chongqing និង Wuhan ក្រុមហ៊ុន Badu ក៏កំពុងពិភាក្សាជាមួយរដ្ឋបាលមូលដ្ឋាននៃក្រុងប៉េកាំង, សៀងហៃ និង Shenzhen ផងដែរ ដើម្បីទទួលបានអាជ្ញាបណ្ណ១ឆ្នាំលើការដាក់ដំណើរការសាកល្បងរថយន្តតាក់ស៊ី robotaxis ដែលគ្មានមនុស្សបើកនេះ។
កាលពីខែមករា ក្រុមហ៊ុន Cruise បានទទួលអាជ្ញាបណ្ណពីគណៈកម្មការជំនាញរដ្ឋកាលីហ្វនីញ៉ា លើដំណើររថយន្តគ្មានអ្នកបើក នៅបណ្តាផ្លូវមួយចំនួនក្នុងក្រុងសាន់ហ្វ្រាន់ស៊ីស្កូ។ ជាមួយគ្នានេះ រថយន្តស្វ័យប្រវត្តិ Apollo Go robotaxi របស់ Baidu ក៏បានប្រតិបត្តិការសេវាកម្មនៅក្រុងចំនួន១០ទូទាំងប្រទេសចិនចាប់ពីឆ្នាំ២០២០មកផងដែរ៕
© រក្សាសិទ្ធិដោយ thmeythmey.com