សារព័ត៌មាន Asahi Shimbun បាន​រាយការណ៍ថា កាលពី​ចុងខែមិថុនា កំពង់ផែ Vladivostok របស់រុស្ស៊ី មាន​រថយន្ត​ថ្មី និងរថយន្តមួយទឹកជាច្រើនគ្រឿង ពីជប៉ុន និង​កូរ៉េខាងត្បូង ដោយ​ភាគច្រើនជាប្រភេទ SUVs, Minivans និង​រថយន្តទំនើប Luxury។

 

លោក Viktor Lutsyk អ្នក​ទទួល​ខុសត្រូវម្នាក់ប្រចាំកំពង់ផែ បាន​និយាយថា កំពង់ផែ​មិនមាន​ចំណត​ទូលាយ បន្ទាប់ពីមាន​ការនាំចូលយ៉ាង​គំហុកនូវរថយន្តមួយទឹកពីជប៉ុន និង​ប្រទេសមួយចំនួនទៀត។

 

អ្នក​បម្រើ​ការនៅក្រុមហ៊ុន​ដឹកជញ្ជូនមួយរូប​បាន​និយាយថា រថយន្តមួយទឹក​យ៉ាងហោច​ណាស់២០០០គ្រឿង ត្រូវបាន​ដឹកពីជប៉ុន​ជារៀងរាល់ខែ តាមផែ Vladivostok ហើយ​ក្រុម​ហ៊ុន​សម្រេច​ផ្អាក​ការបញ្ជាទិញដោយសារ​កំណើន​រថយន្តកាន់តែច្រើន។

 

រីឯលោក Dmitriy Zabora អគ្គនាយកក្រុមហ៊ុន​នាំចូលរថយន្ត Carwin Plc បានអះអាងថា ជារៀងរាល់ខែ រថយន្តមួយទឹក​ប្រមាណ​១៧០០០ ទៅ១៨០០០​គ្រឿង ពីជប៉ុន ត្រូវនាំចូល​កាន់ប្រទេស​រុស្ស៊ីទាំងមូល​។

 

Asahi Shimbun បាន​រាយការណ៍ថា បច្ចុប្បន្ន រថយន្ត​ប្រមាណពី​៤០០០ទៅ​៥០០០គ្រឿង ត្រូវបាន​បញ្ជាទិញ និង​រង់​ចាំការ​ដឹកចេញពី​ជប៉ុន។ បញ្ហាដែល​ធំនោះ គឺ​សេវាកម្ម​ពី​ Yokohama និង Kobe ទៅ​កាន់ផែ​រុស្ស៊ី មានការរអាក់រអួល​ ដោយសារ​តែ​ទណ្ឌកម្ម​សេដ្ឋកិច្ច​ប្រឆាំងនឹងប្រទេសមួយនេះ។

 

របាយការណ៍​បង្ហាញ​ផងដែរថា រថយន្តមួយទឹក​ពី​ជប៉ុន មានតម្លៃថោក ជាពិសេសអំណោយផលលើ​ការ​ទូទាត់សាច់​ប្រាក់យ៉េន និង​​រូប្លិ៍របស់​រុស្ស៊ី។ មុន​ជម្លោះរុស្ស៊ី-អ៊ុយក្រែន ១រូប្លិ៍ស្មើ​ប្រមាណ១,៥យ៉េន ហើយ​បន្ត​មក​ធ្លាក់​ចុះតិចជាង​០,៩យ៉េន៕