បើតាមលោក ស៊ុយ សេរិទ្ធ អភិបាលរាជធានីភ្នំពេញ ទីតាំងខាងលើមិនអនុវត្តតាមការណែនាំ ដោយធ្វើឲ្យដីខ្សាច់ហូរហៀរលើទ្រូងផ្លូវ ពិបាកការធ្វើដំណើរបង្កឱ្យមានគ្រោះថ្នាក់ចរាចរណ៍ និងបណ្តាលឱ្យខូចខាតហេដ្ឋារចនាសម្ព័ន្ធមួយចំនួនថែមទៀត ដូចជាខូចខាតផ្លូវ ប្រព័ន្ធលូ ជាដើម។

 

 

លោកអភិបាលរាជធានី បានអះអាងថា អាជ្ញាធរមិនទុកឲ្យដេប៉ូខ្សាច់ទាំងនោះ បំផ្លាញហេដ្ឋារចនាសម្ព័ន្ធទៀតឡើត ហើយរាល់រចនាសម្ព័ន្ធ ដែលខូចខាតដូចជាលូ ផ្លូវ នៅលើផ្លូវជាតិលេខ២ ផ្លូវ៦០ម៉ែត្រនិងផ្លូវ ៣០ ម៉ែត្រ ម្ចាស់ដេប៉ូខ្សាច់ខាងលើត្រូវតែកើបដីខ្សាច់ចេញពីថ្នល់និងធ្វើការជួសជុលឡើងវិញទាំងលូនិងផ្លូវ។

 

វិទ្យុជាតិកម្ពុជា បានផ្សាយឲ្យដឹងថា បណ្តោយផ្លូវជាតិលេខ២នេះ មានទីតាំងដេប៉ូខ្សាច់ចំនួន៦ ហើយ៤ទីតាំងត្រូវបានបិទទាំងស្រុងនោះ ត្រូវបានអាជ្ញាធរណែនាំច្រើនលើកហើយដូចជាការណែនាំឲ្យមានម៉ាស៊ីនលេងកង់រថយន្ត និងដឹកខ្សាច់នៅពេលយប់ ប៉ុន្តែនៅតែអនុវត្តមិនបានល្អ ទើបឈានដល់ការសម្រេចបិទទាំងស្រុង៕