អន្តរជាតិ
រដ្ឋមន្ត្រីការបរទេសកូរ៉េខាងត្បូង ទៅចិនដើម្បីជម្រះមន្ទិលក្នុងទំនាក់ទំនងទ្វេភាគី រដ្ឋមន្រ្តីការបរទេសចិន និងកូរ៉េខាងត្បូងចាប់គ្នាមុនជំនួបនៅឥណ្ឌូណេស៊ី។ រូបថតក្រសួងការបរទេសចិន
× រដ្ឋមន្ត្រីការបរទេសកូរ៉េខាងត្បូង ផាក ជីន ទៅទស្សនកិច្ចលើកដំបូងនៅចិននាថ្ងៃទី៨ ខែសីហា ខណៈរដ្ឋាភិបាលកូរ៉េខាងត្បូងចង់ជម្រះមន្ទិលមួយចំនួនក្នុងទំនាក់ទំនងទ្វេភាគី និងជំរុញកិច្ចសហប្រតិបត្តិការជាមួយក្រុងប៉េកាំង។ កូរ៉េខាងត្បូងចង់ស្ដារទំនាក់ទំនងការទូតជាមួយចិន បើទោះខ្លួនជាសម្ពន្ធមិត្តរឹងមាំជាមួយអាម៉េរិក។
ក្នុងទស្សនកិច្ចបីថ្ងៃនៅចិនដែលចាប់ផ្ដើមពីថ្ងៃទី៨ ខែសីហា ប្រមុខការទូតកូរ៉េខាងត្បូង លោក ផាក ជីន ត្រូវជួបពិភាក្សាជាមួយរដ្ឋមន្ត្រីការបរទេសចិន វ៉ាង យី នៅទីក្រុងកំពង់ផែឈីងតាវ។ លោក ផាក ជាមន្ត្រីជាន់ខ្ពស់ដំបូងគេដែលបានធ្វើទស្សនកិច្ចទៅចិនចាប់តាំងពីប្រធានាធិបតីថ្មីរបស់កូរ៉េខាងត្បូង យូន សុកយ៉ល ចូលកាន់តំណែងកាលពីខែឧសភា។
បើតាមទីភ្នាក់ងារព័ត៌មាន Reuters ដំណើរទស្សនកិច្ចរបស់រដ្ឋមន្ត្រីការបរទេសកូរ៉េខាងត្បូង នៅចិននេះធ្វើឡើងដើម្បីកាត់បន្ថយបញ្ហាយល់ច្រលំរវាងគ្នាមួយចំនួន និងជំរុញកិច្ចសហប្រតិបត្តិការក្នុងវិស័យនានារួមទាំងពាណិជ្ជកម្ម សុខភាព និងបរិស្ថាន។ លោក ផាក នឹងជួបប្រមុខការទូតចិននៅថ្ងៃទី៩ ខែសីហា។
«តាមរយៈកិច្ចពិភាក្សាកម្រិតខ្ពស់បែបយុទ្ធសាស្ត្រ យើងអាចយល់ពីគ្នាទៅវិញទៅមកកាន់តែច្បាស់ អាចកាត់បន្ថយការយល់ច្រឡំដែលមិនចាំបាច់ និងពង្រីកផលប្រយោជន៍រួម»។ លោក ផាក បានអះអាងបែបនេះក្នុងសន្និសីទសារព័ត៌មានមួយមុនចាកចេញពីសេអ៊ូល។
ជំនួបទីក្រុងឈីងតាវធ្វើឡើងក្រោយរដ្ឋាភិបាលក្រុងប៉េកាំងព្រមានកូរ៉េខាងត្បូងពីការចូលជាសមាជិកវេទិកាសេដ្ឋកិច្ចនៅអាស៊ីគាំទ្រដោយអាម៉េរិក ដែលត្រូវបានគេជឿថា ជាវេទិកាមានគោលបំណងប្រឆាំងនឹងការកើនឡើងនៃឥទ្ធិពលរបស់ទីក្រុងប៉េកាំងតាមរយៈខ្សែច្រវាក់ផ្គត់ផ្គង់ពិភពលោក។
ឯរដ្ឋបាលកូរ៉េខាងត្បូងរបស់លោក យូន ក៏ប្រកាន់ជំហរប្រឆាំងបំណងចិនដែលជំរុញឱ្យកូរ៉េខាងត្បូងបន្តប្រកាន់គោលនយោបាយ «បីមិន» របស់រដ្ឋាភិបាលចាស់មានមិនដាក់ពង្រាយប្រព័ន្ធការពារមីស៊ីល (THAAD) បន្ថែម និងមិនចូលរួមប្រព័ន្ធការពារមីស៊ីលក្នុងតំបន់ដែលដឹកនាំដោយអាម៉េរិក ហើយមិនមានសម្ព័ន្ធភាពត្រីភាគីជាមួយអាម៉េរិក និងជប៉ុន។
យ៉ាងណាមិញ ប៉ុន្មានម៉ោងមុនការចាកចេញរបស់ លោក ផាក ទៅចិន រដ្ឋាភិបាលកូរ៉េខាងត្បូងបានសម្រេចចិត្តចូលរួមក្នុងសម្ព័ន្ធភាពបន្ទះឈីបដឹកនាំដោយអាម៉េរិក (Chip 4) ហើយមានជប៉ុន និងតៃវ៉ាន់ចូលរួមផងដែរ។ យ៉ាងណាមិញ ចិនប្រឆាំងដាច់ខាតជាមួយកូរ៉េខាងត្បូងដែលចូលរួមក្រុមសម្ព័ន្ធមិត្តនេះ៕
© រក្សាសិទ្ធិដោយ thmeythmey.com