អន្តរជាតិ
ចិនប្រកាសធ្វើសមយុទ្ធយោធាជាថ្មីជុំវិញកោះតៃវ៉ាន់ ខណៈក្រុងតៃប៉ិធ្វើសមយុទ្ធបាញ់គ្រាប់ពិត
09, Aug 2022 , 9:59 am        
រូបភាព
មួយថ្ងៃក្រោយគ្រោងបញ្ចប់សមយុទ្ធដ៏ធំបំផុតក្នុងការតវ៉ាប្រឆាំងនឹងដំណើរទស្សនកិច្ចប្រធាន​សភាតំណាងអាម៉េរិក ណាន់ស៊ី ផេឡូស៊ី យោធាចិននៅថ្ងៃទី៨ ខែសីហា បានប្រកាសពីការធ្វើ​សមយុទ្ធ​យោធាជាថ្មីម្ដងទៀតនៅក្បែរសមុទ្រ និងដែនអាកាសកោះតៃវ៉ាន់។ ស្របពេលជាមួយគ្នានេះ ក្រុង​តៃប៉ិ​ក៏បានប្រកាសថា យោធារបស់ខ្លួន ចាប់ផ្ដើមធ្វើសមយុទ្ធបាញ់គ្រាប់ពិតនៅ​ក្នុងសប្ដា​ហ៍នេះ​នៅ​ភាគ​ខាង​ត្បូងប្រទេស។

 
បើតាមការប្រកាសរបស់ទីបញ្ជាការយោធាភូមិភាគខាងកើតរបស់ចិន ការធ្វើសមយុទ្ធយោធាជាថ្មី ផ្ដោតលើប្រតិបត្តិការប្រឆាំងនឹងនាវាមុជទឹក និងការវាយប្រហារតាមសមុទ្រ។ សមយុទ្ធនេះក៏នឹងត្រូវ ធ្វើឡើងនៅតំបន់ជុំវិញដែនទឹក និងដែនអាកាសតៃវ៉ាន់ផងដែរ ដែលការណ៍នេះត្រូវមើលឃើញថា ជា​ការបន្តរក្សាដាក់សម្ពាធលើក្រុងតៃប៉ិបន្ថែមទៀត។
 
ទាក់ទងសមយុទ្ធនេះ នៅថ្ងៃទី៨ ខែសីហា អ្នកនាំពាក្យក្រសួងការបរទេសចិនលោក Wang Wenbin  បានបញ្ជាក់ថា សមយុទ្ធយោធាដែលបានធ្វើឡើងកាលពីសប្ដាហ៍មុនជុំវិញកោះតៃវ៉ាន់គឺជាការ ធ្វើ​សមយុទ្ធធម្មតាមួយក្នុងទឹកដីរបស់ខ្លួនដែលប្រកបដោយការបើកចំហ តម្លាភាព និងវិជ្ជាជីវៈ។ លោក Wang ក៏សង្កត់ធ្ងន់ថា កោះតៃវ៉ាន់គឺជាផ្នែកមួយរបស់ចិន ហើយការធ្វើសមយុទ្ធនេះ ស្រប​តាម​ច្បាប់​ក្នុងស្រុក និងអន្តរជាតិ។
 
ខណៈដែលចិនបន្តសម្ញែងអានុភាពយោធា តៃវ៉ាន់ឯណោះក៏មិនស្ងៀមដែរ។ នៅថ្ងៃទី៩ ខែសីហា យោធាតៃវ៉ាន់ ក៏ធ្វើសមយុទ្ធបាញ់គ្រាបពិតក្នុងសេណារីយ៉ូការពារខ្លួនប្រឆាំងការឈ្លានពាន។ នេះបើ​តាមទីភ្នាក់ងារព័ត៌មាន AFP ។ មន្ត្រីយោធាតៃវ៉ាន់អះអាងថា កងកម្លាំង​តៃប៉ិនឹងធ្វើ​សមយុទ្ធ​ប្រឆាំងការឡើងគោកនៅតំបន់ភាគខាងត្បូង Pingtung នៅថ្ងៃទី៩ និង​ថ្ងៃទី១១ ខែសីហា។
 
សមយុទ្ធរបស់តៃវ៉ាន់ នឹងរួមមានទ័ពរាប់រយនាក់ និងការប្រើប្រាស់កាំភ្លើងធំ howitzer ចំនួន ៤០ គ្រឿង។ បើតាមមន្រ្តីតៃវ៉ាន់ សមយុទ្ធមួយនេះ ត្រូវបានគ្រោងទុកធ្វើយូរមកហើយ ហើយ នេះមិ​ន​មែន​ជាការឆ្លើយតបនឹងសមយុទ្ធយោធារបស់ក្រុងប៉េកាំងនោះទេ។
 
គួរបញ្ជាក់ថា ដំណើរទស្សនកិច្ចរបស់លោកស្រី ផេឡូស៊ី បានបង្កភាពតានតឹងយ៉ាងខ្លាំងរវាងក្រុងតៃប៉ិ និងក្រុងប៉េកាំងដល់កម្រិតមួយដែលគួរឱ្យបារម្ភ។ អំឡុងសមយុទ្ធយោធាជុំវិញកោះតៃវ៉ាន់កាល​ពី​សប្ដាហ៍មុន ចិនបានសាកល្បងបាញ់មីស៊ីលរយៈចម្ងាយខ្លីចំនួន១១ដើម ហើយក៏មាន​ការសាកល្បង​យន្តហោះចម្បាំង ដ្រូន និងនាវាចម្បាំងដ៏សម្បើមផងដែរ៕
 

Tag:
 ចិន
  តៃវ៉ាន់
© រក្សាសិទ្ធិដោយ thmeythmey.com