ផ្នែកមួយចំនួននៅទីក្រុងសេអ៊ូល ទីក្រុង Incheon និងខេត្ត Gyeonggi ដែលស្ថិត​នៅជិត​ទីក្រុង​សេអ៊ូល ត្រូវបានរងភ្លៀងធ្លាក់ខ្លាំងក្នុងយប់ថ្ងៃទី៨ ខែសីហា។ កម្រិតទឹកភ្លៀងធ្លាក់មានប្រមាណ១០០ មីលីម៉ែត្រក្នុងមួយម៉ោង។ សង្កាត់ Dongjak ដែលស្ថិតនៅក្រុងស៊េអូលមានភ្លៀងធ្លាក់រហូតលើសពី ១៤១,៥មីលីម៉ែត្រក្នុងមួយម៉ោងឯណោះ។ នេះជាការការធ្លាក់ភ្លៀងជោគជាំ​លើកទីមួយ​ហើយ​តាំង​ពី​ឆ្នាំ១៩៤២។

 

​គិតត្រឹមម៉ោង៦ព្រឹកនៅកូរ៉េខាងត្បូង ការធ្លាក់ភ្លៀងធ្លាក់នេះ បណ្ដាលឱ្យមនុស្សចំនួន៥នាក់ បានស្លាប់ និង៤នាក់បានបាត់ខ្លួននៅទីក្រុងស៊េអូល ខណៈនៅខេត្ត Gyeonggi មនុស្ស២នាក់ បានស្លាប់ និង​២​នាក់ផ្សេងទៀតកំពុងបាត់ខ្លួន ហើយមនុស្ស៩នាក់ទៀតបានរងរបួស។ នៅសេអ៊ូល ប្រជាជន១០៧​គ្រួសារ ត្រូវជម្លៀសទៅជ្រកកោននៅតាមសាលារៀន និងកន្លែងសាធារណៈផ្សេងៗ។ ក្រុមអគ្គិភ័យ ក៏​បានជួយសង្គ្រោះមនុស្សចំនួន៨៨នាក់ពីទឹកជន់លិចក្នុងទីក្រុង Gyeonggi និងតំបន់​ផ្សេង​ទៀត។

 

ជាមួយកម្រិតភ្លៀងធ្លាក់ខ្លាំង ទឹកភ្លៀងក៏បានជន់លិច​ផ្ទះសម្បែងមួយចំនួន, យាន្តជំនិះ, អគារ និង​ស្ថានីយ៍រថភ្លើងក្រោមដី។ ទីតាំងសាធារណៈជាច្រើនបានផ្អាកដំណើរការដូចជាផ្លូវរថភ្លើងចំនួន៨ កន្លែងក្នុងទីក្រុងសេអ៊ូល ក្រុងIncheon និងកន្លែងផ្សេងទៀត។ ក្រសួង​មហាផ្ទៃកូរ៉េខាងត្បូងក៏​បាន​ដំឡើង​កម្រិតហានិភ័យនៃភ្លៀងធ្លាក់នេះពីការ​ប្រកាស​អាសន្នទៅជាស្ថានការណ៍ធ្ងន់ធ្ងរនៅ​ម៉ោង១ ព្រឹក​ថ្ងៃ​ទី៩ ខែសីហា។

 

ត្រឹមម៉ោង៦ព្រឹក តំបន់ភាគកណ្តាល និងតំបន់ផ្សេងទៀតរបស់ប្រទេស កំពុងមានភ្លៀងធ្លាក់រហូតដល់​៥០មីលីម៉ែត្រក្នុងមួយម៉ោង៕