ប្រធានសមាគមអ្នកផលិតចំណីអាហារនៅកម្ពុជា លោក មៀវ សុខទ្រី កំពុងពង្រឹងគុណភាពចំណីអាហារវេចខ្ចប់ តាមរយៈវិធានការរបស់ក្រសួងឧស្សាហកម្ម ទៅលើស្តង់ដារម្ហូបអាហារ ស្តង់ដារវេចខ្ចប់ ចំណីអាហារប្រកបដោយលក្ខណៈបច្ចេកទេស។ ម្យ៉ាងទៀតសមាគមមួយនេះ ក៏មានការបណ្តុះបណ្តាល ពង្រឹងសមត្ថភាពសមាជិកខ្លួន។

ជាពិសេសការចូលរួមចែករំលែកពីសហគ្រិនមានបទពិសោធន៍ច្រើន ទៅកាន់អ្នកដែលមានបទពិសោធន៍តិចតួច ដើម្បីបំពេញបន្ថែម ឱ្យដំណើរការផលិតចំណីអាហារវេចខ្ចប់កាន់តែមានភាពប្រសើឡើង ស្របតាមគុណភាពចំណីអាហារលើពិភពលោកផងដែរ។ 

 

«ដូច្នេះហើយយើងអាចនិយាយបានថា ទំនុកចិត្តកាន់តែច្រើនឡើងៗ នេះគឺជាបេសកកម្មរបស់សមាគមផងដែរ ដែលតែងតែផ្តល់ការបណ្តុះបណ្តាល លើកទឹកចិត្ត ជួយជ្រោមជ្រែង ស្វែងរកទីផ្សារ មិនថាតែនៅភ្នំពេញ ឬ តាមបណ្តាខេត្តឡើយ»។ នេះជាការរៀបរាប់របស់លោក មៀវ សុខទ្រី។

 

 

 

បុរសមាឌមាំរូបនេះ បន្ថែមប្រាប់សារព័ត៌មានថ្មីៗថា ចំណីអាហារនាំចេញ-នាំចូលកម្ពុជា នាពេលបច្ចុប្បន្ននេះ អាចប្រកួតប្រជែងក្នុងទីផ្សារអាស៊ានប្រសើរច្រើន បើធៀបនឹង៥ឆ្នាំមុន។ « គោលដៅរបស់យើង យើងនាំគ្នាផលិតឱ្យបានល្អ គឺយើងអាចមានឱកាសនាំចេញទៅក្រៅបានកាន់តែច្រើន។ អ៊ីចឹងហើយ យើងកំពុងតែសំណូមពរទៅដល់អង្កការផ្សេងៗ ទៅដល់រាជរដ្ឋាភិបាលមេត្តាជួយជ្រោមជ្រែងសមាគមអ្នកផលិតចំណីអាហារកម្ពុជា ដើម្បីមានសមត្ថភាព លទ្ធភាពជាងនេះ»។

ទាំងនេះ ជាការបញ្ជាក់របស់លោក មៀវ សុខទ្រី ប្រធានសមាគមអ្នកផលិតចំណីអាហារនៅកម្ពុជា។

 

ទន្ទឹមនឹងការខិតខំប្រឹងប្រែងរបស់សមាគមខាងលើ ប្រធានសមាគមរូបនេះ ក៏បានលើកពីឧបសគ្គខ្លះ រួមមាន ការចុះអនុស្សារណៈយោគយល់នាំចេញ -នាំចូលជាមួយដៃគូ, ផលិតផលរវាងភាគីកម្ពុជាជាមួយបណ្តាប្រទេសនៅក្នុងទីផ្សារអាស៊ានហាក់មិនទាន់មានភាពទូលំទូលាយនៅឡើយ។ 

 

កន្លងមកក្រៅពីទីផ្សារអាស៊ាន កម្ពុជាបាននាំចេញទំនិញផលិតផលចំណីអាហារវេចខ្ចប់របស់ខ្លួន រួមទាំងផ្លែឈើទៅកាន់ទីផ្សារប្រទេសមួយចំនួនដូចជា ចិន ជប៉ុន និងកូរ៉េខាងត្បូងជាដើម។ រីឯទីផ្សារនៅក្នុងបណ្តាប្រទេសអាស៊ាន ដែលផលិតផលចំណីអាហារវេចខ្ចប់របស់កម្ពុជាបានទៅដល់ ហើយឋិតក្នុងកម្រិតតិតួចនៅឡើយនោះគឺ ប្រទេសសិង្ហបូរី ថៃ វៀតណាម និងឡាវផងដែរ។

 

« ចំពោះផលិតផលយើងចូលទៅទីផ្សារអាស៊ាន ផលិតផលស្វាយក្រៀមរបស់យើង ដែលប្រទេសសិង្ហបូរីចូលចិត្តមែនទែន ហើយអាស៊ានបូកបី មានចិន ជប៉ុន កូរ៉េ ជាទីផ្សារធំ ដែលយើងមិនអាចរំលងបាន ហើយជាពិសេសផលិតផលកែច្នៃត្រីរបស់យើងកំពុងតែបានការពេញនិយមពីទីផ្សារវៀតណាម និងឡាវ។ ត្រីងៀត ត្រីឆ្អើរកំពុងតែទទួលបានការពេញនិយមនៅក្នុងទីផ្សារថៃផងដែរ។ ដូចនេះ ខ្ញុំគិតថាពីឆ្នាំទៀត យើងអាចមានសន្ទុះច្រើនលើការនាំចេញទៅទីផ្សារអាស៊ានបានដែរ»។ លោក មៀវ សុខទ្រី បានបញ្ជាក់បន្ថែមដូច្នេះ៕