មួយរយៈចុងក្រោយ បញ្ហាកោះតៃវ៉ាន់ មានភាពតានតឹងជាខ្លាំង បន្ទាប់ពីទស្សនកិច្ចរបស់ប្រធានសភាតំណាងអាម៉េរិក។ ជុំវិញបញ្ហានេះ ចិនបានប្តេជ្ញាមិនឱ្យតៃវ៉ាន់ប្រកាសឯករាជ្យពីខ្លួនឡើយ ហើយនៅតែចាត់ទុកតៃវ៉ាន់នៅតែផ្នែកមួយនៃដែនដីរបស់ខ្លួន។ ជាថ្មីម្តងទៀត ចិនបានស្នើតៃវ៉ាន់ឱ្យទទួលយកគោលការណ៍ «ប្រទេសមួយ ប្រព័ន្ធពីរ» ដូចនៅហុងកុង និងម៉ាកាវដែរ។

 

«ដើម្បីធ្វើឱ្យមានការបង្រួបបង្រួមប្រកបដោយសន្តិភាព យើងត្រូវទទួលស្គាល់ថាចិនដីគោក និងតៃវ៉ាន់ មានប្រព័ន្ធសង្គម និងមនោគមវិជ្ជាផ្សេងគ្នា។ គោលការណ៍ប្រទេសមួយ ប្រព័ន្ធពីរ ជាដំណោះស្រាយដ៏ល្អបំផុតសម្រាប់បញ្ហា»។ សៀវភៅសរបស់ក្រុមប្រឹក្សារដ្ឋចិន បានបញ្ជាក់បែបនេះ ដោយបន្តថា គោលការណ៍មួយនេះ ជាចំណាត់ការ ដែលផ្អែកលើគោលការណ៍ប្រជាធិបតេយ្យ បង្ហាញពីឆន្ទៈល្អ និងស្វែងរកដំណោះស្រាយប្រកបដោយសន្តិភាពលើបញ្ហាតៃវ៉ាន់។ នេះបើតាមការចុះផ្សាយរបស់ទីភ្នាក់ងារព័ត៌មានចិន Xinhua។ 

 

បន្ថែមនេះ សៀវភៅសដដែលនោះ បានបញ្ជាក់ថា ប្រព័ន្ធដឹកនាំសង្គមខុសគ្នា មិនមែនជាឧបសគ្គសម្រាប់ការបង្រួមបង្រួមជាមួយគ្នាឡើយ។ មិនតែប៉ុណ្ណោះ ចិន ក៏បានប្តេជ្ញាមិនឱ្យមានកម្លាំងផ្តាច់ខ្លួន នៅតៃវ៉ាន់គ្រប់ទម្រង់ផងដែរ។ 

 

កន្លងមក ចិន បានស្នើឱ្យតៃវ៉ាន់អនុវត្តគោលការណ៍ «ប្រទេសមួយ ប្រព័ន្ធពីរ» ជាច្រើនលើក ដើម្បីបង្រួបបង្រួមប្រទេស ដែលបានបែកបាក់ចាប់តាំងពីឆ្នាំ១៩៤៩មក។ យ៉ាងណាមិញ រដ្ឋាភិបាលក្រុងតៃប៉ិបានបដិសេធ។ លោកស្រី Tsai Ing-wen ប្រធានាធិបតីតៃវ៉ាន់ បានធ្លាប់លើកឡើងថា ប្រទេសមួយ ប្រព័ន្ធមួយនេះ បានធ្វើឱ្យហុងកុងស្ថិតក្នុងភាពអសណ្តាប់ធ្នាប់៕