ដោយ ៖ ធន់ សេងហុង
ទីភ្នាក់ងារសហរដ្ឋអាម៉េរិក (USAID) បានផ្តល់ថវិកាចំនួន ២៥លានដុល្លារដល់កម្ពុជា លើគម្រោង «កម្ពុជាហាវែសIII» ដើម្បីជំរុញកំណើនសេដ្ឋកិច្ច ឱ្យមានភាពទូលំទូលាយនិងប្រកបដោយចីរភាព តាមរយៈការបង្កើនពិពិធកម្ម និងការប្រកួតប្រជែងនៅក្នុងវិស័យកសិកម្ម។
គម្រោង កម្ពុជាហាវែស III ត្រូវបានលោកឯកអគ្គរដ្ឋទូតអាម៉េរិកប្រចាំកម្ពុជា W. Patrick Murphy និងលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ប្រកាសដាក់ឱ្យដំណើរការ ចាប់ពីខែមេសា ឆ្នាំ ២០២២ ដល់ខែមីនា ឆ្នាំ ២០២៧។ គម្រោងនេះទទួលបានការគាំទ្រថវិកាពីគំនិតផ្តួចផ្តើមសន្តិសុខស្បៀងសម្រាប់អនាគតរបស់អាម៉េរិក (Feed the Future) និងគ្រប់គ្រងដោយទីភ្នាក់ងារជំនួយអាមេរិក (USAID)។
អាម៉េរិកបានផ្តល់ថវិកាជិត ១០០លានដុល្លារ ក្នុងរយៈពេលជាងមួយទស្សវត្សរ៍ចុងក្រោយនេះ ក្នុងគោលបំណងលើកស្ទួយអាហារូបត្ថម្ភ និងបង្កើនប្រាក់ចំណូលក្នុងគ្រួសារ តាមរយៈការពង្រឹងវិស័យកសិកម្មកម្ពុជា។ នេះបើតាមសេចក្តីប្រកាសព័ត៌មានរបស់ USAID នាថ្ងៃទី ៩សីហា។
លោក W. Patrick Murphy បានបញ្ជាក់ថា ក្នុងពេលដែលពិភពលោកកំពុងជួបវិបត្តិស្បៀងអាហារនេះ កម្ពុជាចាំបាច់ត្រូវតែពង្រឹងសុវត្ថិភាពស្បៀងអាហាររបស់ខ្លួន។ ដូច្នេះគម្រោង «កម្ពុជាហាវែស III» គឺបង្ហាញឲ្យឃើញពីការប្ដេជ្ញាចិត្តរបស់រដ្ឋាភិបាលអាម៉េរិក ក្នុងការជួយកម្ពុជា ឱ្យសម្រេចគោលដៅមួយនេះ ។
កម្ពុជាហាវែស III នឹងបន្តការអភិវឌ្ឍលើកស្ទួយឱកាសសេដ្ឋកិច្ចប្រកបដោយចីរភាព និងបច្ចេកវិទ្យាកសិកម្មឆ្លាតវៃ។ គម្រោងនេះនឹងជួយលើកកម្ពស់ជីវភាពប្រជាជនកម្ពុជា ជាពិសេសស្ត្រី យុវជន និងប្រជាជនងាយរងគ្រោះ តាមរយៈកិច្ចសហការជាមួយវិស័យឯកជននៅក្នុងទីផ្សារកសិកម្ម ។
លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានលើកឡើងថា គម្រោងនេះ នឹងជួយកំណើនសេដ្ឋកិច្ចកម្ពុជា ពិសេសជួយជំរុញវិស័យកសិកម្មឱ្យកាន់តែទំនើប មានភាពប្រកួតប្រជែងប្រកបដោយប្រសិទ្ធភាពខ្ពស់ ព្រមុទាំងជួយបង្កើនសមត្ថភាពវិស័យឯកជនក្នុងការផលិត ធានាគុណភាព សុវត្ថិភាព និងជំរុញការនាំចេញ។
រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទរូបនេះ បានបញ្ជាក់ថា ជំនួយនេះ នឹងបង្កើនទុនវិនិយោគ ដើម្បីពង្រឹងផលិតភាពកែច្នៃ ពង្រីកប្រព័ន្ធទីផ្សារលក់ និងបង្កើនសមត្ថភាពគ្រប់គ្រងកសិដ្ឋាន។ ជាពិសេស នឹងជួយពង្រឹងប្រព័ន្ធត្រួតពិនិត្យអនាម័យតាម រយៈការជំរុញឱ្យប្រើប្រាស់នូវបច្ចេក វិទ្យាសមស្រប និងនវានុវត្តន៍។
គម្រោងនេះ ត្រូវបានប្រកាសដោយរដ្ឋមន្ត្រីការបរទេសអាម៉េរិក Antony Blinken ក្នុងអំឡុងពេលធ្វើទស្សនកិច្ចនៅកម្ពុជា កាលពីថ្ងៃទី ៤សីហាកន្លងទៅ ។ លោកលើកឡើងថា ការង្រឹងនូវសន្តិសុខស្បៀងពិភពលោក និងដោះស្រាយឬសគល់នៃភាពអត់ឃ្លាន កង្វះអាហារូបត្ថម្ភ និងភាពក្រីក្រ ជារឿ៉ងសំខាន់។
លោកបញ្ជាក់ថា ៖ « យើងជឿជាក់លើគម្រោងនេះ យើងជឿជាក់លើដៃគូនានារបស់យើង ហើយយើងចង់ធ្វើការល្អៗឱ្យបានច្រើនជាមួយគ្នា»។
គម្រោង កម្ពុជាហាវែស III នឹងធ្វើការជាមួយដៃគូពាក់ព័ន្ធក្នុងវិស័យកសិកម្ម អ្នកផ្គត់ផ្គង់បច្ចេកវិទ្យា ស្ថាប័នហិរញ្ញវត្ថុ និងភាគីដទៃទៀត ដើម្បីអភិវឌ្ឍនូវកម្លាំងការងារជំនាញ បង្កើតការងារ និងចាប់យកឱកាសទីផ្សារនានានៅក្នុងវិស័យកសិកម្ម ។
ទីភ្នាក់ងារជំនួយអាមេរិក USAID រំពឹងថា ក្នុងរយៈពេល៥ឆ្នាំ គម្រោងនេះនឹងបង្កើនទុនវិនិយោគ ១៥៣លានដុល្លារ ដល់ផ្នែកឯកជនក្នុងវិស័យកសិកម្ម ដែលក្នុងនោះជំរុញឲ្យមានការវិនិយោគពីក្រុមហ៊ុនឯកជន ក្នុងទំហំទឹកប្រាក់ ៣៨លានដុល្លារ និងអាចបង្កើតការងារដល់ពលរដ្ឋបានជាង ៣ ០០០កន្លែង។
ជាពិសេសជួយកសិករ និងក្រុមហ៊ុនឯកជនឲ្យទទួលបានហិរញ្ញវត្ថុលើវិស័យកសិកម្មក្នុងទំហំ ១៥លានដុល្លារ និងបង្កើនការលក់ផលិតផលកសិកម្មឲ្យបានដល់ ១០០លានដុល្លារ។
គួរបញ្ជាក់ថា គម្រោងកម្ពុជាហាវែស II ទើបតែបញ្ចប់ទៅថ្មីៗនេះ មានរយៈពេល៥ឆ្នាំ គិតចាប់ពី ២០១៧-២០២២ ដែលបានជួយវិស័យឯកជនបង្កើនទុនវិនិយោគ ២៨ លានដុល្លារ បង្កើតការងារជាង ២ ៥០០កន្លែង និងគាំទ្រដល់ការអភិវឌ្ឍគោលនយោបាយកសិកម្មចំនួន ១៧ ព្រមទាំងជួយគាំទ្រអាជីវកម្ម និងអ្នកផលិតក្នុងវិស័យសាកវប្បកម្ម បង្កើនការលក់បានជាង ៧៥ លានដុល្លារ៕