រដូវកាលថ្មីនេះ Barca បានលក់សិទ្ធិទូរទស្សន៍ La Liga របស់ខ្លួនទៅឱ្យក្រុមហ៊ុន Sixth Street រហូតដល់ទៅ ២៥ភាគរយ សម្រាប់រយៈពេល ២៥ឆ្នាំ ហើយទទួលបានប្រាក់ចំណូល ៦៨១លានដុល្លារពីការលក់នេះ។ កាលពីចុងខែកក្កដា Barcelona ក៏បានប្រកាសលក់សិទ្ធិផ្សព្វផ្សាយស្តូឌីយោ ឬ Barca Studio ២៥ភាគរយបន្ថែមទៅឱ្យក្រុមហ៊ុនវិនិយោគ GDA Luma និងទទួលបានប្រាក់ជាង ១០២លានដុល្លារ និងចុះកិច្ចសន្យាជាមួយក្រុមហ៊ុនឧបត្ថម្ភថ្មី Spotify ២៨០លានដុល្លារ។
 

ក្រោយមានការលក់សិទ្ធិផ្សព្វផ្សាយផ្សេងៗ Barca បាននាំចូលកីឡាករថ្មីប្រាំរូបរួមមាន Robert Lewandowski, Andreas Christensen, Jules Kounde, Frank Kessie និង Raphinha ហើយកីឡាករ ៣ ក្នុងចំណោមនោះត្រូវបានលោក Joan Laporta រំពឹងថានឹងអាចចុះឈ្មោះលេងប្រកួតដំបូង La Liga។ បើតាមក្លិប Barca ខ្លួនបានរកចំណូលបានជាង ៨៦០លានដុល្លារ ក្នុងការដោះបំណុលហិរញ្ញវត្ថុរបស់ក្លិប និងពង្រឹងក្រុមឡើងវិញ។
 

ប៉ុន្តែតាមការបញ្ជាក់របស់លីគ La Liga បានរកឃើញថា ចំនួនប្រាក់ដែល Barcelona ទទួលបានពីការលក់សិទ្ធិផ្សព្វផ្សាយផ្សេងទៅឱ្យក្រុមហ៊ុនវិនិយោគ Sixth Street នោះទទួលបានប្រាក់ត្រឹមតែ ៥១៩លានដុល្លារប៉ុណ្ណោះ។ បើតាមការផ្សាយរបស់វិទ្យុអេស្ប៉ាញ Cadena Cope ប្រាក់ជាង ១៥២លានដុល្លារនៅសល់ គឺក្លិបបានចេញដោយខ្លួនឯង។ 
 

ហេតុផលផ្សេងទៀតដែលធ្វើឱ្យ La Liga បដិសេធមិនទាន់ព្រមចុះឈ្មោះកីឡាករថ្មី Barca ទៅក្នុង La Liga ក៏ព្រោះដោយសារតែក្លិបមួយនេះបានចំណាយប្រាក់ច្រើននាំយកកីឡាករថ្មី ខណៈខ្លួនមិនទាន់អាចគ្រប់គ្រងការចំណាយលើប្រាក់បៀវត្សរ៍កីឡាករ ឱ្យមានកម្រិតតាមការកំណត់របស់ La Liga។  
 

Barcelona កំពុងតែព្យាយាមដោះស្រាយលើរឿងលក់កីឡាករចេញខ្លះ ដើម្បីអាចអនុញ្ញាតឱ្យក្លិបអាចចុះឈ្មោះកីឡាករថ្មី ខណៈពេលនេះខ្សែបម្រើ Frankie de Jong ជាកីឡាកម្នាក់មានតម្លៃប្រាក់ពលកម្មខ្ពស់ជាងគេនៅក្លិប ។ Barca ក៏បានស្នើឱ្យរូបគេកាត់ប្រាក់ពលកម្ម ដើម្បីបន្តជាមួយក្លិប។ បច្ចុប្បន្ន Barca ក៏កំពុងចរចាលើបញ្ហាប្រាក់ពលកម្មកីឡាករចាស់ៗដូចជា Gerard Pique, Sergio Busquets និង Jordi Alba ដើម្បីអាចនាំយកកីឡាករថ្មីបន្ថែមទៀត៕