បញ្ហាកោះតៃវ៉ាន់ បានក្លាយជាប្រធានបទដ៏ចម្រូងចម្រាសខ្លាំង ចាប់តាំងពីទស្សនកិច្ចរបស់លោកស្រី ណាន់ស៊ី ផេឡូស៊ី នៅក្រុងតៃប៉ិ។ ទាក់ទិននឹងដំណើរទស្សនកិច្ចរបស់ប្រធានសភាតំណាងអាម៉េរិកបែបនេះ មន្ត្រី​សម្រប​សម្រួលតំបន់​ឥណ្ឌូ-​ប៉ាស៊ីហ្វិ​អាម៉េរិក លោក Kurt Campbell នៅថ្ងៃទី១២ ខែសីហា បានលើកឡើងថា ចិនបានប្រតិកម្មហួសហេតុលើដំណើរទស្សនកិច្ចរបស់ លោកស្រីផេឡូស៊ីទៅកាន់តៃវ៉ាន់ ហើយក៏បានប្រើ ដំណើរទស្សនកិច្ចនេះជាលេស ដើម្បីផ្លាស់ប្តូរស្ថានភាពនៅច្រកសមុទ្រតៃវ៉ាន់តែប៉ុណ្ណោះ។ លោក Kurt បានបន្ថែមថា អាម៉េរិកនឹងបន្តវត្តមានរបស់ខ្លួននៅច្រកសមុទ្រតៃវ៉ាន់ដើម្បីជួយរក្សាស្ថិរភាពនៅតំបន់មួយនេះ។

 

ជាការឆ្លើយតបនឹងការប្ដេជ្ញាចិត្តរបស់អាម៉េរិកក្នុងសេចក្ដីថ្លែងការណ៍មួយក្រសួងការបរទេសតៃវ៉ាន់នៅថ្ងៃទី១៣ ខែ សីហា បានសម្ដែងការដឹងគុណដោយស្មោះចំពោះអាម៉េរិកដែល ចាត់សកម្មភាពជាក់ស្តែងដើម្បីរក្សាសន្តិសុខនិងសន្តិភាពនៅក្នុងច្រកសមុទ្រតៃវ៉ាន់និងតំបន់។

 

សេចក្ដីថ្លែងការណ៍ដដែលនោះក៏បានបន្តថា ការបំភិតបំភ័យផ្នែកយោធា និងសេដ្ឋកិចរបស់ ចិន បានពង្រឹងការរួបរួម និងភាពរឹងមាំនៃបណ្ដាប្រទេសប្រជាធិបតេយ្យលើពិភពលោកបន្ថែមទៀត។

 

យ៉ាងណាមិញ កាលពីថ្ងៃទី១២ ខែសីហា ប្រធានាធីបតីតៃវ៉ាន់លោកស្រី Tsai Ing-wen បាន បញ្ជាក់ថា ការគម្រាមកំហែងនៃកម្លាំងរបស់ចិនគឺមិនមានការថយចុះទេ បើទោះបីជាសមយុទ្ធ យោធាដ៏ធំបំផុតមិនធ្លាប់មានរបស់ទីក្រុងប៉េកាំងនៅជុំវិញកោះនេះហាក់ដូចជាមានការថយចុះក៏ដោយ៕