ជាតិ
សង្គមជាតិ
ទេសចរអន្តរជាតិ មកទស្សនាប្រាសាទបន្ទាយស្រី កាលពីថ្ងៃទី១៣ ខែសីហា ឆ្នាំ២០២២២។ រូបថត៖ សែម វណ្ណា
×![]()
ដោយ: លីម តុលា
ភ្នំពេញ៖ ក្នុងរយៈពេលប៉ុន្មានឆ្នាំមុនវត្តមានមេរោគកូវីដ-១៩ វិស័យទេសចរណ៍កម្ពុជាដើរតួនាទីយ៉ាងសំខាន់សម្រាប់កំណើនសេដ្ឋកិច្ចនៃប្រទេសកម្ពុជា។ ១០ឆ្នាំចុងក្រោយ ពោល គឺមុនសម័យកូវីដ២០២០-២០២១ កម្ពុជាទទួលបានកំណើនសេដ្ឋកិច្ចក្នុងរង្វង់៧ភាគរយស្ថិរ។ ក្នុងឆ្នាំ២០១៩ ប្រទេសកម្ពុជាទទួលបានភ្ញៀវទេសចរអន្តរជាតិ៦លាន៦សែននាក់ក្នុងនោះភ្ញៀវបរទេស ២លាន ២សែននាក់បានចូលទស្សនារមណីយដ្ឋានអង្គរ។ រីឯ ៨ខែដើមឆ្នាំ២០២២នេះ កម្ពុជាទទួលបានភ្ញៀវទេសចរអន្តរជាតិចូលទស្សនារមណីយដ្ឋានអង្គរជាតិ១០ម៉ឺននាក់។ តើនៅពេលណាទើបកម្ពុជាអាចទទួលបានភ្ញៀវទេសចរបទេសក្នុងចំនួនដូចឆ្នាំ២០១៩ឡើងវិញ? បញ្ហាប្រឈមក្រោយកូវីដ តើកម្ពុជាខ្វះភ្ញៀវទេសចរ ឬខ្វះសេវាទេសចរណ៍ប្រកបដោយគុណភាព? 
គ្រប់គ្នាបានដឹងច្បាស់ហើយថា វិស័យទេសចរណ៍ដែលជាឆ្អឹងខ្នងសេដ្ឋកិច្ចរបស់កម្ពុជាត្រូវបានខ្ទេចខ្ទាំដោយសារការរីករាលដាលនៃមេរោគកូវីដក្នុងរយៈពេល២ឆ្នាំជាប់គ្នា២០២០-២០២១ ហើយបច្ច័យនៃមេរោគនេះអាចគំរាមកំហែងវិស័យទេសចរណ៍កម្ពុជាពី២ ទៅ៣ ឬ៥ឆ្នាំខាងមុខទៀត។ ខេត្តសៀមរាបដែលពឹងផ្អែកតែមួយគត់លើវិស័យទេសចរណ៍ ហើយទទួលរងគ្រោះធ្ងន់ធ្ងរខ្លាំងជាគេនោះ ក៏ចាប់ផ្តើមទទួលភ្ញៀវជាតិ និងអន្តរជាតិឡើងវិញខ្លះៗដែរ។ រហូតមកដល់ពេលនេះ ចរន្តសេដ្ឋកិច្ចជាទូទៅនៅទូទាំងប្រទេសហាក់បីដូចជាចាប់ផ្តើមដំណើរការឡើងវិញហើយ ទោះបីជាមេរោគមិនទាន់ឃ្លាតឆ្ងាយក៏ដោយក្តី។
ត្រូវរៀនរស់ជាមួយមេរោគកូវីដ។ នេះ គឺជាគំនិតរួមរបស់ពិភពលោកដែលត្រូវតែកែលម្អវិស័យសេដ្ឋកិច្ចឡើងវិញ ទោះបីវិបត្តិសុខភាពនៅបន្តយាយីក៏ដោយ។ សូមងាកមកមើលវិស័យទេសចរណ៍កម្ពុជា ជាពិសេស ខេត្តសៀមរាប ដែលជាខេត្តទិសដៅទេសចរណ៍លេខមួយរបស់ព្រះរាជាណាចក្រ។ ក្តីបារម្ភរឿងទាក់ទាញភ្ញៀវទេសចរជាតិ និងអន្តរជាតិឲ្យបានចំនួនច្រើន ជារឿងមួយ តែរឿងមួយទៀតដែលអ្នកជំនាញក្នុងវិស័យទេសចរណ៍កំពុងព្រួយបារម្ភខ្លាំងនោះ គឺកង្វះខាតធនធានមនុស្សប្រកបដោយគុណភាពក្នុងវិស័យទេសចរណ៍ក្រោយសម័យកាលកូវីដ។
ក្នុងឆ្នាំ២០១៩ ប្រទេសកម្ពុជាទទួលបានភ្ញៀវទេសចរអន្តរជាតិ៦លាន៦សែននាក់ក្នុងនោះភ្ញៀវបរទេស ២លាន២សែននាក់បានចូលទស្សនារមណីយដ្ឋានអង្គរ។ ក្នុងឆ្នាំ២០១៩ដដែល ចំណូលពីវិស័យទេសចរណ៍មានចំនួនជិត៥ពាន់លានដុល្លារអាមេរិក។ រីឯ ៨ខែដើមឆ្នាំ២០២២នេះ កម្ពុជាទទួលបានភ្ញៀវទេសចរអន្តរជាតិចូលទស្សនារមណីយដ្ឋានអង្គរជាតិ១០ម៉ឺននាក់។ នេះ គឺជាតួលេខមុន និងក្រោយបរិបទកូវីដ-១៩។
ដើម្បីទាក់ទាញភ្ញៀវជាតិ និងអន្តរជាតិ ក្រោយបរិបទកូវីដនេះ រាជរដ្ឋាភិបាលកម្ពុជាបានខិតខំកែលម្អរហេដ្ឋារចនាសម្ព័ន្ធជាច្រើននៅក្នុងខេត្តសៀមរាបក្នុងន័យធ្វើយ៉ាងណាឲ្យខេត្តប្រាសាទមួយនេះ អាចទទួលភ្ញៀវជាតិ និងអន្តរជាតិដោយគ្មានបញ្ហា។ សណ្ឋាគារ ផ្ទះសំណាក់ រីហ្ស៊ត (Resort) និងទីកន្លែងកម្សាន្តជាច្រើនកំពុងរង់ចាំការវិលត្រឡប់មកវិញរបស់ភ្ញៀវទេសចរជាតិ និងអន្តរជាតិ។ ស្រប ពេលជាមួយគ្នា រដ្ឋាភិបាល បាន និងកំពុងត្រៀមបង្កើតផលិតផលទេសចរណ៍ថ្មីៗនៅក្នុងខេត្តសៀមរាប ដូចជា ផលិតផលទេសចរណ៍វប្បធម៌ បេតិកភណ្ឌ សាសនា និងជំនឿ, ផលិតផលទេសចរណ៍បៃតង, ផលិតផលទេសចរណ៍ជនបទ, កសិ-ទេសចរណ៍, ផលិតផលទេសចរណ៍កីឡា, ផលិតផលទេសចរណ៍វ័យចំណាស់, ទេសចរណ៍សុខភាព និងទេសចរណ៍ផ្ទះទីពីរ។ល។
ប្រទេសកម្ពុជា និយាយជារួម និងខេត្តសៀមរាប និយាយដោយឡែក បានត្រៀមរៀបចំរួចរាល់ទាំងផលិតផលទេសចរណ៍ និងហេដ្ឋារចនាសម្ព័ន្ធដើម្បីទទួលភ្ញៀវជាតិ និងជាពិសេស ភ្ញៀវអន្តរជាតិរួចរាល់ហើយ។ ប៉ុន្តែ ដើម្បីស្តារស្ថានភាពទេសចរណ៍ឲ្យដូចមុនជំនាន់កូវីដ តើកម្ពុជាត្រូវការពេលវេលាប៉ុន្មានឆ្នាំទៀត?
បើនិយាយពីការវិលត្រឡប់របស់ភ្ញៀវជាតិ និងអន្តរជាតិ មកកាន់កម្ពុជា និងខេត្តសៀមរាប គេសង្កេតឃើញថា ចំនួនភ្ញៀវបានចាប់ផ្តើមកើនឡើងបន្តិចម្តងៗរួចហើយ។ តែដើម្បីបង្កើនចំនួនភ្ញៀវ ជាពិសេស ភ្ញៀវអន្តរជាតិឲ្យបានចំនួនដូចកាលពីមុនជំនាន់កូវីដ ប្រហែលជាប្រទេសកម្ពុជាត្រូវការពេលវេលាច្រើនថែមទៀត។ មូលហេតុ គឺដោយសារចំហាយមេរោគកូវីដនៅបន្តវាយប្រហារប្រទេសនីមួយៗនៅលើពិភពលោកដដែល។ គ្រួសារនីមួយៗ បើមិនមានករណីចាំបាច់ទេ ប្រហែលជាពួកគេសុខចិត្តធ្វើដំណើរកម្សាន្តនៅក្នុងប្រទេសគេរៀងៗខ្លួន ឬបើមិនចាំបាច់ ពួកគេសុខចិត្តសន្សំប្រាក់របស់គេដោយរង់ចាំមើលស្ថានការណ៍នាពេលខាងមុខបន្តិចសិន។
កូវីដ មិនទាន់អស់ចំហាយផង ស្រាប់តែសង្រ្គាមអ៊ុយក្រែន និងរុស្ស៊ីបានកើតឡើង។ សង្រ្គាមនេះ ក៏បានធ្វើឲ្យប៉ះពាល់សេដ្ឋកិច្ចពិភពលោក និងសេដ្ឋកិច្ចគ្រួសារនីមួយៗផងដែរ។ រឿងរ៉ាវធំៗទាំងពីរខាងលើនេះ ពិតជាកំពុងទាញឲ្យវិស័យទេសចរណ៍ងើបឡើងវិញក្នុងដំណើរយឺតយ៉ាវបំផុត។ ចំពោះកម្ពុជាវិញ ដើម្បីស្តារស្ថានភាពទេសចរណ៍ឲ្យដូចមុនឆ្នាំ២០២០ កម្ពុជាប្រហែលជាត្រូវការរយៈពេលមិនតិចជាងពី៣ទៅ៥ឆ្នាំទៀតឡើយ។
ក្នុងរយៈពេលនេះ កម្ពុជាមិនត្រូវអោបដៃនៅស្ងៀមឡើយ ពោល គឺកម្ពុជាត្រូវផលិតផលិតផលទេសចរណ៍ថ្មីបន្ថែមទៀត, ត្រូវផ្សព្វផ្សាយជំរុញទីផ្សារទៅក្រៅប្រទេសឲ្យបានច្រើនបន្ថែមទៀត, ត្រូវបង្កើតជើងហោះហើរផ្ទាល់ឲ្យមកកាន់កម្ពុជាកាន់តែច្រើន, បង្កើតកញ្ចប់ទេសចរណ៍ពិសេសៗទាក់ទាញឲ្យបានកាន់តែច្រើន។ល។
ចុះបើចំនួនភ្ញៀវជាតិ និងអន្តរជាតិចេះតែបន្តកើនឡើងបន្តិចម្តងៗពីមួយឆ្នាំទៅមួយឆ្នាំ តើកម្ពុជា ជាពិសេស ខេត្តសៀមរាប អាចខ្វះធនធានមនុស្សមានគុណភាពដើម្បីបម្រើការក្នុងវិស័យទេសចរណ៍ដែរឬទេ? នេះ គឺជាសំណួរដែលអ្នកជំនាញក្នុងវិស័យនេះកំពុងតែបង្ហាញក្តីព្រួយបារម្ភ។ អ្នកជំនាញវិស័យទេសចរណ៍មួយចំនួនបានលើកឡើងថា ការទាក់ទាញការវិលត្រឡប់មកវិនៃភ្ញៀវជាតិ និងអន្តរជាតិ គឺជាការលំបាកមួយ តែបញ្ហាប្រឈមមួយទៀតដែលខេត្តសៀមរាបកំពុងប្រឈមនោះ គឺកង្វះខាតធនធានមនុស្សគុណភាពក្នុងវិស័យទេសចរណ៍នេះឯង ព្រោះ ពួកគេមួយចំនួនបានបោះបង់អាជីពក្នុងវិស័យនេះរួចទៅហើយដោយសារមេរោគកូវីដ។
អ្នកបម្រើការក្នុងវិស័យទេសចរណ៍ក្នុងចំនួនមួយណានោះ បានចាកចេញពីវិស័យទេសចរណ៍ រួចទៅធ្វើការងារនៅក្នុងវិស័យផ្សេងៗក្នុងអំឡុងពេលកូវីដ។ ម្ចាស់អាជីវកម្មក្នុងវិស័យទេសចរណ៍មួយចំនួនកំពុងប្រឈមនឹងរកកម្លាំងពលកម្មក្នុងវិស័យនេះ។
ដូច្នេះ នៅពេលនេះ សំណួរដែលកំពុងចោទសួរគឺថា តើខេត្តសៀមរាបមានចំនួនមគ្គុទេសក៏គ្រប់ចំនួនឬទេ? តើចំនួនចុងភៅគ្រប់ចំនួនឬទេ? តើចំនួនអ្នកទទួលបដិសណ្ឋាកិច្ចគ្រប់ចំនួនឬទេ? តើអ្នកពាក់ព័ន្ធដទៃទៀតក្នុងវិស័យទេសចរណ៍មានគ្រប់ចំនួនឬទេប្រសិនបើទេសចរត្រឡប់មកវិញដូចដើម?
សរុបសេចក្តីមកវិញ សម្រាប់ស្ថានភាពនាពេលខាងមុខនេះ ជាពិសេសរយៈខ្លី កម្ពុជាពិតជាប្រឈមនឹងកង្វះភ្ញៀវជាតិ និងអន្តរជាតិមែន ប៉ុន្តែស្របពេលជាមួយគ្នា ព្រះរាជាណាចក្រកម្ពុជាក៏ប្រឈមនឹងខ្វះធនធានមនុស្សមានគុណភាពដើម្បីបម្រើការនៅក្នុងសេវាទេសចរណ៍ផងដែរ។ នេះ គឺជាអ្វីដែលអ្នកពាក់ព័ន្ធត្រូវយកចិត្តទុកដាក់ក្រោយបរិបទកូវីដ-១៩៕
© រក្សាសិទ្ធិដោយ thmeythmey.com
