អ្នកនយោបាយប្រឆាំងទាំង៣៣នាក់ ដែលត្រូវបានកោះហៅឲ្យចូលរួមសវនាការស្របពេលជាមួយលោក សម រង្ស៊ី មានដូចជា អ្នកស្រី ជូឡុង សូម៉ូរ៉ា អ្នកស្រី មូរ សុខហួរ លោក អេង ឆៃអ៊ាង លោក អ៊ូ ច័ន្ទឫទ្ធិ លោក ឡុង រី លោក សោ ចាន់ដេត លោក ម៉ែន សុថាវរិន្ទ្រ និង លោក នុត រំដួល ជាដើម។ ពួកគាត់ទាំងអស់ ដែលបានរៀបរាប់ឈ្មោះនេះ សុទ្ធតែនៅក្រៅប្រទេស។ 
 

លោក សម រង្ស៊ី តាមរយៈទំព័រហ្វេសប៊ុក នៅថ្ងៃទី២៣ ខែសីហា ឆ្នាំ២០២២ បានប្រកាសថា លោក នឹងធ្វើដំណើរមកកម្ពុជា ដើម្បីចូលរួមសវនាការតាមកាលកំណត់របស់តុលាការភ្នំពេញ បើរដ្ឋាភិបាលកម្ពុជា ដកបម្រាម ដែលហាមមិនឲ្យក្រុមហ៊ុនយន្តហោះនានា ដឹកលោក។ លោក អេង ឆៃអ៊ាង ប្រកាសតាមក្រោយលោក សម រង្ស៊ី ថា លោក ត្រៀមខ្លួនអមដំណើរលោក សម រង្ស៊ី វិលចូលស្រុកជានិច្ច។ 

 

យ៉ាងណាក៏ដោយ កន្លងមក មន្រ្តីរដ្ឋាភិបាលកម្ពុជា ក៏ដូចជាមន្រ្តីគណបក្សកាន់អំណាច តែងនិយាយថា លោក សម រង្ស៊ី មិនហ៊ានចូលស្រុកខ្លួនឯង មិនមែនរដ្ឋាភិបាល ហាមយន្តហោះ មិនឲ្យដឹកលោកនោះទេ។ លោក សុខ ឥសាន អ្នកនាំពាក្យគណបក្សកាន់អំណាច សរសេរសារក្នុងបណ្តាញតេឡេក្រាមជាមួយក្រុមអ្នកកាសែត ដែលបង្កប់ន័យបែបចំអកថា៖«បើជាអ្នកក្លាហាន ទោះត្រូវជាប់គុកជាង១០០ឆ្នាំក្តីក៏នៅតែមកដែរ។ បើឲ្យគេធានា ទើបហ៊ានមក មិនហៅថាជាអ្នកក្លាហានទេ»។ 

 

លោក សម រង្ស៊ី រួមទាំងអ្នកនយោបាយប្រឆាំងដទៃទៀត ដែលដើរតាមលោក ត្រូវតុលាការកម្ពុជា ចោទប្រកាន់ពីបទចោទធំៗ២ គឺ បទឧបឃាត និងបទរួមគំនិតក្បត់ [ជាតិ]។ បទឧបឃាត សំដៅលើការរៀបចំគម្រោងផ្តួលរំលំរដ្ឋាភិបាលកម្ពុជា ឯបទរួមគំនិតក្បត់ [ជាតិ] សំដៅលើការចូលរួមគាំទ្រ និងអនុវត្តគម្រោងផ្តួលរំលំរដ្ឋាភិបាលកម្ពុជា។ ដូច្នេះ លោក ត្រូវចោទពីបទចូលរួមរៀបចំគម្រោងផ្តួលរំលំរដ្ឋាភិបាលផង រួមទាំងត្រូវចោទពីបទចូលរួមគាំទ្រ និងអនុវត្តគម្រោងនេះផង៕