សេចក្ដីជូនដំណឹងរបស់រដ្ឋបាលខេត្តនៅថ្ងៃទី២៩ ខែសីហា នេះ បានបញ្ជាក់ថា ពលរដ្ឋតាមបណ្តាររាជធានី-ខេត្ត និងក្រៅប្រទេសជាច្រើន បានធ្វើដំណើរទៅកាន់ខេត្តសៀមរាប ក្រោយលោក ខឹម វាសនា បានផ្សព្វផ្សាយថា លោកបានធ្វើវិបស្សនាមើលឃើញ និងបំភ្លឺជាថ្មីនូវមេរៀនត្រាស់ដឹងរបស់ព្រះសម្មាសម្ពុទ្ធ រួមទាំងដំណើរនៃធម្មជាតិ។ 

 

រដ្ឋបាលខេត្តសៀមរាប បន្ថែមថា ការប្រជួបជុំនេះ មិនបានសុំកិច្ចសហការ និងមានការអនុញ្ញាតពីអាជ្ញាធរមានសមត្ថកិច្ចឡើយ។ ទន្ទឹមនោះ ការប្រមូលផ្តុំនេះ ក៏បានប៉ះពាល់ដលសន្តិសុខសណ្ដាប់ធ្នាប់សាធារណ បរិស្ថាន អនាម័យ និងវិធានការទប់ស្កាត់ជំងឺកូវីដ-១៩ ផងដែរ។ ដូច្នេះ ដើម្បីទប់ស្កាត់ផលប៉ះពាល់បរិស្ថាន អនាម័យ និងការរីករាលដាលនៃជំងឺកូវីដ-១៩។ 

 

អភិបាលខេត្តសៀមរាប លោក ទៀ សីហា និងស្នងការខេត្ត រួមទាំងលោក ហ៊ុន ម៉ានិត អគ្គនាយក នៃអគ្គនាយកដ្ឋានស្រាវជ្រាវចារកិច្ចនៃក្រសួងការពារជាតិ នារសៀលថ្ងៃទី២៧ ខែសីហា បានដឹកនាំក្រុមការងារ ចុះទៅពិនិត្យការជួបជុំរបស់ប្រជាពលរដ្ឋ នៅដីចម្ការរបស់លោក ខឹម វាសនា ក្រោយមានការកៀរគរមនុស្សប្រមាណ២ម៉ឺននាក់នៅផ្ទះរបស់លោក។ 

 

កន្លងមក ក្រសួងធនធានទឹក ឱ្យពលរដ្ឋជឿព័ត៌មានអាកាសធាតុ គួរយោងលើការផ្សព្វផ្សាយរបស់ក្រសួងធនធានទឹកជាគោល ដោយមិនត្រូវជឿស្ថាប័ន ឬបុគ្គលដែលគ្មានមូលដ្ឋាន និងមិនសមហេតុផលឡើយ។

 

សូមជម្រាបថា ក្រៅពីពលរដ្ឋដែលនៅក្នុងស្រុក ក្នុងនោះក៏មានពលរដ្ឋខ្មែរដែលជាពលករនៅកូរ៉េខាងត្បូង ក៏ស្លន់ស្លោ និងកំពុងវិលត្រឡប់មកកម្ពុជាវិញដែរ ទោះបីពួកគេកំពុងធ្វើការ និងខាតប្រយោជន៍ជាច្រើនក៏ដោយ។ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ ក៏ក្រើនរំឮកដល់ពលករទាំងនោះដែរ គឺប្រើបញ្ញាដើម្បីជឿអ្វីមួយឱ្យបានច្បាស់លាស់៕