មួយរយៈចុងក្រោយនេះ សារព័ត៌មានជាច្រើន បានចុះផ្សាយពីការងារឆបោកនៅក្នុងបណ្តាប្រទេសអាស៊ីអាគ្នេយ៍ ក្នុងនោះមានកម្ពុជាផង។ ប្រជាជនដែលនៅរស់នៅហុងកុង និងតៃវ៉ាន់ ត្រូវបានអាជ្ញាធរជួយសង្រ្គោះជាបន្តបន្ទាប់ចេញពីការងារឆបោកទាំងនោះ។ ទាក់ទិននឹងបញ្ហានេះ ក្រសួងការបរទេសចិន បានអះអាងថា ខ្លួនបានសហការយ៉ាងជិតស្និទ្ធជាមួយភាគីកម្ពុជា ដើម្បីជួយជនរងគ្រោះ។ 

 

«ស្ថានទូតចិននៅកម្ពុជា មានទំនាក់ទំនងយ៉ាងជិតសិទ្ធជាមួយរដ្ឋាភិបាលកម្ពុជា ក្នុងប្រតិបត្តិការស្វែងរក និងជួយសង្រ្គោះជនរងគ្រោះ»។ លោក Zhao Lijian អ្នកនាំពាក្យក្រសួងការបរទេសចិន បានបញ្ជាក់បែបនេះ ទៅកាន់អ្នកសារព័ត៌មានដែលបានសួរជុំវិញការជួយសង្រ្គោះជនរួមជាតិចិន ដែលចាញ់បោកឱ្យមកធ្វើការនៅក្នុងបណ្តាប្រទេសអាស៊ីអាគ្នេយ៍។ មន្រ្តីក្រសួងការបរទេសចិនរូបនេះ បានបន្ថែមថា រដ្ឋាភិបាលក្រុងប៉េកាំងប្តេជ្ញា ការពារសិទ្ធិស្របច្បាប់ និងសុវត្ថិភាព រួមទាំងប្រយោជន៍នៃប្រជាជនខ្លួន និងជនរួមជាតិមកពីតៃវ៉ាន់។ 

 

បន្ថែមពីនេះ លោក Zhao បានអះអាងថា កន្លងមក ស្ថានទូតចិន ដោយមានជំនួយពីភាគីកម្ពុជា បានទទួលជោគជ័យ ក្នុងការជួយសង្រ្គោះជនរួមជាតិតៃវ៉ាន់មួយចំនួន។ ប្រតិបត្តិការជួយសង្រ្គោះនេះ ធ្វើឡើងបន្ទាប់ពីស្ថានទូតចិន ទទួលបានសារសុំឱ្យជួយពីប្រជាជនតៃវ៉ាន់ចំនួន ២០រូប។ 

 

ដោយសារមានមនុស្សចាញ់បោកឱ្យទៅធ្វើការនៅបរទេសច្រើន អ្នកនាំពាក្យក្រសួងការបរទេសចិន បានអំពាវនាវឱ្យប្រជាជនខ្លួនមានការប្រុងប្រយ័ត្ន ចំពោះការងារក្លែងក្លាយ ដែលត្រូវបានបង្ហោះជ្រើសរើសនៅលើបណ្តាអ៊ីនធឺណិត។ មិនតែប៉ុណ្ណោះ មន្រ្តីចិនរូបនេះ បានជំរុញឱ្យប្រជាជនទាក់ទងប៉ូលិសក្នុងតំបន់ ឬស្ថាតទូត រួមទាំងស្ថានកុងស៊ុលចិន ដែលមាននៅប្រទេសនោះ ក្នុងករណីមានបញ្ហាអាសន្ន។ 

 

កន្លងមក អាជ្ញធរហុងកុង បានប្រកាសរៀបចំក្រុមការងារមួយ ដើម្បីតាមដាន និងជួយមនុស្សដែលត្រូវបានជួញដូរ និងបង្ខំឱ្យធ្វើការឆបោកអ្នកផ្សេងនៅតំបន់អាស៊ីអាគ្នេយ៍៕