និយាយ និង​សរសេរ​ភាសាខ្មែរ​យ៉ាង​ស្ទាត់ជំនាញ ពេលនេះ លោក យូរ៉ាយ អាចប្រាប់​គេ​ឯង​បានហើយ​ថា គាត់គឺជាខ្មែរ។ តាមរយៈវីដេអូ​រយៈពេលជាង​២នាទី លោក យូរ៉ាយ ដែលមានឈ្មោះពេញថា Uriah Lyford បាន​បង្ហាញភាព​ត្រេកអររីករាយ​យ៉ាងខ្លាំង ជាមួយនឹង​វត្តមាន​ភរិយា រួមទាំងកូន​ស្រី២នាក់។

 

ក្នុង​វីដេអូ បុរស​ដើម​កំណើត​អាម៉េរិក​វ័យ​៣៧​ឆ្នាំ​រូបនេះ បាន​តាំង​ចិត្ត​ថា៖«ខ្ញុំសូមសន្យាថានឹងចំណាយជីវិតលើកតម្កើងអ្វីដែលជារបស់ខ្មែរ។ សូមអរគុណសម្តេច​ និងព្រះមហាក្សត្រ​ ដែលបានអនុញ្ញាតឲ្យខ្ញុំក្លាយជាជនជាតិខ្មែរ»។ ក្រៅពីនេះ លោកក៏បានប្រាប់កូនស្រីទាំងពីរឱ្យខំប្រឹងរៀនសូត្រភាសាខ្មែរឱ្យចេះនិយាយ និងសរសេរផងដែរ។

ក្រោយទទួលបានសញ្ជាតិជាជនជាតិខ្មែរ លោកប្តេជ្ញាបន្តជួយសង្គមជាតិ ជាពិសេសអភិវឌ្ឍសមត្ថភាពយុវជនកម្ពុជាឱ្យក្លាយជាអ្នកដឹកនាំគំរូ។ ក្នុងបទសម្ភាសជាមួយ​សារព័ត៌មាន ThmeyThmey លោក យូរ៉ាយ បាន​បញ្ជាក់ថា ភរិយា​របស់​លោក ដែល​ជាកូន​កាត់ជប៉ុន-អាម៉េរិក ត្រូវ​រង់ចាំ​យ៉ាងហោចណាស់​៣ឆ្នាំទៀត​ដើម្បីស្នើសុំចូលសញ្ជាតិ ខណៈកូន​ស្រីទាំងពីរ មិនទាន់គ្រប់អាយុ​កំណត់។

 

លោក យូរ៉ាយ បាន​មក​រស់នៅ​កម្ពុជាតាំងពី​ឆ្នាំ២០០៣ តាមរយៈការងារស្ម័គ្រចិត្តនៅអង្គការមួយ ដោយ​ពេលនោះ លោកជាយុវជនដែលមានអាយុ១៨​ឆ្នាំ។ លោក​ក៏មាន​ភាព​ល្បីល្បាញ​ផងដែរនៅ​តាម​បណ្តាញសង្គម តាមរយៈការ​បង្ហោះវីដេអូផ្សេង ជាមួយ​ប្រភេទ​វីដេអូបែបអប់រំយុវវ័យ នៅ​លើ Youtube, TikTok, Instagram ជាពិសេស​ហ្វេសប៊ុក​ផ្លូវការ​របស់​លោក។

 

សារព័ត៌មានថ្មីៗ ខិតខំ​សាកសួរ​បន្ថែមអំពី​លោក យូរ៉ាយ ផងដែរ ប៉ុន្តែ​ដោយសារទីតាំង​លោករស់នៅក្រុង​ប៉ោយប៉ែត មិន​មាន​សេវាទូរសព្ទ​ដែល​ធ្វើ​ឲ្យ​ការឆ្លើយ​ឆ្លងរអាក់រអួល។ ដូច​​វីដេអូ​ដែល​លោកបានបង្ហោះ បុរស​ដើម​កំណើត​អាម៉េរិក​រូបនេះ បាន​និយាយថា៖ «ខ្ញុំសប្បាយចិត្ត សប្បាយមែនទែន ព្រោះវាជាការប្តេជ្ញា ក្តីស្រមៃមួយ ដែលខ្ញុំមានយូរឆ្នាំហើយ បានសម្រេច អ៊ីចឹងខ្ញុំត្រេកអរមែនទែន»។ 

 

លោកបាន​រំលឹកថា លោក​ឈានជើងចូលទឹកកម្ពុជាមិនយូរប៉ុន្មាន លោកក៏កើតចិត្តស្រលាញ់ និងចង់បានសញ្ជាតិខ្មែរ។ «ចូលសញ្ជាតិខ្មែរ ព្រោះខ្ញុំមានចិត្តស្រលាញ់ខ្មែរ។ ធម្មតាមនុស្សយើងស្រលាញ់អ្វីមួយ គឺចង់បានវា។ ខ្ញុំចង់ឱ្យបងប្អូនខ្មែរដឹងថា ជនជាតិផ្សេងស្រលាញ់ខ្មែរច្រើនណាស់ ប៉ុន្តែខ្មែរជួនកាលស្រលាញ់ខ្លួនឯងនៅស្ទើរ។ អ៊ីចឹងខ្ញុំគិតថា បើខ្ញុំបានចូលសញ្ជាតិខ្មែរ ខ្ញុំចង់បង្ហាញទៅជនជាតិខ្មែរថា បុរសដើមកំណើតអាមេរិកកាំងម្នាក់នេះ ស្រលាញ់ខ្មែរណាស់ ចង់ឱ្យខ្លួនឯងក្លាយជាជនជាតិខ្មែរ»។

 

លោក Uriah Lyford ហៅ យូរ៉ាយ បានបន្ថែមថា កម្ពុជា ជាប្រទេសមួយដែលស្រួលរស់នៅ និងមានសេរីភាព។ រដ្ឋបានផ្តល់សេរីភាពច្រើនដល់ប្រជាជនក្នុងការប្រកបរបររកស៊ី ដែលវាខុសប្លែកពីប្រទេសមួយចំនួនដែលមានច្បាប់តឹងរ៉ឹង។

 

សម្រាប់បេសកកម្មបន្តលោក យូរ៉ាយនៅកម្ពុជា ក្នុងនាមជាពលរដ្ឋខ្មែរ លោកបានប្តេជ្ញាជួយសង្គម និងអប់រំយុជននិងអភិវឌ្ឍមេដឹកនាំជំនាន់ក្រោយ។ លោកមានបំណងចង់ឱ្យប្រជាជនកម្ពុជាមានក្តីស្រលាញ់យុវជនមានចំណេះដឹង និងក្លាយជាអ្នកដឹកនាំដូចជា អ្នកនាំសាលា អ្នកនាំក្រុមហ៊ុនអ្នកដឹកនាំសង្គម ដោយស្រលាញ់សង្គមជាតិ។ លោកសង្ឃឹមថាពលរដ្ឋកម្ពុជាមានសុខភាពផ្លូវចិត្ត ផ្លូវអារម្មណ៍រឹងមាំដើម្បីក្រុមគ្រួសារមានសុភមង្គល និងមានក្តីសុខ។ 

 

ជាមួយគ្នានោះលោកក៏ចង់ផ្សារភ្ជាប់វប្បធម៌នៃប្រទេសទាំងពីរ ដោយចែករំលែកចំណុចល្អគ្នាទៅវិញទៅមក។ លោកយូរ៉ាយ ចង់ឱ្យពលរដ្ឋកម្ពុជាមានភាពរឹកមាំ និងហ៊ានជម្នះក្នុងការធ្វើអ្វីមួយ។លោកក៏ចង់ផ្សារភ្ជាប់វប្បធម៌ខ្មែរ ដែលមានភាពទន់ភ្លន់ ចេះគោរពឱ្យតម្លៃគ្នាចេះបន្ទាបខ្លួន និងមានការគិតវែងឆ្ងាយ ទៅកាន់បរទេសផងដែរ។
 

ចំពោះឈ្មោះខ្មែរ ដែលលោក យូរ៉ាយចង់ដាក់គឺ គង់ វិសាល។ ហេតុអ្វី គង់​ វិសាល? លោកពន្យល់ថា ឈ្មោះបង្កប់​អត្ថន័យ​ខ្ពស់ពោល​ជាមនុស្សម្នាក់ ដែលមានភាពរឹងមាំក្នុងសង្គម។ ប៉ុន្តែក្រោយបានយោបល់ពីមិត្តដែលបានចូលសញ្ជាតិខ្មែររួច លោក យូរ៉ាយ សម្រេចចិត្តបន្តប្រើឈ្មោះដើមវិញ។ 

 

បច្ចុប្បន្ន លោក UriahLyford ហៅ យូរ៉ាយ ជាគ្រូសមាជិកម្នាក់នៅ សាកលវិទ្យាល័យនៃប្រជាជាតិ Universityof the Nations (YWAM)។ លោក យូរ៉ាយ មានកូនស្រីច្បងអាយុ៣ឆ្នាំនិងកូនស្រីពៅអាយុ២ឆ្នាំ ដែលបច្ចុប្បន្នកំពុងរស់នៅជាមួយលោក និងភរិយា នៅភូមិមិត្តភាពសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ​។ លោកបានលើកឡើងថា លោកសប្បាយចិត្តដែលកូនស្រីទាំងពីរចម្រើនវ័យនៅកម្ពុជា៕ 

 

  លោក Uriah Lyford ជាមួយគ្រួសារ។ រូបភាពពីលោកលោក Uriah Lyford ​