អាស៊ាននឹងរៀបចំឱ្យមានកិច្ចព្រមព្រៀងវិនិយោគគ្រប់ជ្រុងជ្រាយរួមមួយ

ជាតិ

សេដ្ឋកិច្ច

អាស៊ាន

អាស៊ាននឹងរៀបចំឱ្យមានកិច្ចព្រមព្រៀងវិនិយោគគ្រប់ជ្រុងជ្រាយរួមមួយ

15, Sep 2022 , 7:59 pm

រូបភាព

លោក ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្ម និងជាអ្នកនាំពាក្យកិច្ចប្រជុំរដ្ឋមន្ត្រីសេដ្ឋកិច្ចអាស៊ានលើកទី៥៤ និងកិច្ចប្រជុំពាក់ព័ន្ធ កំពុងថ្លែងក្នុងសន្និសីទកាសែតស្តីពីលទ្ធផលនៃកិច្ចប្រជុំ ប្រជុំរដ្ឋមន្ត្រីសេដ្ឋកិច្ចអាស៊ាន នាល្ងាចថ្ងៃទី១៤កញ្ញា ឆ្នាំ២០២២។

ដោយ: អ៊ូ សុខមាន (OU Sokmean)

សៀមរាប៖ កម្ពុជា ជាមួយប្រទេសដែលជាសមាជិកអាស៊ាន បានពិភាក្សាគ្នាលើការរៀបចំឱ្យមានកិច្ចព្រមព្រៀងវិនិយោគគ្រប់ជ្រុងជ្រាយមួយរបស់អាស៊ាន ដើម្បីទាក់ទាញអ្នកវិនិយោគបន្ថែម។ កិច្ចប្រជុំនេះ ដឹកនាំដោយលោក សុខចិន្តា សោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជា(CDC) និងជាប្រធាននៃកិច្ចប្រជុំក្រុមប្រឹក្សាវិនិយោគអាស៊ាន(AIA)។

លោក ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្ម និងជាអ្នកនាំពាក្យកិច្ចប្រជុំរដ្ឋមន្ត្រីសេដ្ឋកិច្ចអាស៊ានលើកទី៥៤ និងកិច្ចប្រជុំពាក់ព័ន្ធ បានបញ្ជាក់ថា កិច្ចព្រមព្រៀងវិនិយោគគ្រប់ជ្រុងជ្រាយមួយរបស់អាស៊ាន(ACIA)នេះ គឺផ្តោតលើការបង្កើតឯកសារវិនិយោគ និង បញ្ជីប្រភេទអាជីវកម្ម ឬធុរកិច្ចណា ដែលត្រូវអនុញ្ញាត ឬ មិនអនុញ្ញាត ជាពិសេសលើកទឹកចិត្តឱ្យវិនិយោគនៅក្នុងប្រទេសតំបន់អាស៊ាន។

បើតាមលោក សុវិជាតិ ក្រុមប្រឹក្សាវិនិយោគអាស៊ាន បានចាត់ឱ្យមន្ត្រីនៃតំណាងប្រទេសនីមួយៗ រៀបចំនូវឯកសារទាំងអស់នេះ ឱ្យចប់ជាស្ថាពរនៅឆ្នាំ ២០២៣ ដើម្បីពន្លឿនការអនុវត្តកិច្ចព្រមព្រៀងវិនិយោគគ្រប់ជ្រុងជ្រាយរបស់អាស៊ាន។

លោកបន្តថ្លែងក្នុងសន្និសីទកាសែតស្តីពីលទ្ធផលនៃកិច្ចប្រជុំរដ្ឋមន្ត្រីសេដ្ឋកិច្ចអាស៊ានលើកទី៥៤ និងកិច្ចប្រជុំពាក់ព័ន្ធ នាល្ងាចថ្ងៃទី១៤កញ្ញា ថា ឯកសារដែលប្រទេសនីមួយៗរៀបចំឡើងនេះ នឹងមានតម្លាភាព និងគោលបំណងច្បាស់លាស់ សម្រាប់អ្នកវិនិយោគ ដែលយល់ច្បាស់អំពីស្ថានភាពរបស់ខ្លួន និងចង់មកវិនិយោគនៅក្នុងប្រទេសនីមួយៗនៅអាស៊ាន។

លោក សុវិជាតិ បានបញ្ជាក់យ៉ាងដូច្នេះ៖ «ធ្វើរបៀបនេះ គឺអាចនឹងទាក់ទាញវិនិយោគិនមកវិនិយោគនៅក្នុងប្រទេសនីមួយៗបានកាន់តែប្រសើរ។ ចំពោះប្រទេសកម្ពុជាយើង ការរៀបចំនូវច្បាប់វិនិយោគថ្មី គឺវាបានឆ្លើយតបទៅនឹងអ្វីដែលបានរៀបចំនៅក្នុងឯកសារនេះ»។

ច្បាប់ស្ដីពីវិនិយោគថ្មីរបស់កម្ពុជា ត្រូវបានតាក់តែងឡើងតាមការចង្អុលបង្ហាញនៃគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ ២០១៥-២០២៥ ដោយរដ្ឋសភា បានអនុម័តកាលពីខែតុលា ឆ្នាំ២០២១។

កន្លងមក លោក សុខ ចិន្តាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជា បានលើកឡើងថា ច្បាប់វិនិយោគថ្មីនេះ ត្រូវបានតាក់តែងឡើងដើម្បីឆ្លើយតបទៅនឹងការប្រែប្រួលនៃភូមិសាស្ត្រនយោបាយ និងសេដ្ឋកិច្ច ដែលបង្កឡើងដោយភាពតានតឹងផ្នែកពាណិជ្ជកម្មរវាងមហាអំណាចសេដ្ឋកិច្ច, បដិវត្តន៍ឧស្សាហកម្មទី៤, បរិវត្តឌីជីថល និងការរអាក់រអួលនៃខ្សែចង្វាក់តម្លៃសកល ដែលបណ្តាលមកពីការរាតត្បាតនៃជំងឺកូវីដ-១៩។

លោកអះអាងថា៖ «ច្បាប់នេះ ក៏បានគិតគូរដល់ការលើកកម្ពស់សហគ្រាសធុនតូច និងមធ្យម[SMEs] តាមរយៈការផ្តល់ការលើកទឹកចិត្តដល់សហគ្រាសធុនតូច និងមធ្យមក្នុងវិស័យអាទិភាព និងជំរុញការតភ្ជាប់ជាមួយសហគ្រាសខ្នាតធំ ផងដែរ»៕