ការបណ្តុះបណ្តាលកម្រិតមន្រ្តីបច្ចេកទេស កាលពីថ្ងៃទី២១ កញ្ញា នាពហុកីឡដ្ឋានមរតកតេជោ ដែលបានបញ្ចប់ដោយជោគជ័យ បន្ទាប់ពីឆ្លងកាត់ការសិក្សាអស់រយៈពេល៣ថ្ងៃ។ ចំពោះគោលការណ៍ចម្បងធំបំផុតរបស់កីឡាហុកគីកម្ពុជា គឺត្រៀមខ្លួនក្នុងកម្មវិធីប្រកួតកីឡាថ្នាក់ជាតិលើកទី៣ ឬ National Game នាខែវិឆ្ឆិកា ខាងមុខនេះ។

 

លោក កាំង សុធា អគ្គលេខាធិការសហព័ន្ធកីឡាហុកគីកម្ពុជា ប្រាប់សារព័ត៌មានថ្មីៗតាមទូរសព្ទថា សិក្ខាកាមដែលបានបញ្ចប់ការសិក្សាកម្រិតមន្រ្តីបច្ចេកទេស គឺទទួលបានជោគជ័យល្អ។ សម្រាប់ពួកគាត់ក៏នឹងត្រូវបង្ហាញពីសមត្ថភាពរបស់ខ្លួននៅក្នុងព្រឹត្តិការណ៍ថ្នាក់ជាតិ និងស៊ីហ្គេមនាពេលខាងមុខផងដែរ។ សម្រាប់មន្រ្តីបច្ចេកទេសទាំង៣៧រូប មានតួនាទីក្នុងការរៀបចំកិច្ចការទូទៅនៃការប្រកួតកីឡាហុកគីក្នុងសាល។

 

លោក កាំង សុធា បញ្ជាក់ថា៖«យើងបណ្តុះបណ្តាលសម្រាប់ មុនស៊ីហ្គេមមកដល់គឺ National Game ហើយមន្រ្តីបច្ចេកទេសទាំងអស់គឺជាមន្រ្តីបច្ចេកទេសជាតិ(NTO)។ ជំហានដំបូងគឺគាត់រៀបចំការប្រកួតកីឡាហុកគី National Game បន្ទាប់មកទៀតប្រសិនបើការរៀបចំបានល្អគាត់នឹងត្រូវជ្រើសរើសជា NTO Sea Game»។

 

គួរបញ្ជាក់ថា សម្រាប់ព្រឹត្តិការណ៍ការប្រកួតកីឡាថ្នាក់ជាតិលើកទី៣ ឬNational Game នឹងមានក្លិបចំនួន៤ មកពីរាជធានី-ខេត្ត ចូលរួមប្រកួតក្នុងនោះមាន៖ រាជធានីភ្នំពេញ, ខេត្តកណ្តាល, កំពង់ធំ និងក្រសួងមហាផ្ទៃ ដែលត្រូវលេងនៅលើវិញ្ញាសាហុកគីក្នុងសាល ការប្រកួតនឹងធ្វើឡើងនៅពហុកីឡដ្ឋានមរតកតេជោ នាខែវិឆ្ឆិកា ខាងមុខ៕