ជាតិ
សេដ្ឋកិច្ច
ប្រាក់បៀវត្សលើសពី ១លាន៥សែនរៀល នឹងត្រូវជាប់ពន្ធ ចាប់ពីឆ្នាំ ២០២៣ ប្រមុខរដ្ឋាភិបាលកម្ពុជា សម្តេច ហ៊ុន សែន ។ រូបពី SPM ។
× ការយកពន្ធលើប្រាក់បៀវត្ស នឹងត្រូវបន្ធូរបន្តិចទៀត ចាប់ពីឆ្នាំ២០២៣ ។ ប្រាក់បៀវត្សអប្បបរមាជាប់ពន្ធសព្វថ្ងៃ ដែលមានចំនួនលើស ១លាន៣សែនរៀល នឹងត្រូវដំឡើងដល់លើសពី ១លាន៥សែនរៀល។ នេះបើតាមអនុក្រឹត្យស្តីពីតារាងភាគនៃបៀវត្សជាប់ពន្ធប្រចាំខែចុះថ្ងៃទី ២៨ ខែកញ្ញា ឆ្នាំ២០២២។
បើតាមអនុក្រឹត្យខាងលើ ប្រាក់បៀវត្សលើសពី ១លាន៥សែនរៀលដល់ ២លានរៀលនឹងត្រូវជាប់អត្រាពន្ធ ៥ភាគរយ ខណៈដែលបៀវត្សលើសពី ២លានរៀលដល់ ៨លាន៥សែនរៀលត្រូវជាប់ពន្ធ ១០ភាគរយ។ ទន្ទឹមនេះ ប្រាក់បៀវត្សលើសពី ៨លាន៥សែនដល់ ១២លាន៥សែននឹងត្រូវជាប់ពន្ធ ១៥ភាគរយ ហើយបៀវត្សលើសពី ១២លាន៥សែននឹងត្រូវជាប់អត្រាពន្ធ ២០ភាគរយ។
លោក ផៃ ស៊ីផាន ជាអ្នកនាំពាក្យរដ្ឋាភិបាលបានប្រាប់សារព័ត៌មានថ្មីៗថា ការអនុគ្រោះបន្ធូរបន្ថយពន្ធលើប្រាក់បៀវត្សរបស់រដ្ឋាភិបាលនាពេលនេះ គឺការចូលរួមកាត់បន្ថយភាពក្រីក្រ និងជួយសម្រួលដល់អ្នកដែលមានចំណូលតិច ។
លោក គី សិរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានយល់ឃើញថា ការបន្ធូរបន្ថយពន្ធលើបៀវត្សជាការរួមចំណែកជំរុញការចាយវាយក្នុងស្រុកកាន់តែប្រសើរ ដែលជាផ្នែកមួយនៃគោលនយោបាយសារពើពន្ធ ដើម្បីជំរុញកំណើនសេដ្ឋកិច្ច។
គោលនយោបាយរបស់រដ្ឋាភិបាលក្នុងការទប់ស្កាត់អតិផរណារបស់រដ្ឋាភិបាលដំបូងឡើយគឺមិនមែនបន្ធូរបន្ថយពន្ធទេ គឺបន្ទាបអត្រាការប្រាក់ដើម្បីជំរុញវិនិយោគនៅក្នុងស្រុក។ រីឯនៅក្នុងរបបសេដ្ឋកិច្ចទីផ្សារសេរី កាលណាតម្រូវការសរុបមានការកើនឡើង ស្របពេលការផ្គត់ផ្គត់នៅមានកម្រិត និងធ្វើឱ្យទំនិញឡើងថ្លៃ ។ នេះបើតាមលោក សិរីវឌ្ឍន៍។
ថ្លែងប្រាប់សារព័ត៌មានថ្មីៗតាមតេលេក្រាម អ្នកជំនាញសេដ្ឋកិច្ចរូបនេះ បានសង្កត់ធ្ងន់ថា ៖« ប្រសិនបើរដ្ឋាភិបាលបន្ធូរបន្ថយពន្ធ ហើយជំរុញឱ្យតម្រូវការក្នុងស្រុកកើនឡើង ខណៈការផ្គត់ផ្គង់ក្នុងស្រុកនៅមានកម្រិត នោះអតិផរណាក៏អាចនឹងកើនឡើងដែរ »។
សូមបញ្ជាក់ថា កម្ពុជាបានធ្វើវិសោធនកម្មច្បាប់ ទាក់ទងនឹងប្រាក់បៀវត្សអប្បបរមា ដែលត្រូវជាប់ពន្ធ ចំនួន៤លើករួចមកហើយ នាពេលកន្លងមក។ លើកទីមួយ ចំនួនប្រាក់បៀវត្សរួចពន្ធ ៥០ម៉ឺន ត្រូវបានកែ៨០ម៉ឺនរៀលរួចពន្ធនៅឆ្នាំ២០១៥, លើកទីពីរដំឡើងដល់១លានរៀលនៅ ក្នុងឆ្នាំ២០១៧, លើកទីបី ត្រូវដំឡើងដល់១លាន២សែនរៀលក្នុងឆ្នាំ២០១៨ និងលោកទីបួនដំឡើងដល់១លាន៣សែនរៀលក្នុងឆ្នាំ២០២០៕
© រក្សាសិទ្ធិដោយ thmeythmey.com